Minisitiri w’Umutekano w’Imbere mu Bwongereza, Shabana Mahmood, yaburiye Eritrea ko abaturage bayo bose bashobora kubuzwa kwinjira muri iki gihugu, niba itemeye kwakira benshi mu bimukira bashaka gusubizwayo.

Kuva ku wa Kane, abadipolomate ba Eritrea babujijwe gukora ingendo bakorera hanze ya Londres, hanahagarikwa uburyo bwo kwihutisha itangwa rya visa ku banyacyubahiro.

Abo badipolomate ntibemerewe kujya mu ntera irenga kilometero 60 hanze ya Londres batabiherewe uruhushya. U Bwongereza bwavuze ko ari ingamba zihuye n’imbogamizi abayobozi babwo bahura na zo i Asmara.

Mahmood yagize ati “Eritrea yahawe amahirwe yose yo kwakira abanyabyaha n’abadafite uburenganzira bwo kuba mu Bwongereza. Bitandukanye n’ibindi bihugu, yo yaranze.”

Guverinoma y’u Bwongereza ishinja Eritrea guhagarika ubufatanye mu buryo butunguranye mu ntangiriro z’uyu mwaka. Mahmood yavuze ko atazazuyaza gufatira ibindi byemezo ibihugu byanga gukorana na yo.

Eritrea yamaganye izi ngamba, izita amayeri ya politiki, ivuga ko kuva mu 2023 nta muyobozi wayo wahawe visa y’u Bwongereza.

Ambasade yayo i Londres yanashinje u Bwongereza kwanga ibiganiro bifatika, no kuvuga ko abasubizwayo batahuka ku bushake kandi atari byo.

Icyakora, umuvugizi wa Minisiteri y’Umutekano w’Imbere yavuze ko ibyo Eritrea yatangaje bigoreka uko u Bwongereza buhagaze kuri iki kibazo.

Iyo minisiteri yavuze ko muri Kanama 2026 hari umuyobozi wa Eritrea wahawe ubusonerwe ku mabwiriza agenga abinjira n’abasohoka. U Bwongereza bwifuza ko ubufatanye bw’ibihugu byombi bwongera kubaho.

Mu mezi 12 yarangiye muri Kamena, Abanya-Eritrea barindwi gusa basubijwe iwabo bavuye mu Bwongereza, abandi 244 boherezwa mu bindi bihugu.

Muri icyo gihe, abarenga 5.800 bageze mu Bwongereza bakoresheje ubwato buto, naho abandi 1.300 bahabwa visa, ahanini zo gusanga abo mu miryango yabo.

Abanya-Eritrea bari bagize 18% by’abageze mu Bwongereza mu bwato buto, bakaba ari bo bari benshi kurusha abo mu bindi bihugu.

Dr Madeleine Sumption wo muri Kaminuza ya Oxford yavuze ko izi ngamba zizagira umusaruro muke, kuko 84% by’Abanya-Eritrea basaba ubuhungiro babuhabwa ku cyemezo cya mbere, abandi bakabubona bajuriye.

Human Rights Watch ishinja Eritrea gukandamiza abaturage, kubakoresha imirimo y’agahato, kubahatira kujya mu gisirikare no kubangamira ubwisanzure bwo gutanga ibitekerezo.

Urubyiruko rwinshi rugerageza guhunga kugira ngo rwirinde kujyanwa mu gisirikare ku gahato, aho rushobora kumaramo imyaka ibarirwa muri za mirongo.

U Bwongereza bwaburiye Angola, Namibia na Repubulika Iharanira Demokarasi ya Congo ko bishobora gufatirwa ingamba nk’izi.

Muri rusange, abantu barenga 40.600 basubijwe cyangwa birukanywe mu Bwongereza kuva muri Nyakanga 2025 kugeza muri Kamena 2026, biyongereyeho 8% ugereranyije n’umwaka wari wabanje.

U Bwongereza bugiye gukumira Abanya-Eritrea kubwinjiramo