Ikigo cy’Igihugu Gishinzwe Ibizamini n’Ubugenzuzi bw’Amashuri (NESA) cyatangaje ko abanyeshuri 94,33% batsinze ibizamini bya Leta bisoza amashuri yisumbuye mu mwaka w’amashuri wa 2025/2026.

Byatangarijwe mu muhango wo gutangaza amanota y’ibizamini bya Leta bisoza amashuri yisumbuye wabaye kuri uyu wa 11 Nzeri 2026.

Umuyobozi Mukuru wa NESA, Dr. Bahati Bernard, yatangaje ko muri rusange, hiyandikishije abanyeshuri 108.732 barimo abakobwa 55,05% n’abahungu 44,95%.

Dr. Bahati yasobanuye ko abakoze ibizamini bya Leta ari 108.406 barimo 102.261 batsinze bangana na 94,33%. Mu bahungu, hatsinze 95,94%,mu bakobwa hatsinda 93,02%.

NESA yagaragaje ko imitsindire y’uyu mwaka iri hejuru ugereranyije n’umwaka ushize, kuko mu 106.078 bakoze ubushize, 89,1% ari bo batsinze.

NESA yasobanuye ko abatsinzwe ibizamini bya Leta bisoza amashuri yisumbuye (bagize munsi ya 50%) ari 5,63% mu gihe abagize amanota kuva kuri 70 kuzamura ari 48,98%.

Mu bakoze ibizamini by’amasomo asanzwe (General Education), 93,87 mu 36.938 ni bo batsinze aya siyansi, 95,86% batsinda ubumenyamuntu, naho 93,61% batsinda indimi.

Mu mashuri y’imyuga n’ubumenyingiro, hakoze abanyeshuri 42.793, hatsinda 42.793 bangana na 94,55%, hatsindwa 5,36%.

Manzi Nshuti Kabanda Brave wize Imibare, Ubutabire n’Ubumenyabuzima (MCB) muri Petit Seminaire Saint Aloys mu Karere ka Rusizi ni we wahize abandi mu bizamini bisoza amashuri yisumbuye, umwaka wa 2025/2026.

Manzi yagize amanota 98,40%, akurikirwa na Umwali Deborah wize ubugeni n’ubumenyamuntu (HLP) muri Cornerstone Leadership Academy i Rwamagana, wagize amanota 97,52%.

Irakoze Pacome wigaga amasomo y’imbonezamubano (social studies) muri TTC Rubengera mu Karere ka Karongi yabaye uwa gatatu, agira amanota 95,93%.

Umukundwa Herniette wigaga ibaruramari ry’umwuga muri ACEJ Karama mu Karere ka Muhanga yabaye uwa kane, agira amanota 95,23%.

Umunyurwa Karangwa Naomie wigaga ubugeni n’ubukorikori muri Ecole d’Art de Nyundo mu Karere ka Rubavu, yabaye uwa gatanu, agira amanota 94,74%.

NESA na Minisiteri y'Uburezi byatangaje ko abanyeshuri 94,33% batsinze ibizamini bya Leta bisoza amashuri yisumbuye