Ibuka yakomoje ku kurega Kabgayi mu nkiko, Mbonyintege ayimara impungenge

20 29-06-2016 - saa 10:11, Ferdinand Maniraguha

IBUKA ifite impungenge ko mu muhango wo kwizihiza yubile y’imyaka 25 y’abapadiri iteganyijwe muri Diyoseze ya Kabgayi n’abahamwe n’ibyaha bya Jenoside bazizihirizwa yubile, kandi ngo biragoranye ko hazabaho kunenga ibibi byakozwe na bamwe mu bihayimana mu gihe cya Jenoside.

Musenyeri wa Diyosezi ya Kabgayi Smaragde Mbonyintege yavuze ko badashobora kwizihiza yubile y’abapadiri bakoze Jenoside, kandi ko bazanasaba imbabazi kubera abihayimana bahemutse.

Ahishakiye Naphtali, Umunyamabaganga Nshingwabikorwa wa Ibuka, Impuzamiryango irengera inyungu z’abarokotse Jenoside yakorewe Abatutsi mu 1994, yakomoje ku rutonde ruriho abapadiri batandatu bakomoka muri Diyoseze ya Kabgayi bazakorerwa yubile, harimo na babiri bahamwe n’ibyaha bya Jenoside.

Ubutumire bwavuye he?

Urwo rutonde ntirugaragaza inkomoko yarwo, Diyoseze ya Kabgayi iyoborwa na Musenyeri Mbonyintege Smaragde ihakana ko atari yo yarushyize ahabona, mu gihe Ahishakiye ahamya ko ari ubwa kiliziya.

Ubwo yaganiraga na Radiyo KFM, Ahishakiye yagize ati “ Hari ubundi butumire bwa diyosezi zitandukanye tujya tubona, ubwo twari dufite ubushize ( iyimikwa ry’umusenyeri mushya) nta sinya bwari bufite, [...]tubibona nk’amahano, ariko birahari, babizi neza ko ari ubutumire ari n’umunsi utegurwa na Diyoseze ya Kabgayi.”

Byatumye Ibuka ishyira ahabona itangazo ryamagana icyo gikorwa ifata nko gupfobya Jenoside, mu gihe bamwe mu bahamijwe kuyikora baba bakorewe ibirori.

Yagize ati “ Si ubwa mbere twaba tugiye mu mihango nk’iyi irangwa no kuvuga ibigwi by’uwakorewe yubile, hari aho ujya ukumva bararengera bakavuga ibigwi adafite,..”

Impungenge zikomeye Ahishakiye afite, yazigaragaje agira ati “Kwicara bakavuga ko abo bapadiri bahekuye igihugu ntabwo tubibara nk’ibintu bidashoboka.”

Akomeza avuga ko kubavuga ibigwi byatera ibikomere abacitse ku icumu, n’undi wese waba uzi ibyo bakoze.

Kiliziya yirengagize abakozi bayo?

Mu bibazo bitandukanye byabajijwe harimo niba abo bapadiri batarekerwa kuri urwo rutonde bakazagawa mu ruhame kubera ibyaha bya Jenoside bishoyemo, ndetse n’icyo bitwaye kuba baguma mu bitabo bya kiliziya, ndetse n’ikibazo biteza mu gihe bakorewe iyo yubile ariko bishingiye ku isakaramentu bahawe.

Ahishakiye yavuze ko atekereza ko Kiliziya Gatorika ikwiye kumva uburemera bw’ibyaha abo bapadiri bakoze ntibizihirize iyo yubile.

Ati “ Uko Kiliziya ikwiye kwitwara ni ukumenya kwitandukanya n’abayo bafite ingengabitekerezo ya Jenoside, yego ntiyemera ariko rimwe na rimwe usanga isa n’ihagaze ku bihayimana bayo bagaragaraho ingengabitekerezo ya Jenoside, n’andi madini turabibasaba kuko usanga biyavangira.”

Ibuka yemera izina umusaseredoti?

Ibuka ibona ko izina umusaredoti ridakwiye kwamburwa uwahawe iryo sakaramentu, kuko n’ubundi uwabaye dogiteri cyangwa ambasaderi batajya bamburwa iryo zina, nyamara ngo hari uko urifite wakoze ibyaha bikomeye akwiye gufatwa.

Ati “ Ibikorwa byabo byatesheje agaciro ubusaseredoti bwabo ntabwo dukwiye kubwizihiza. [...]Umupadiri watandukiriye kugeza ubwo agera ku cyaha cyo kwica intama ze agakora icyaha kiremereye nka Jenoside, ntabwo kiliziya yamwimitse ngo azakore jenoside, yamwimitse nk’umuntu wari kwamamaza ukwemera. [...]Mu bitabo bya Kiliziya banditsemo nibabigumemo, ariko ibikorwa byabo bibambura agaciro ko kuba uyu munsi twabakura mu bitabo tukabakorera yubile nk’aho hari icyo tubashima.”

Kubafatira ko hari isakaramentu ry’imbabazi(Penetensiya) umuntu ahabwa n’imbabazi zishobora gutuma umuntu asubira mu murimo we, Ahishakiye asanga icyaha cya Jenoside kiremereye ku buryo abantu bakwirinda kucyitiranya n’ibindi.

Ibuka ishobora kurega Diyoseze mu Nkiko

Kabgayi irasabwa gukora icyo Ibuka ibona cyoroshye ikavana abo bapadiri babiri ku rutonde rw’abazakorerwa Yubile, itabyubahiriza ikaregwa.

Ati “ Ntekereza yuko ibyo dusaba ni ibintu bifite ishingiro, ntaho turagera tubona ko diyoseze ya Kabgayi itazabyumva, itazabiha agaciro, ariko mu gihe bitakorwa nkuko twabivuze byaba ari kimwe mu bigize icyaha cy’ingengabitekerezo ya Jenoside twavuze, twasaba inzego z’ubutabera zikazabikurikirana.”

Diyoseze ya Kabgayi iti iki?

Musenyeri Mbonyintege yahakanye ko atazi iby’ubwo butumire, ndetse amara impungenge ko Yubile izakorerwa abapadiri batahamwe n’ibyaha bya Jenoside, kandi ngo ni ababa i Kabgayi kuri ubu.

Mbonyintege uri mu butumwa mu mahanga, yemeje ko nabuvamo azitangira ubutumire nyabwo.

Kiliziya izasaba imbabazi?

Hari abapadiri batannye, bakora Jenoside, Mbonyintege abona ko bibabaje, Ahishakiye asaba ko Kiliziya yagombye gutegura umwanya ikagaya abihayimana batannye, ndetse bigakorwa no mu yandi madini.

Musenyeri Ntihinyurwa Thadee Umushumba wa diyoseze ya Kigali na Mbonyintege Smaragde, babajijwe icyo kibazo muri filime mbarankuru ‘Ikibyimba cy’Ukuri (Abces de la Verite).

Icyo gihe bavuze ko Kiliziya yitegura kwitandukanya vuba n’ibibi byaranze Abihayimana.

Mu Kiganiro IGIHE yagiranye Musenyeri Mbonyintege ku wa 27 Kamena 2016, yavuze ko mu itangwa ry’ubusaseredoti, muri Paruwasi ya Mushishiro tariki ya 16 Nyakanga 2017, bateguye igikorwa kidasanzwe.

Yagize ati “ Yubile izakorerwa abagomba kuyikorerewa,[...] Njyewe nzanasaba n’imbabazi ku mugaragaro, uwo munsi, tuzaba turi mu mwaka w’ubusaseredoti, sinshobora rero kutagira icyo mvuga ku bahemutse(abapadiri) hari icyo tuzabavugaho nabo.”

Musenyeri Mbonyintege avuga ko badashobora kwizihiza yubile y'umuntu wahamijwe ibyaha
Ahishakiye ubwo yari mu muhango wo kwibuka mu murenge wa Rutunga mu Karere ka Gasabo muri Mata uyu mwaka
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
ndaba 2016-06-30 01:13:32

Ariko nkawe uvuze iki kwirukana kiriziya gstorika ko mutirukanye rwarakabije imbaga yabanyarwanda yamaze ntimwamugororeye kuyobira interahamwe zatugize imfubyi mwazihembye kuzifungura ndahamya ko zimeze neza cyane none yubire yabavugishije kurusha abacikacumu batemagurwa burimunsi kuki mukunda byacitse

2
rwanda 2016-06-30 00:38:20

hahah abantu barantangaza iyo bavuga ngo kiliziya irakomeye yubatse k’urutare.aba mbafata nka rwa rurondwe rwumiye ku ruhu inka yarariwe cyera.aho se kiliziya itasenyutse nihe?igisigaye se ahubwo niki?iyo wiyita umukozi w’imana wasizwe amavuta, ukica, ugasambana,ugafata ku ngufu, ukarongora utwana twuduhungu, ugakora guerre croissade, aba papa ba bagore, ubujura, mafia, kujya muri politike,....none ngo kiliziya ntaho izajya????va ku guti dore umuntu...nta mana ibaho, mwige kubaho ki muntu, mugire umutima ukunda bagenzi banyu......

3
Vuguziga 2016-06-29 22:24:47

Uwavuga ko mu mvugo nyinshi zikarishye abanshi mu bayobozi ba IBUKA bakoresha hashobora kuyiviramo nayo kuregwa yaba abeshye?! Hari imvugo zishobora kuba icyaha imbere y’amategeko gusa ubanza muri uru Rwanda IBUKA yo iyari hejuru. imeze nka cya kinyabiziga NTAKUMIRWA. Abacyebura abanyarwanda ntibagombye kwirengagiza imvugo za IBUKA zikunze kurangwamo amagambo mabi cyangwa adakwiye gukoreshwa.

4
muneza alain 2016-06-29 13:33:56

Ariko sigusa catolike baribayibitse ubuse niyihenka yacitse amabere ko uyumuyobozi yavuzeko bazabakuramo kdi akavugako batakora iryokosa barigushya imitwe yiki bategereje!!! uhhh narumiwe ndabona byakomeye wagirango niwe wamennye amaraso abayamennye azabasama, kdi barabiryojwe nimuhe amahoro kiliziya mureke kuyishakaho impamvu kuko yubatse kurutare nizigera ihungabana Ingoma zizashira arikoyo izarangirana nisi kdi bibukeko ariyatwese itarobanura amoko bivugango kuyivugaho nabi nokuyiyenzaho nukwirwanya nokurwanya imyizerere yumunyarwanda!

5
Charles 2016-06-29 13:14:25

icyo umuntu abiba nicyo asarura. Uku gusarura ushobora gutuma abana ubyaye aribo bazagibwaho n’ingaruka zuko witwaye muri ubu buzima. Twitondere amagambo asohoka muri twe nibikorwa dukorera abandi.

6
Charles 2016-06-29 12:47:17

banyarwanda mureke twemere ko twese twihekuye ubundi dusabane imbabazi kuko ndumva aho bigeze hazafungwa benshi. Uku gutunga agatoki dushinja abandi ibyaha ko mbona bitazatugwa amahoro!!!!

Utarishe yatunze agatoki
Utaratunze agatoki yasambanyije kungufu
Utarasambanyije kungufu yashinje abandi ibinyoma
Utarashinje ikinyoma yasahuye imitungo
Utarasahuye imitungo yishe bene yo
Utarishe beneyo yariganije ibyabo
Utarariganije ibyabo yariyoberanyije
Utariyoberanyije yahunze igihugu
Utarahunze igihugu yarafunzwe
Utarafunzwe yishe abo bava inda imwe bapfa amasambu
Utarariye amasambu yarongoye mukase kungufu
Utararongoye mukase yarongoye impinja yibyariye.... Ngaho pasitoro gufungisha mugenzi we ngo amuzungure!!!! Ubwo nawe avuga ko Imana ariyo yamuhamagaye????
Banyarwanda TWARIHEKUYE, TWISHYIZEHO URUBANZA.

Tugabanye gutunga abandi intoki ubundi twisuzume kuko nitugenza dutyo nibwo tuzaba duhaye icyubahiro abacu bishwe bazira ubusa. Ubu nabo twari kuba tubafite.
Rwanda nkunda igisha abana bawe kumenya ko Imitima ya benshi yakomeretse kandi ko ikeneye amahoro arambye. Jyewe ntakibazo mfitanye na kiriziya iyo ariyo yose ahubwo nakwibaza niba koko imbere yizaca imanza zibyabereye mubwihisho nzahinguka imbere yayo ndi umwere. Niki nakoze kugirango hatagira numuntu umwe upfa? Niba harapfuye abantu bangana gutya ese ntaruhare nabigizemo? Ese jye nunga abandi cyangwa ndabateranya!!!
Hamenetse amaraso menshi yinzira karengane, twapfushije abacu kandi tuzi nuburyo bapfuyemo bwagashinyaguro. aho tugeze ni ukwakira ibyatubayeho twiha ikizere cyo gukomeza kwiyubaka tudasenya ibyo tumaze kugeraho. Munyangire na rwango na bwoko tumaze kubyibagirwa...

7
Gashugi 2016-06-29 10:57:47

Kiliziya nimese kamwe yerure uruhande iriho niba ari urw’abajenosideri cg abo bahekuye ibintu bisobanuke bavaneho urujijo,naho bitabaye ibyo nsanga igihe cya diplomacy cyararangiye,ubu amategeko nahabwe umwanya.

8
[email protected] 2016-06-29 08:42:18

john

9
j nkusi 2016-06-29 08:03:01

Ese harya umuntu acibwa amasakaramentu aruko yakoze icyaha ki? uwakoze icyaha cya jenoside akwiye gukomeza kuyabona?

10
Justin 2016-06-29 07:47:29

Kubera uburemere bw’iki kibazo, jye nkeka ko ari Nyirubutungane Papa ubwe ugomba kuza mu Rwanda agasaba imbabazi aba kristu n’abanyarwanda bahemukiwe n’abihaye Imana mu Rwanda, atibagiwe n’aba padiri bera barimo Peraudin bahemukiye u Rwanda kuburyo bukomeye, bunanyuranije no kwemera dusangiye. Sinumva uku yasabira abapadiri bafata abana kungufu akibagirwa abapadiri bahemukiye u Rwanda muri jenoside na mbere yayo !!!!!!

Paji: 1 | 2  

Kwamamaza