Iran yatangaje ko intumwa zayo ziri i New York mu Nteko Rusange y’Umuryango w’Abibumbye zidateganya kugirana ibiganiro na Leta Zunze Ubumwe za Amerika, mu gihe Perezida Donald Trump yari yavuze ko yiteze ko ibiganiro hagati y’ibihugu byombi byongera gutangira vuba.

Ibiro ntaramakuru bya Leta ya Iran, IRNA, byatangaje ko byabihamirijwe n’umuntu uri hafi y’intumwa z’icyo gihugu. Byagize biti “Intumwa za Iran ziri i New York nta biganiro ziteganya kugirana na Leta Zunze Ubumwe za Amerika.”

Ku Cyumweru, Trump yari yabwiye ikinyamakuru Axios ko yiteze ko ibiganiro byongera gutangira vuba.

Yabitangaje nyuma y’umunsi umwe yanze gahunda ya Iran yo kongera gufungura umuhora wa Hormuz mu gihe cy’iminsi irindwi.

IRNA yatangaje ko Iran yamaze kugeza ku ruhande rwa Amerika ibitekerezo n’ibyo isaba, ibinyujije ku muhuza ari we Qatar. Yongeyeho ko intumwa zayo zizava i New York zisubira i Tehran ku wa Kabiri.

Iran ivuga ko yashyizeho ibintu birindwi isaba kugira ngo intambara irangire, inzira ya Hormuz yongere gufungurwa.

Mu byo isaba harimo agahenge k’iminsi irindwi mu Burasirazuba bwo Hagati, harimo no muri Liban; kurekurirwa umutungo wayo wafatiriwe mu mahanga; gukurirwaho ibihano byafatiwe urwego rwayo rwa peteroli; no guhagarika ifungwa ry’ibyambu byayo n’amato y’intambara ya Amerika. Trump yanze ibyo Iran yasabye ku wa Gatandatu.

Hormuz ni imwe mu nzira zikomeye z’ubucuruzi bw’ibijyanye n’ingufu ku Isi.

Mbere y’intambara, hafi 20% bya peteroli na gaze bicuruzwa ku Isi byanyuraga muri iyo nzira.

Iyi ntambara yatangiye nyuma y’ibitero Amerika na Israel bagabye kuri Iran muri Gashyantare 2026, bituma Iran igabanya urujya n’uruza muri Hormuz, Amerika na yo ifunga ibyambu bya Iran.

Iran ivuga ko yashyizeho ibintu birindwi isaba kugira ngo intambara irangire, inzira ya Hormuz yongere gufungurwa