Burera: Abaturage 600 bamaze imyaka 8 batarishyurwa ayo bakoreye mu guca amatarasi

4 7-12-2015 - saa 11:28, Philbert Girinema

Akazi ko guca amatarasi mu Murenge wa Kagogo, aba baturage bagakoze mu mwaka wa 2007, mu gihe kingana n’amezi atandatu, imyaka ishize ari umunani nta n’umwe mu bagera kuri 600 urahembwa n’umubyizi umwe.

Hari mu mwaka wa 2007, ubwo ubuyobozi bw’Umurenge wa Kagogo mu Karere ka Burera, bwahaga abaturage akazi ko guca amatarasi y’indinganire mu bice bitandukanye byo muri uyu murenge.

Nsabimana Fabrice, wari Umunyamabanga Nshingwabikorwa w’Umurenge wa Kagogo, waje kwimurirwa mu wundi murenge, niwe ushyirwa mu majwi n’abaturage ko ngo ariwe wabahaye akazi.

Baganira na TV1, aba baturage bavuze ko bamaze imyaka umunani baburagizwa n’ubuyobozi. Umwe yagize ati “Ikibazo dufite ni uko badukoresheje ntibaduhemba guhera muri Nzeli 2007, kugeza muri Gashyantare 2008.”

Undi muturage avuga ko uko ari 600 bafitiwe umwenda ugera kuri miliyoni zisaga 31, ngo bakomeje gushyirwa ku cyizere ko bazishyurwa, ariko amaso yaheze mu kirere. Ati “Ibyo twakoze biragaragara, ariko ntitwumva impamvu bataduhembye, ni akarengane twakorewe n’ubuyobozi.”

Nsabimana Fabrice wahoze ari umuyobozi w’Umurenge wa Kagogo, avuga ko aba baturage ibyo bakoze wari umuganda, atari umushahara bakoreraga.

Ati “Ntabwo twebwe twigeze dutanga akazi ko gukora amaterasi, byari ubukangurambaga bwo guca amaterasi mu mirima y’abaturage. Ubuyobozi bunkuriye busanze narahaye abaturage akazi simbahembe, babimbaza nkabisobanura. Ikindi kandi abaturage numva bafite ikibazo ntibageze kuri 600 ahubwo numva ari abaturage 10, 20 , 30 gutyo.”

Umuyobozi w’Akarere ka Burera, Sembagare Samuel, avuga ko iki kibazo akizi akaba agiye kugikurikirana mu bushishozi, kuko ngo hari amakuru afite agisesengura.
Ati “ Navuganye n’inzego z’ibanze bambwira ko ari ubukangurambaga bakoze mu rwego rw’Umurenge, numva harimo urujijo, ntabwo icyo kibazo ndakibonera umuti kuko ndacyacyiga neza.”

Uyu muyobozi akomeza avuga ko mu gihe cy’icyumweru kimwe, ikibazo cy’abaturage kizaba cyakemuwe burundu.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Georges M 2015-12-08 05:52:08

Umuganda umara amezi atandatu bawukora buri munsi nturabaho. Nubu leta iramutse yemeje ko umuganda was buri kwezi ugizwe iminsi 10 mukwezi byaba bihindutse akazi.

2
Georges M 2015-12-08 05:52:07

Umuganda umara amezi atandatu bawukora buri munsi nturabaho. Nubu leta iramutse yemeje ko umuganda was buri kwezi ugizwe iminsi 10 mukwezi byaba bihindutse akazi.

3
Georges M 2015-12-08 05:52:06

Umuganda umara amezi atandatu bawukora buri munsi nturabaho. Nubu leta iramutse yemeje ko umuganda was buri kwezi ugizwe iminsi 10 mukwezi byaba bihindutse akazi.

4
nintare 2015-12-07 10:19:43

Abo bantu bacukuye amatarasi se koko, umuntu wese ko abeshejweho n’umubyizi we nkubwo abayobozi barabivuga hi iki muri iki gihe inzara ari yose, imyaka umunani nizeyeko nibajya kubishyura bazabaha n’inyungu yayo.

Kwamamaza