IGIHE

Umuherwe Buffett yagarutse mu Rwanda gutangiza umushinga wo kuhira imyaka

0 17-12-2015 - saa 12:32, Kanamugire Emmanuel

Nyuma y’amezi atatu umuherwe w’umunyamerika Howard Buffet avuye mu Rwanda, yarugarutsemo gutangiza umushinga wo kuhira imyaka ku buso bw’ubutaka bungana na hegitari 400 buherereye i Nasho mu karere ka Kirehe.

Uyu mushinga ni umwe mu mishinga iteganyijwe guterwa inkunga ya miliyoni 500 z’amadorali, ni ukuvuga hafi miliyari 345 z’Amafaranga y’ u Rwanda, umuherwe Buffett yahaye u Rwanda binyuze mu muryango Howard Buffett Foundation kugira ngo ateze imbere urwego rw’ubuhinzi mu gihugu.

Iyi nkunga igamije kongera umusaruro w’ubuhinzi binyuze muri gahunda yo kuhira imyaka, gutanga amahugurwa no kongera ingufu.

Muri Nzeri, Buffett yasuye Akarere ka Kirehe, ahari kubakwa ibikorwa remezo by’uyu mushinga wa Nasho II, uzuhira igishanga cya Cyambwe kuri hegitari 1,206, ugakoresha amazi y’ikiyaga cya Cyambwe.

Nkuko KT Press ibitangaza, ku wa Gatandatu tariki 19 Ukuboza, umuherwe Buffett azasura umushinga wa Nasho yerekeze i Karama ahagana mu i saa munani z’amanywa.

Ubwo aheruka mu Rwanda Buffett yavuze ko gutoranya gutera inkunga ubuhinzi bw’u Rwanda afite ibyo yagendeyeho.

Yagize ati “Iki ni cyo gihugu cyonyine ku mugabane wa Afurika nagiriye icyizere cyo gukoreramo umushinga munini nk’uyu, bitewe n’impamvu nyinshi; ubushake bwa Guverinoma, kudahuzagurika, ikindi ni uko ari umushinga ukomeye ukeneye ubufatanye bwinshi utasanga ahandi uretse mu Rwanda.”

Miliyoni 350 ni zo ziteganyirijwe ibikorwa byo kwimura no kubaka ibikorwa remezo by’uyu mushinga.

Uyu mushinga wa Nasho uzatwara miliyoni 24 z’Amadorali, izindi zisigaye ku mpano Buffett yahaye u Rwanda zizakoreshwa mu kubaka ikigo mpuzamahanga cy’ubuhinzi byitezwe ko kizaba ari icya mbere muri Afurika.

Umuherwe Buffett azanagenera abanyeshuri b’Abanyarwanda buruse 250 zo kwiga ibijyanye n’ubuhinzi.

Ubwo aheruka mu Rwanda, Buffet yishimanye n'abahinzi b'i Nasho
Ubwo aheruka mu Rwanda, Buffet yerekanye igishushanyo mbonera cy'umushinga we
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza