Kaminuza ya Kigali yakiriye Inama Mpuzamahanga ihuza abayobozi bashinzwe imibereho y’abanyeshuri biga muri kaminuza zitandukanye zo muri Afurika, baganira ku bishobora kuzamura imibereho myiza y’abanyeshuri biga muri kaminuza zo kuri uyu mugabane.

Ni inama yakiriwe na Kaminuza ya Kigali kuva ku wa 24 kugeza ku wa 28 Kanama 2026, yitabirwa n’abagize Ishyirahamwe ry’Abayobozi bashinzwe Imibereho y’Abanyeshuri mu mashuri makuru na Kaminuza zo muri Afurika (AADSATI).

Iyi nama y’iminsi itanu yitabiriwe n’abandi banyamwuga muri uru rwego baturutse hirya no hino ku mugabane wa Afurika, bagamije kurebera hamwe uburyo ibigo kaminuza n’amashuri makuru yakwitwara ku mpinduka zigaragara mu byo abanyeshuri bakeneye, mu gihe isi igenda irushaho gutera imbere mu ikoranabuhanga.

Iyi nama yabaye ku nsanganyamatsiko igira iti “Gutekereza bundi bushya ku buyobozi bushinzwe imibereho y’abanyeshuri mu gihe imibereho n’ikoranabuhanga bikomeje guhinduka ubutitsa: Imyitwarire myiza, imiyoborere n’ubudaheza mu mashuri makuru yo muri Afurika.”

Ibiganiro byibanze ku bibazo bikomeye biri ku isonga muri uru rwego, birimo imikoreshereze y’ikoranabuhanga, uburyo bwo gufasha abanyeshuri, imyitwarire n’imiyoborere myiza, ubudasa n’ubudaheza, imibereho yo mu mutwe, guhangana n’ibibazo ndetse no guteza imbere abanyeshuri.

Ku wa 24 Kanama 2026 ni bwo abayitabiriye batangiye kugera i Kigali baturutse mu bihugu bitandukanye birimo Nigeria, Ghana, Zimbabwe, Sierra Leone, Uganda n’ahandi muri Afurika.

Nyuma yo kugera i Kigali, Abayobozi ba AADSATI bagiriye uruzinduko muri Kaminuza ya Kigali, aho bakiriwe n’Umuyobozi Mukuru wa Kaminuza, Prof. George Kimathi, Umuyobozi Wungirije ushinzwe Ubushakashatsi, Udushya n’Ubucuruzi, Prof. Ogechi Adeola, ndetse n’Umuyobozi ushinzwe imibereho y’abanyeshuri, Mukasonga Virginie.

Ibiganiro nyamukuru byatangiye ku wa Kabiri, tariki ya 25 Kanama, aho abahagarariye kaminuza 45 zo muri Afurika bitabiriye umuhango wo gutangiza inama ndetse n’ibikorwa byo kumenyana.

Uyu muhango waranzwe n’imbyino gakondo, zongeraga umwihariko w’umuco ndetse zigaha abashyitsi umwanya wo kumenya no kwishimira umurage w’u Rwanda.

Umuyobozi Mukuru wa Kaminuza, Prof. George Kimathi, ni we watangaje ku mugaragaro iyi nama, ashimangira akamaro ko gushyiraho ahantu abayobozi bashinzwe abanyeshuri bashobora kungurana ibitekerezo, gusangira ubunararibonye, guhangana n’ibibazo bishya no gushyiraho uburyo bufatika bwo kunoza serivisi zihabwa abanyeshuri muri za kaminuza zo muri Afurika.

Yashishikarije ibigo by’amashuri makuru gutanga ubufasha bukwiye ku bayobozi bashinzwe abanyeshuri ndetse n’abandi banyamwuga muri uru rwego, haba mu kazi no mu buzima bwa buri munsi, kuko na bo bafite inshingano zikomeye zo kuganiriza, gufasha no kwitabira ibibazo n’ibyo abanyeshuri bakeneye.

Mu bindi byaganiriweho kuri uyu munsi harimo iterambere ry’ikoranabuhanga, imicungire y’imibereho y’abanyeshuri, ibibazo by’imitekerereze n’iterambere ryabo, uburyo bwo kubafasha, ishyirwa mu bikorwa rya politiki z’ibigo ndetse n’ingamba zo kubafasha kugera ku ntsinzi.

Ibi bibaye mu gihe kaminuza zisabwa kuvugurura uburyo ziganiriza, zifasha kandi zirinda abanyeshuri mu bidukikije bigenda bihinduka bitewe n’ikoranabuhanga, imikorere mishya n’uburyo bwo gutumanaho.

Ku bayobozi bashinzwe uru rwego, gukoresha ikoranabuhanga byonyine ntibihagije; bigomba kujyana n’imiyoborere iboneye, imyitwarire myiza n’ubudaheza, kugira ngo nta munyeshuri usigara inyuma.

Gahunda y’iyi nama igaragaza ko inshingano z’abayobozi bashinzwe abanyeshuri zigenda zirushaho kwaguka no kuba ingorabahizi.

Ibiganiro kandi bitanga umwanya wo gusangira ubunararibonye no gushaka ibisubizo byakwifashishwa mu mashuri makuru atandukanye yo muri Afurika.

Uretse ibiganiro, abitabiriye baboneyeho umwanya wo gukomeza imikoranire no guteza imbere ubufatanye hagati y’abayobozi bashinzwe abanyeshuri baturuka mu bihugu bitandukanye.

Umuyobozi w’Inama y’Ubutegetsi muri Kaminuza ya Kigali, Prof. Nshuti Manasseh, yashimiye abitabiriye iyi nama, agaragaza ko yabaye urubuga rwo kungurana ibitekerezo no kubaka icyerekezo gihuriweho ku hazaza h’ubuyobozi bushinzwe abanyeshuri muri Afurika

Yashimangiye ko imyitwarire myiza, imiyoborere myiza n’ubudaheza bigomba gukomeza kuba inkingi z’amashuri makuru.

Ku bijyanye n’ikoranabuhanga, yavuze ko nubwo ritanga amahirwe mashya mu mikoranire n’abanyeshuri, rigomba gukoreshwa rishingiye ku ndangagaciro no kubungabunga umubano w’abantu.

Prof. Nshuti kandi yagaragaje akamaro ko kwita ku mibereho myiza y’aba bayobozi bashinzwe imibereho y’abanyeshuri, abasaba gushyira imbere ubuzima bwo mu mutwe, mu byiyumvo no ku mubiri, no kubaka imiyoboro y’ubufatanye ibafasha mu nshingano zabo.

Yasabye abayobozi b’ihuriro ko bakora cyane kugira ngo ibihugu na kaminuza zititabiriye ubutaha na zo zizitabire kuko iyinama ari ingirakamaro kwiterambere rya Afurika.

Yasoje agira ati “Mu gihe dutekereza bundi bushya ku buyobozi bushinzwe imibereho y’abanyeshuri, ntabwo tuba turimo kubaka ejo hazaza h’abanyeshuri bacu gusa, ahubwo tuba turimo no kubaka ejo hazaza ha Afurika ubwayo.”

Kaminuza ya Kigali ivuga ko yabaye urubuga rwo guhuza abayobozi b’amashuri makuru bo muri Afurika, gusangira ubumenyi n’ubunararibonye no kurebera hamwe uburyo ibigo byarushaho gufasha abanyeshuri bitegura kugira uruhare mu iterambere ry’umugabane.

Umuyobozi ushinzwe imibereho y’abanyeshuri, Mukasonga Virginie