IGIHE

Inkomoko y’insigamugani “Yigize nyiranzakaha”

4 30-07-2019 - saa 09:14, Nsanzabera Jean de Dieu

Uyu mugani bakunda kuwucira ku muntu w’igitsina gore wigize (bamenya) y’iby’aha n’aha; ni we bavuga ngo (Yigize Nyiranzakaha!) iyo ari igitsina gabo bavuga “Bamenya”.

Wakomotse ku muja wa Rugaju witwaga Mupfasoni, wo mu Bibungo bya Mukinga (Gitarama); ahasaga umwaka wa 1800.

Izina rya Nyiranzakaha si irya se, ahubwo ni irihimbano. Ubundi yitwaga Mupfasoni, akaba umuja wa Rugaju rwa Mutimbo; wa mutoni w’akadasohoka wa Yuhi Gahindiro. Se wa Mupfasoni yari umugaragu wa Mutimbo. Uwo mukobwa abana na Rugaju bakiri abana; barareranwa baragirana inyana barakurana. Bukeye Rugaju ahakwa n’ibwami ariko ahijyanye; nta wamushohoje! Aratona aba umutware w’akadasohoka.

Nuko amaze kuba umutware birambuye yibuka wa mukobwa Mupfasoni. Aramutumiza aramushyingira. Umuhungu umurongoye agabana ubutware ku mpamvu ya Mupfasoni w’inshuti ya Rugaju. Mupfasoni amaze kubyara kabiri umugabo we arapfa. Rugaju amushyira iwe, ariko amurekera n’iby’umugabo we; urugo n’inka n’abagaragu. Aramutonesha cyane; umuntu wese ushaka ubuhake kuri Rugaju akabanza guca kuri Mupfasoni; n’ugize ubuhake buke yegera Mupfasoni ngo amuhakirwe bikamuhira. Arahongerwa karahava; ndetse no mu batware ba Gahindiro, uwagiraga amakuba yihutiraga kujya kwa Mupfasoni ngo amubwirire Rugaju amumuhakirweho.

Umuntu yamubaza uko Rugaju amumereye, Mupfasoni, ati “Ndabizi humura nzabikumarira’’. Ni bwo abahungu bamuhinduye Nyiranzakaha. Ariko bakabivuga rwihishwa kugira ngo atabimenya bikabagwa nabi.

Bukeye aho Rugaju agiriye amakuba, ariko bigihwihwiswa mu rwihisho ibwami bareshya Mupfasoni baramujyana ngo ababwire neza ibya Rugaju. Ageze ibwami akajya abamenyesha uko ameze kugeza igihe bamutangiye. Amaze gupfa, ibwami bahindukirana Nyiranzakaha; bati “Na we ntakwiye gusigara’’. Baramutanga. Rubanda rubyumvise bariyamirira, bati “Nyiranzakaha apfanye nashebuja Rugaju!’’.

Nuko bisakara igihugu cyose, biturutse kuri Mupfasoni wari warihaye kumenyera Rugaju ibihwihwiswa aha na hariya. Kuva ubwo rero, ushatse kumenya ibintu byose by’aha na hariya, na we bakamugereranya na Mupfasoni, bati “Naka uriya cyangwa nyiranaka yigize Nyiranzakaha!’’

-Kuba nyiranzakaha ( = nyira-nzi-akaha) = Kwigira bamenya w’ibintu byose.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Inkomoko 2019-08-19 09:25:47

Murakoze nukuripee turabakunda

2
Gasaro 2019-07-30 15:42:10

Nkunda inyigisho nkizi. @igihe, mu mwanya wo kudushyiriramo injury zibabaje, cyangwa se ubw’abantu barya imisumari n’inzembe, mujye murushaho kutwigisha amateka n’umuco nibyo bifite ingirakamaro. Iriya foto mwashyizeho itumye ntekereza ukuntu mu bihe bya kera abantu bakuraga bakanasaza neza nta bibazo by’umubyibuho ukabije cyangwa se ze cholesterol.

3
nope 2019-07-30 06:32:01

Ibi ni ibyo wowe Nsanzabera wihimbiye. Hari abantu bibeshya ko kwihimbira amateka bibagira impuguke mu mateka.

4
muhire donatien 2019-07-30 05:12:04

muba mwatugereye aho tutari

Kwamamaza