IGIHE

Yandika amagambo 100 buri munsi: Ibyihariye ku Munyafurika wegukanye igihembo cy’ubwanditsi muri Commonwealth

0 23-06-2022 - saa 08:18, Ntabareshya Jean de Dieu

Umwanditsi w’Umunyafurika ukomoka muri Eswatini, Nstika Kota ni we watsindiye igihembo gitangwa buri mwaka na Commonwealth mu rwego rwo guteza imbere ubwanditsi muri uyu muryango.

Iki gihembo gitangwa buri mwaka aho abaturutse mu bihugu 54 biyandikisha bakarushanwa ku nkuru ngufi banditse, uwo bigaragaye ko afite umwihariko akazahiga abandi.

Ni ibihembo bihera ku rwego rw’umugabane utsinze agakomeza ku rwego rwa Commonwealth. Muri uyu mwaka hahembwe abanditsi batandatu ari bo Nstika Kota wo muri Eswatini muri Afurika na Sofia Mariah Ma wo muri Singapore muri Aziya.

Umwanditsi wahize abandi ku mugabane w’u Burayi na Canada ni Cecil Browne wo mu Bwongereza, Umunya-Jamaica Diana Mccaulay muri Caraïbes n’Umujya-Fiji Mary Rokonadravu muri Pacifique.

Aba bahembwa amayero 2500 yo kubafasha gukomeza kwagura impano zabo, gukomeza gukuza umwuga w’ubwanditsi ndetse no kurushaho kuwishimira.

Uwegukanye igihembo gikuru ni Umunya-Eswetini, Ntsika Kota, akaba ari we Munyafurika wa mbere wanditse ayo mateka.

Mu kiganiro na IGIHE, Kota yagarutse ku buzima bwe n’imibereho muri Eswatini, yemeza ko yatangiye kwiyumvamo kwandika mu 2018 ariko akaba abikora kubera urukundo rwo kwandika kuko ubusanzwe yize Ubutabire.

Ati “Narangije kwiga ntekereza ko nkwiye kurushaho kubyaza umusaruro impano yanjye yo kwandika aho gutegereza akazi. Ntabwo nabyize ahubwo ni impano yanjye. Nkunda kwandika ni na yo mpamvu ibyo byose mbigeraho.”

Kota avuga ko mu rwego rwo gukomeza kuzamura impano y’ubwanditsi yihaye intego ko nibura buri munsi yandika amagambo 100.

Ati “Nibyo ntabwo nsanzwe ndi umwanditsi, mbiterwa n’urukundo.Ubuhanga mu kwandika buva mu gusoma ibitabo byinshi. Akenshi nakunze gusoma ibitabo bya Chinua Achebe na Ngugi wa Thiong’o bikanyereka ubuhanga burimo mu myandikire nanjye nkifuza kwandika nka bo. Ibyo byatumye niha intego yo kwandika amagambo nibura 100 buri munsi kugira ngo kwandika bibe ubuzima bwanjye.”

Ntsika Kota ni we wahize abandi banditsi b'inkuru ngufi

Nstika Kota w’imyaka 29 yemeza ko gutsinda muri aya marushanwa ari andi mahirwe abonye yo kugaragaza ko Abanyafurika bashoboye aho guhora bumva ko badafite ubushobozi bwo guhangana ku rwego mpuzamahanga.

Kugeza ubu nta gitabo na kimwe arasohora ahubwo avuga ko yifuza gukomeza uyu murimo ku buryo bimushobokeye yasohora bimwe mu byo yamaze kwandika.

Ubusanzwe aya marushanwa yari yitabiriwe n’abanditsi basaga ibihumbi bitandatu bo mu bihugu bitandukanye bigize Commonwealth harimo n’Abanyarwanda.

Ubaye uwa mbere muri aya marushanwa yegukana igihembo cy’amayero 5000 (arenga miliyoni eshanu z’amafaranga y’u Rwanda), ari na yo yahawe Nstika Kota wahembewe i Kigali mu nama y’ihuriro ryita ku iterambere ry’abaturage rya People’s Forum ishamikiye kuri CHOGM 2022 iri kubera i Kigali.

Inkuru ngufi Nstika yanditse yayihaye umutwe ugira uti “And the earth drank deep”.

Umuyobozi Mukuru wa Commonwealth Foundation, Dr Anne Gallagher, yavuze ko intsinzi ya Nstika yibutsa abantu bose ko kwandika no kubara inkuru buri wese abifitiye ubushobozi.

Ati “Twese dufite imbaraga zidasanzwe zo kuvuga inkuru turamutse tubonye urubuga rwo kubisohora. Igihembo gifite ubushobozi budasanzwe bwo kuvumbura impano nshya.”

Inkuru zihatana muri aya marushanwa zishobora kwandikwa mu Cyongereza, Igifaransa, Ikigereki, Igi-Portugal, Igiswahili n’izindi uretse ko uwatanze inkuru ashobora no kuyihindura mu rurimi rw’Icyongereza.

Umuyobozi Mukuru wa Commonwealth Foundation, Dr Anne Gallagher yaganiraga n'Umuyobozi Mukuru w'urwgo rw'igihugu rushinzwe imiyoborere RGB, Dr Usta Kayitesi
Abayobozi batandukanye bari bitabiriye iki gikorwa
Muri ibi birorori itorero inganzo ngari ni ryo ryasusurukije ababyitabiriye
Abatsinze ku rwego rwa buri Mugabane

Amafoto: Yuhi Augustin

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza