Ubushongore n’ubukaka bwa pasiporo ya Leta Zunze Ubumwe za Amerika bukomeje guhanantuka uko bwije n’uko bukeye, cyane cyane mu myaka 20 ishize aho yavuye ku mwanya wa mbere mu 2006, ikagera ku mwanya wa 10 uyu munsi.

Abanyamerika ubu bashobora kujya mu bihugu 180 ku Isi nta viza basabye, ibituma Amerika iba ku mwanya wa 10 ku rutonde rwa Henley Passport Index, aho ihuriyeho na Iceland.

Kubera ko ibihugu byinshi bishobora kunganya amanota ku rutonde, Amerika iri inyuma y’ibihugu 36 bitanga ubwisanzure bwo gutembera ku rwego rwo hejuru ku baturage babyo kurusha ibindi.

Singapore ni yo iri ku mwanya wa mbere, abaturage bayo bafite uburenganzira bwo kujya mu bihugu 12 birenze ibyo Abanyamerika bemererwa kugeramo nta viza.

Mu 2006, Amerika yari ihuriye ku mwanya wa mbere n’ibihugu bya Finlande na Danemark, aho buri gihugu cyari gifite ubushobozi bw’uko abaturage babyo bajya mu bihugu 130 nta viza.

Mu 2016, ubushobozi bwa pasiporo ya Amerika bwari bwamaze kumanuka, iki gihugu kigera ku mwanya wa kane, na ho mu 2021 kigera ku mwanya wa karindwi.

Abaturage ba Singapore, igihugu gifite pasiporo ikomeye kurusha izindi ku Isi, bashobora gutemberera mu bihugu 192 kuri 227 biri ku Isi nta viza.

Ubushobozi bwa pasiporo ya Amerika bugabanywa n’uko iki igihugu kidatanga uburenganzira bungana n’ubwo abaturage bacyo bahabwa mu bindi bihugu.

Mu gihe abafite pasiporo ya Amerika bashobora kugera mu bihugu 180 nta viza, Amerika yo yemerera abaturage b’ibihugu 46 gusa kuyinjiramo nta viza, ibintu biyishyira ku mwanya wa 73 ku rutonde rwa Henley Openness Index, rugaragaza uburyo abaturage binjira mu bihugu boroherezwa.

Raporo ivuga ko kutugururira imiryango abandi bigira ingaruka ku mpande zombi, ndetse ikavuga ko Amerika ubu iri mu bihugu bike bifite pasiporo zikomeye aho abaturage bayo bagisabwa viza kugira ngo bajye mu Bushinwa.

Ibihugu biri imbere ya Amerika harimo Singapore, u Buyapani, Koreya y’Epfo, Leta Zunze Ubumwe z’Abarabu, Suède, u Bubiligi, Danemark, Finlande, u Bufaransa, u Budage, Irlande, u Butaliyani, u Buholandi, Norvège, Espagne, Autriche, u Bugereki, Malta, Portugal, u Busuwisi, Hongrie na Pologne.

Birimo kandi u Bwongereza, Canada, Repubulika ya Tchéque, Latvia, Malaysia, Nouvelle-Zélande, Slovakia, Slovenia, Croatia, Estonia, Liechtenstein na Lithuania

Pasiporo ya Amerika ikomeje gucika amazi ku Isi