Ubwato bubiri bwari butwaye imizigo bwarohamye mu mazi yo hafi y’Umuhora wa Hormuz, nyuma yo kugabwaho ibitero by’ibisasu, mu gihe umutekano muri ako gace ukomeje kuzamba kubera intambara ihanganishije Leta Zunze Ubumwe za Amerika na Iran.

Inzego zishinzwe umutekano wo mu mazi zatangaje ku wa 14 Ukwakira 2026 ko ubwo bwato bwarohamye mu gihe cy’amasaha 24, nyuma y’ibitero bitandukanye bwagabweho.

Ibi bibaye mu gihe ibitero byibasira ubwato bunyura mu Muhora wa Hormuz byiyongereye cyane mu minsi 10 ishize, Iran ikavuga ko yongereye ibitero mu rwego rwo gusubiza Amerika yafunze ibyambu byayo ikanayifatira ibihano bikomeye by’ubukungu mu kwezi gushize.

Bumwe muri ubwo bwato ni GFS Pride, bwari bwanditse muri Singapore, bukaba bwari bufite ubushobozi bwo gutwara kontineri 2824.

Ubu bwato bwarohamye nyuma yo kuraswa, bukangirika ndetse bugafatwa n’inkongi y’umuriro.

Ikigo cya Singapore gishinzwe ibyambu n’ubwikorezi bwo mu mazi (MPA) cyatangaje ko abakozi 21 bose bari muri ubu bwato barokowe, nta n’umwe ukomeretse.

Ubundi bwato bwarohamye ni Cape Dao, bwari bwanditse muri Antigua na Barbuda, bwagabweho igitero ku wa 23 Nzeri 2026.

Amakuru y’Ishami ry’Umuryango w’Abibumbye rishinzwe Ubwikorezi bwo mu Mazi (IMO) agaragaza ko ubwo bwato bwarohamye nyuma y’ibyumweru bitatu burashwe.

Icyo gitero cyahitanye umwe mu bakozi b’ubwo bwato, abandi bahita bakurwamo.

GFS Pride na Cape Dao zibaye ubwato bwa kabiri n’ubwa gatatu burohamye muri ako gace kuva intambara ihanganishije Amerika na Iran yatangira ku wa 28 Gashyantare 2026.

Iran yakajije ingamba zo kugenzura Umuhora wa Hormuz kuva Amerika na Israel byagaba ibitero kuri icyo gihugu, igamije kongera igitutu kuri Washington.

Abayobozi babiri bakuru ba Iran batangarije Reuters ko iki gihugu gikomeje gukoresha uburyo bushya bwo kugaba ibitero ku bwato, mu rwego rwo gutuma ibiciro bya peteroli bikomeza kuba hejuru no kugira uruhare mu matora y’abagize Inteko Ishinga Amategeko ya Amerika.

Umuhora wa Hormuz ufite uruhare rukomeye mu bucuruzi mpuzamahanga, kuko mbere y’intambara wanyuragamo hafi kimwe cya gatanu cya peteroli na gaz kamere itunganyijwe mu buryo bw’amazi bicuruzwa ku Isi.

Ubwato bubiri bwarashwe muri Hormuz burarohama