Abasirikare 448 bo ku rwego rwa Ofisiye n’abandi basirikare basezerewe mu ngabo z’ u Rwanda, binjira mu kiruhuko cy’izabukuru mu cyiciro cya gatatu cyo muri 2015.

Umuhango wo gusezerera ba Ofisiye bakuru wabaye ku mugoroba wo kuwa Gatanu tariki 24 Nyakanga 2015, uyoborwa na Minisitiri w’Ingabo z’u Rwanda, Gen James Kabarebe, witabirwa n’ Umugaba mukuru w’Ingabo Gen Patrick Nyamvumba n’abandi bayobozi bakuru b’ingabo, mu Kigo cy’imikino cya RDF kiri Nyarutarama mu Mujyi wa Kigali.

Mu mitwe yose igize ingabo z’u Rwanda naho habereye umuhango wo gusezerera abandi basirikare bo ku rwego rwa Ofisiye bato hamwe n’abandi basirikare.

Minisitiri w’Ingabo Gen James Kabarebe yashimiye abasirikare binjiye mu kiruhuko cy’izabukuru.

Yagize ati "Mwaritanze mwubaka u Rwanda twumva dufite ishema ryo kwita igihugu cyacu"

Gen Kabarebe yabashimiye uruhare bagize mu kubohora igihugu n’urugamba rwo guhagarika Jenoside yakorewe Abatutsi mu 1994, uruhare mu iterambere ry’igihugu no kubaka kinyamwuga ingabo za RDF hamwe n’uruhare mu kubungabunga amahoro hirya no hino ku Isi.

Yabwiye abasirikare binjiye mu kiruhuko cy’izabukuru gukoresha ubunararibonye bakuye mu gihe kirekire bamaze bakora imirimo ya gisirikare kugira ngo bufashe imiryango yabo n’igihugu muri rusange.

Yakomeje agira ati “Turabasaba kuzakomeza kurangwa n’indangagaciro za RDF mukomeza kuba Abanyarwanda babereye igihugu cyanyu.”

Umugaba Mukuru w’Ingabo,Gen Nyamvumba nawe yashimye ubutwari bwaranze aba basirikare.

Yagize ati “ Aba bagenzi bacu bamaze igihe kitari gito bakorera iki gihugu. Ndetse hari na bagenzi babo batashoboye kugera kuri iki gikorwa bitangiye abandi banyarwanda kugira ngo tugire amahoro n’umutekano, kandi ibyo byagezweho. Tuzahora twibuka akazi mwakoranye umurava kandi mwitangira igihugu”

Gen Nyamvumba yavuze ko gusezerera abasirikare bageze mu zabukuru ari igikorwa gisanzwe mu ngabo zishaka kwiyubaka kinyamwuga kandi asanga inzira yo gusigasira ibyakozwe ari ukubiraga urubyiruko rugifite imbaraga.

Yakomeje agira ati“Ibyo twakoze twashobora kubisigasira aruko hagiyeho amaraso mashya ari nacyo cy’ingenzi kigamijwe”.

Umugaba mukuru w’ingabo yashimiye by’umwihariko abagore b’abasirikare bafatiye runini abagabo babo babashyigikira mu kazi katoroshye ko kwitangira igihugu, bakagera aho basezererwa mu cyubahiro.

Minisitiri w’Ingabo Gen James Kabarebe

Gen Patrick Nyamvumba