IGIHE

Kwibuka22: CNLG yagaragaje ibizakorwa

0 26-03-2016 - saa 14:30, Philbert Girinema

Komisiyo y’Igihugu yo kurwanya Jenoside, CNLG, yagaragaje ibikorwa bitandukanye biteganyijwe mu Cyumweru cyo kwibuka ku nshuro ya 22 Jenoside yakorewe Abatutsi.

Mu itangazo ryashyizweho umukono n’Umunyamabanga Nshingwabikorwa wa CNLG, Dr. Bizimana Jean Damascène, rigaragaza ko insanganyamatsiko y’uyu mwaka ari “ Kwibuka Jenoside yakorewe Abatutsi, turwanya ingengabitekerezo ya Jenoside".

Icyumweru cy’icyunamo kizatangira tariki 07 kugera tariki ya 13 Mata 2016, nubwo ibikorwa bijyanye no kwibuka Jenoside bimara iminsi 100, ishushanya karuvariyo Abatutsi banyuze bicwa umusubizo mu gihe cy’amezi atatu, igihugu kitarabohorwa n’ingabo zahoze ari za RPA.

Mu gihugu hose kuva mu nzego z’ibanze, hazategurwa kandi hazakorwa ibikorwa binyuranye bijyanye no kwibuka. Iby’ingenzi muri ibyo ni ugukomeza gushyingura mu cyubahiro imibiri y’abazize Jenoside yakorewe Abatutsi.

Hari kandi igikorwa cyateguwe kiri mu ndirimbo ya Munyanshoza na Mariya Yohana cyo kwibuka ku nshuro ya 22 lenoside yakorewe Abatutsi gifite insanganyamatsiko igira iti: "Nta cyambuza kwibuka" kizaba tariki ya 8 Mata 2016, muri Serena Hotel.

Ibindi bikorwa birimo gukomeza kwifatanya n’abacitse ku icumu, kubasura, kubafasha no kubafata mu mugongo no gukusanya inkunga.

Ibigo bya Leta n’ibyigenga, za Minisiteri, Amadini n’abandi, birashishikarizwa gukomeza gahunda zo kwibuka abari abakozi, abanyeshuri, abayoboke babo bazize Jenoside yakorewe Abatutsi, kwitabira ibiganiro no gufasha abacitse ku icumu batishoboye.

Za Ambasade z’u Rwanda mu mahanga, Abanyarwanda baba mu mahanga n’ibihugu babamo, bazategura ibikorwa bigamije kwibuka Jenoside yakorewe Abatutsi.

Tariki ya 7 Mata 2016, hazaba umuhango wo gutangiza icyunamo uzabera ku rwego rw’umudugudu hose mu gihugu, kwibuka bizabera kandi no mu mahanga.

Kwibukira ku rwego rw’Umudugudu birashimangira ko kwibuka Jenoside yakorewe Abatutsi ari igikorwa cy’abaturage ubwabo, aho bahura bakaganira ku mateka ya Jenoside muri rusange, no mu Karere batuyemo by’umwihariko. Kwibukira ku Mudugudu kandi bizatuma abaturage barushaho kwegera abacitse ku icumu batishoboye, babasure kandi babatere inkunga, banabahumurize.

Umuhango uzatangirira ku rwibutso rwa Kigali

Kuri uwo munsi hazaba umuhango wo kunamira no gushyira indabo ku mva zishyinguwemo imibiri y’abazize Jenoside ku rwibutso rwa Jenoside rwa Kigali ku Gisozi, igikorwa gitangizwa na Perezida wa Repubulika.

Nyuma y’uwo muhango, abaturage bazakurikira mu midugudu ubutumwa bw’umunsi bujyanye no kwibuka abazize Jenoside yakorewe Abatutsi.

Mu mahanga kwibuka bizategurwa na za ambasade z’u Rwanda, zifatanyije n’Abanyarwanda baba mu mahanga, inshuti z’u Rwanda n’indi miryango iharanira inyungu z’abacitse ku icumu. Tariki ya 7 Mata 2016 kandi hazatangwa ibiganiro mu Midugudu yihariye izaba yatoranyijwe muri buri Karere.

Umugoroba w’icyunamo nawo uzabera ku rwego rw’Umudugudu, abantu bongere bahure, basure abacitse ku icumu batishoboye, babahe ubufasha, babafate mu mugongo. Mu cyumweru cy’icyunamo hazatangwa ibiganiro mu midugudu yose, bikaba bigomba kwitabirwa kandi bigategurwa neza.

Icyumweru cy’icyunamo kizasozwa tariki ya 13 Mata 2016, uwo muhango ukaba uzahuzwa no kwibuka Abanyapolitiki bishwe mu gihe cya Jenoside yakorewe Abatutsi, igikorwa kizabera ku musozi wa Rebero kiyoborwa na Perezida wa Sena.

Kwibuka Jenoside yakorewe Abatutsi bizakomeza mu minsi 100 mu gihugu cyose, kugera tariki ya 3 Nyakanga 2016 , bukeye bwaho hizihizwe umunsi mukuru wo kwibohora, hibukwa abana b’u Rwanda bafashe iya mbere bakitabira ibikorwa by’urugamba rwo kubohora igihugu, bagahagarika na Jenoside.

Umunyamabanga Nshingwabikorwa wa CNLG, Dr. Bizimana Jean Damascène
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza