Minisiteri ishinzwe Ibikorwa by’Ubutabazi (MINEMA), yatangaje ko umushinga wo kubaka inzu 5.096 z’imiryango yasenyewe n’ibiza mu 2023 wararangiye ndetse n’inzu zamaze gutuzwamo imiryango yatoranyijwe.

Muri izi nzu zatashywe harimo 3.522 zubatswe bundi bushya, mu gihe izindi 1.574 zasanwe. Igikorwa cyatangiriye mu turere twa Ngororero na Nyabihu mu Ntara y’Iburengerazuba.

Ibi biza byabaye mu ijoro ryo ku wa 2 rishyira ku wa 3 Gicurasi 2023 byibasiriye Intara z’Amajyaruguru, Iburengerazuba n’Amajyepfo, bihitana abantu 135, inzu zirenga 2.100 zangirika igice, izindi 2.763 zisenyuka burundu.

By’umwihariko mu Karere ka Rubavu izigera ku 1.564 zirimo 855 zasenyutse burundu.

Mu nzu zavuguruwe Akarere ka Rubavu gafitemo izatujwemo imiryango 461, indi miryango 870 irubakirwa, Akarere ka Rutsiro gafite imiryango yasaniwe 381, indi miryango 435 irubakirwa ni mu gihe mu Karere ka Nyabihu imiryango 288 yasaniwe indi 710 irubakirwa.

Akarere ka Karongi na ko kari mu twashegeshwe n’ibi biza gafitemo imiryango 171 yasaniwe, indi 399 irubakirwa, Ngororero ifite imiryango 241 yasaniwe indi 255 irubakirwa mu gihe Burera ifite imiryango 32 yasaniwe indi 579 irubakirwa.

Akarere ka Muhanga gafite imiryango 141 yubakiwe naho aka Musanze ka kagira imiryango 115 nayo yubakiwe. Ibi bigaragaza ko inzu zubatswe ari 5.096 zituwemo n’abantu 25.480.

Minisitiri w’Ibikorwa by’Ubutabazi (MINEMA) Gen Maj (Rtd) Albert Murasira yatangaje ko izi nzu zose zubakiwe abaturage nyuma y’uko Umukuru w’Igihugu yari yabisezeranyije ab’i Rubavu bagizweho ingaruka z’ibiza byatewe n’umugezi wa Sebeya.

Minisitiri Gen Maj (Rtd) Murasira ati “Rubavu hari mu hashegeshwe n’ibiza, Umukuru w’Igihugu arahasura icyo gihe abasezeranya kuzabubakira, ni icyo gikorwa cyatangiye none uyu munsi tukaba tugisoje dutangira kuzitaha ku mugaragaro, abaturage bamaze kuzigeramo natwe turimo kureba ko zubatswe neza.”

“Umuturage yahuye n’ibibazo ndetse n’Igihugu cyagombaga kumutabara, ni na yo mpamvu bubakiwe inzu zikomeye zibasha kwihanganira ibiza. Ni itangiriro ntibibe iherezo, ahubwo bakore biteze imbere. Kandi kuva byaba twabakodesherezaga.”

Bamwe mu baturage bimuwe ahashyiraga ubuzima bwabo mu kaga ibyishimo byari byose.

Tuyishime Valentine wo mu Karere ka Ngororero, ati “Nari ntuye mu manegeka, mu nzu iva, narayasigayemo njyenyine, n’umugabo yari yarantaye numvaga ko nzahavanwa n’urupfu, inzu byasabye ko baza kuyimvanamo ku ngufu, barankodeshereza kugeza uyu munsi ntujwe mu nzu nziza itava.”

Iribagiza Fatuma Olive ati “Ntabwo nari narigeze ndota gutura mu nzu nk’iyi, inzu twayivanwemo yamaze kutugwaho ariko nta wapfuye, badukodeshereza inzu imyaka ibiri n’igice, kugeza izo batwubakiye zuzuye baza kuzidutuzamo. Abana bararyama bagasinzira kuko tutakiri mu manegeka.”

Akarere ka Ngororero kari mu twatangirijwemo gahunda yo gutaha inzu z’abahuye n’ibiza, imiryango 255 yubakiwe inzu indi miryango 241 isanirwa inzu, kandi bose baratuye.

Ab'i Nyabihu akanyamuneza ni kose

Bashyiriweho n'imirindankuba mu guhangana n'ibiza by'inkuba

Minisitiri w’ibikorwa by’ubutabazi (MINEMA) Gen Maj (Rtd) Albert Murasira yashyikirije abaturage basenyewe n'ibiza mu Ngororero ubutumwa bw'Umukuru w'Igihugu

Abaturage bubakiwe inzu zikomeye

Ab'i Nyabihu akanyamuneza ni kose