U Rwanda n’u Bubiligi byatangaje ko byafashe icyemezo cyo gusubukura umubano ushingiye kuri dipolomasi, nyuma y’ibiganiro byabayeho hagati y’impande zombi mu bihe bitandukanye ndetse byemeranya ko Ambasade ku mpande zombi zizongera gufungurwa mu gihe cya vuba.

Ibi bikubiye mu itangazo rihuriweho ryashyizwe ahagaragara ku wa 22 Nzeri 2026 na Minisitiri w’Ububanyi n’Amahanga n’Ubutwererane w’u Rwanda, Amb. Olivier J.P. Nduhungirehe, na Visi Minisitiri w’Intebe akaba na Minisitiri w’Ububanyi n’Amahanga, Ibikorwa by’u Burayi n’Ubutwererane Mpuzamahanga w’u Bubiligi, Maxime Prévot.

Ibihugu byombi byatangaje ko iki cyemezo cyafashwe hashingiwe ku ngingo ya kabiri y’Amasezerano y’i Vienne agenga umubano ushingiye kuri dipolomasi.

Riti “Mu gihe cya vuba, ambasade y’u Rwanda mu Bubiligi n’iy’u Bubiligi mu Rwanda zizongera gufungurwa. Ku ikubitiro, buri Ambasade izayoborwa by’agateganyo na Chargé d’Affaires, afatanyije n’umudipolomate cyangwa consul ndetse n’itsinda rito ry’abakozi ba tekiniki.”

Nyuma hazatangwa ubusabe bwo kwemeza ba Ambasaderi bashya, mu rwego rwo gusubukura byuzuye ibikorwa bya dipolomasi.

Ambasaderi w’u Rwanda mu Bubiligi azaba anashinzwe umubano n’Umuryango w’Ubumwe bw’u Burayi.

Itangazo rivuga ko mu biganiro byabaye mu bihe bitandukanye baaganiriye mu buryo bwubaka ku ngingo zitandukanye zari zarateje kutumvikana no kutabona ibintu kimwe hagati y’impande zombi.

Ku wa 17 Werurwe 2025 ni bwo u Rwanda rwari rwafashe umwanzuro wo guhagarika umubano warwo mu bya dipolomasi n’u Bubiligi, runategeka Abadipolomate b’iki gihugu kuba bavuye ku butaka bwarwo mu gihe kitarenze amasaha 48.

U Rwanda rwavuze ko rwari rwawufashe nyuma yo kubyigana ubushishozi mu ngeri zose, bitewe n’imyitwarire y’u Bubiligi ya gikoloni.

U Rwanda n’u Bubiligi byashimiye ubuyobozi bwa Leta ya Qatar, bwagize uruhare mu korohereza inama ya mbere yahuje aba Minisitiri bombi, yabereye i Doha muri Kamena 2025.

Ibihugu byombi kandi byashimangiye ubushake bwo gukomeza ibiganiro bivugisha ukuri kandi biboneye, "nubwo byemera ko hakiri ibibazo bimwe byo ku rwego mpuzamahanga bitumva kimwe"

Ibihugu byombi byemeranyije ko umubano wabyo mu gihe kiri imbere ugomba gushingira ku mahame avuguruye arimo ko igihugu kitagomba kwivanga mu bibazo bya kigenzi cyacyo, kubahana no gukorana mu buryo bwubaka.

Ambasade y'u Bubiligi mu Rwanda iri mu mujyi rwagati hafi y'iy'u Bushinwa

Ambasade y'u Bubiligi mu Rwanda yari imaze igihe kirenga umwaka n'igice ifunze ndetse amabendera barayamanuye

Abadipolomate b'u Bubiligi bakoreraga mu Rwanda bari barasubiye iwabo

Iki kirango cyo ku muryango ni cyo rukumbi cyari kihasigaye kiranga ko ari kuri Ambasade y'u Bubiligi

Uretse ikirango cyo ku muryango nta kindi kimenyetso cyashoboraga kwereka utahazi ko ari kuri ambasade y'u Bubiligi