IGIHE

RALSA yamuritse inyandiko zihariye zibitse amateka y’u Rwanda

1 12-06-2018 - saa 15:10, Iradukunda Desire

Ikigo cy’Igihugu Gishinzwe ishyinguranyandiko, RALSA, cyamurikiye Abanyarwanda inyandiko zitandukanye zibumbatiye amateka y’u Rwanda, gisaba ko barushaho kuzibyaza umusaruro ngo bashire amatsiko ku mateka y’iki gihugu binyuze mu nyandiko zo hambere.

Ni mu muhango wabaye ku wa 9 Kamena 2018 ubwo hizihizwaga umunsi mpuzamahanga wahariwe inyandiko ku Isi hose, ukaba ari ubwa mbere wari wizihijwe mu Rwanda.

Umuyobozi w’agateganyo w’Ikigo cy’Ishyinguranyandiko, Uwineza Marie Claude, yagaragaje ko bafite interamatsiko nyinshi zagakwiye gukurura Abanyarwanda bakajya gusura iki kigo, dore ko abagisura bakiri bake.

Yagize ati “Dufite ibikurura abantu byinshi nko kubona ifoto ya Kigali yo mu 1918, umuntu ashobora kwibaza ati Kigali yari imeze ite icyo gihe ko nyibona muri 2018 imeze itya, wasanga abantu mu isoko uyu munsi, ushobora kwibwira ko n’icyo gihe ariko byari bimeze.”

“Kumva ngo mu 1918 abantu baremaga isoko, ese babaga bazanye iki, dufite n’amaraporo yo mu gihe cy’ubuyobozi bwa gikoloni. Buriya muri ariya maraporo iyo ugize umwanya ukicara ubonamo ibintu byinshi.”

Uwineza yakomeje avuga ko mu nyandiko zitandukanye, babitse mu buryo bw’ikoranabuganga cyangwa mu nyandiko z’umwimerere, amateka menshi ahuje n’ibihe u Rwanda rwagiye runyuramo nk’ibiza, indwara n’ibindi.

Yavuze ko kuba hari abashobora gutekereza ko kubika inyandiko ntacyo bimaze atari byo, atanga urugero rwo mu nkiko aho biba ngombwa ko bakoresha inyandiko y’umwimerere.

Impuguke mu mateka, Prof Bushayija Antoine, yashimangiye ko kubika inyandiko z’umwimerere bifite akamaro cyane cyane ku bashakashatsi n’abanyeshuri, atanga urugero rw’uko ubwo yakoraga ubushakashatsi yakoresheje ishyinguranyandiko ryo mu Bubiligi.

Icyo gihugu kinabitse amakuru menshi k’u Rwanda arimo ayo ruheruka kugisaba ku nyigo n’ubushakashatsi cyakoze ku mabuye y’agaciro muri iki gihugu.

RALSA ifite amashami abiri ariyo Ishyinguranyandiko na Serivise z’Inkoranyabitabo. Yombi ashinzwe kurinda inyandiko n’ibindi bihangano bibumbatiye amateka, ubumenyi n’umurage w’ubwenge bw’Abanyarwanda.

Ivuga ko ifite inyandiko zitandukanye ibitse kandi zibumbatiye amateka y’u Rwanda, isaba Abanyarwanda kuyigana mu rwego rwo kwiga no gukora ubushakashatsi ku mateka y ‘u Rwanda.

Aya ni amakarito abitse inyandiko z'umwimerere
Iyi karita yerekana uko uduce two mu Rwanda rwo hambere twitwaga
Umuyobozi wa RALSA, Uwineza Marie Claude asobanura uko babona inyandiko zibitse amateka bakazishyingura
Prof Bushayija yasobanuye ko kubika inyandiko bigirira akamaro abashakashatsi
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kalisa 2018-06-13 01:30:58

Thank you RALSA for such great event that you conducted ever since the you started, hope it is going to an annual event; this will highlight the importance of archives in the life of our country.

If possible next time, invite archivists to share views on the way forward for archives in the country and celebrations as well.

Kwamamaza