U Rwanda ruhangayikishijwe n’imyiteguro yo kwimurira inyandiko za ICTR mu kindi gihugu

6 21-04-2016 - saa 08:07, Philbert Girinema

Minisitiri w’Ubutabera akaba n’Intumwa Nkuru ya Leta, Johnston Busingye, yavuze ko hakenewe ibiganiro byihariye ku guha u Rwanda ishyinguranyandiko ry’Urukiko Mpuzamahanga Mpanabyaha rwashyiriweho u Rwanda, ICTR.

Yabigarutseho kuri uyu wa Gatatu tariki 20 Mata, ubwo yakiraga Umushinjacyaha w’Urwego rwashyiriweho kurangiza imanza zasizwe n’Urukiko Mpuzamhanga rwashyiriweho u Rwanda, MICT, Serge Bremmertz.

Minisitiri Busingye yamugaragarije ko Umuryango w’Abibumbye utarafata umwanzuro wo guha u Rwanda inyandiko za ICTR, nk’uko utaremeza ikindi gihugu zizajyamo n’ubwo rutahwemye kubisaba, ariko ngo hari amakuru y’imyiteguro iri gukorwa ngo zijyanwe mu kindi gihugu.

Minisitiri Busingye yavuze ko muri zo harimo inyandiko zatanzwe na Guverinoma y’u Rwanda, inyinshi zikaba zarifashishwaga mu manza zinyuranye mu myaka ishize, bityo ngo ntibyumvikana uburyo ICTR yazigumana.

Yagize ati "Amagana y’abatangabuhamya bumviswe n’Urwo rukiko, barimo abagizweho uruhare na Jenoside, abafatanyacyaha, abashinjwa, abari abakozi b’Umuryango w’Abibumbye mu Rwanda muri icyo gihe, impuguke n’abandi. Havuyemo ibihumbi by’inyandiko, amajwi n’amashusho. Muri urwo ruhurirane harimo amakuru y’ibyabaye mu Rwanda, mbere mu gihe na nyuma ya jenoside. Ibyo byose ni iby’Abanyarwanda nk’uko byigaragaza.“

Busingye yavuze ko u Rwanda rwemera ko izo nyandiko ari iz’Umuryango w’Abibumbye, ariko ngo u Rwanada nk’Umunyamuryango wuzuye wa Loni, rwiteguye gukora ibishoboka byose ngo ruzicumbikire.

Yakomeje agira ati "Icyo u Rwanda rusaba cyonyine ni uko hakorwa ikiganiro kirambuye hagafatwa umwanzuro kuri iki kibazo. Ikiganiro gisesuye kirakenewe, cyane ku byo twumva ko hari aho imyiteguro irimbanyije ku bijyanye n’ibikorwa remezo n’ibikoresho nkenerwa by‘iryo shyinguranyandiko ahandi hantu.“

Umushinjacyaha wa MICT, Serge Bremmertz, yavuze ko ikibazo cy’u Rwanda cyumvikana neza, kuko ibyaha bya Jenoside byakorewe abantu barwo, bityo rukaba rushaka amakuru ajyanye n’ibyo byaha nk’ikimenyetso gihoraho ku byabaye mu gihugu.

Minisitiri Busingye yavuze ko azi neza ko ishyinguranyandiko rya ICTR ritabarizwa mu Bushinjacyaha, ariko ngo Bremmertz nk’Umuntu ukomeye mu mikorere y’urukiko ashobora gufasha mu gutanga ubutumwa.

Serge Bremmertz yavuze ko atari Ubushinjacyaha bubazwa iby’ishyinguranyandiko, gusa ngo azaba intumwa y’u Rwanda ubwo azaba avugana na Perezida n’umwanditsi wa MICT.

Minisitiri Busingye ari kumwe n'Umushinjacyaha w’Urwego rwashyiriweho kurangiza imanza zasizwe n’Urukiko Mpuzamhanga rwashyiriweho u Rwanda, MICT, Serge Bremmertz
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
LOLA 2016-04-23 07:47:55

kugira copies , yego, ariko kubitswa originaux????

2
Emmanuel 2016-04-23 00:21:53

Niyo zitahabwa u Rwanda ariko ningombwa ko u Rwanda rusigarana inyandiko ibyerekeye (copies)

3
2016-04-21 16:04:33

Pppffffff akaburiye mu isiza ntikaboneka mu isakara

4
Macumu 2016-04-21 08:36:31

Oya nibaduhe izo dosiye ni izacu. Zizadufasha kumenya ibintu byinshi: abatwihishemo bagiye gushinjura rwihishwa bariya bantu, ibyo badushinje by’amatakirangoyi n’ibimenyetso bya nyirarureshwa batanze, aho bapfuritse ibimenyetso byagombaga kwerekana ko jenoside yateguwe, n’ibindi byinshi. Nibazizane ni izacu.

5
Rwanda 2016-04-21 05:07:12

nonese ntabwo bishoboka ko binaramutse bidakunze u Rwanda rwahabwa hard copies na soft copies z’izo nyandiko

6
Dusabemungu 2016-04-21 04:23:45

Ntakibazo naho babijyana ahandi ariko bakaduha copie!!!!!!!!!

Kwamamaza