IGIHE

Inkomoko y’Insigamugani “Hapfuye nyagupfa”

5 28-08-2019 - saa 09:32, Nsanzabera Jean de Dieu

Uyu mugani bawuca bakurikije ubukene bw’umuntu cyangwa ibyago akunda kwiharira kurusha abandi. Iyo byiyongeramo ibindi, ni ho bavuga ngo “Hapfuye Nyagupfa” ; kuko yari abisanganywe, ibindi bikaza ari insongerezi gihuhura.

Wakomotse kuri Rusine rwo mu Nkobwa za Gishike h’i Nyabisindu (Butare); ahasaga umwaka w’i 1400.

Rusine uwo yari umubanda ukomoka kwa Mashira; yari umukire cyane, afite amatungo n’abagaragu. Yari afite n’abagore batatu: Mukankebya, Mukamugenza n’Uwera. Bose bari barabyaranye.

Umuhungu we w’imfura yabyaranye na Mukankebya yitwaga Nyagupfa. Uwo mwana akurana ubudabagizi kuko nyina yari inkundwakazi. Amaze kuba umusore bamusohoza ibwami. Ajyana injyishywa nyinshi kuko nyina yari inkundwakazi. Agezeyo ajya mu itorero hamwe n’abandi, ariko iby’itorero biramuyobera. Inka yajyanye azadukamo arazigaba. Abandi bagumya kumwogeza ngo agira ubuntu; na we arashyekerwa arazitsemba.

Bukeye umugaragu mukuru bamuhaye abonye ko inka zimushiranye, yibaza uko azabibwira Rusine; ati “Nzavuga ko yazitanze mba he ?” Ariko ku bwa mbuze uko ngira aragenda atekerereza Rusine ko umuhungu we yamaze inka aziha bagenzi be.

Rusine atuma undi mugaragu kuri Nyagupfa, ati “Genda umumbwirire aze anyitabe vuba; kabone ndetse n’aho bamwangira azaze icyaha kizabe icyanjye”. Intumwa iragenda; ariko igenda Mukankebya yarakariye wa mugaragu wabivuze kuko yamuregeye umwana, umugaragu batumye agitirimuka; Mukankebya ahamagara Rusine aramubwira, ati “Abagaragu bawe batangiye kunyangira umwana nk’uko banyanganye n’abagore bawe”. Igituma yavugaga atyo ni uko uwo mugaragu wareze Nyagupfa atari uwo mu rugo rwa Mukankebya.

Rusine aramusubiza, ati “Ihorere, ntibigoranye niba bamubeshyera nzabona inka zanjye”. Umugaragu watumwe agarukana na Nyagupfa. Bageze mu Nkobwa, se amubaza Mukankebya ari aho, ati “Inka zanjye ziri aho ?” Nyagupfa, ati “Nta bwo nziheruka nazitanzeho Ubuntu”.

Mukankebya abyumvise akubitwa n’inkuba, araturika ararira, ati “Nari nzi icyo abakeba bazankorera, barampize none baranshyikirïye !”. Rusine abwira Nyagupfa, ati “Guma aha uzajya undagirira izisigaye”.

Nuko Rusine ajya gusohoza undi mwana witwa Makaka, na we Nyagupfa ayoboka mu nka. Ari ko no kuziragira biramuyobera; rubanda rwo mu Nkobwa rutangira kumukwena. Bukeye Rusine araga abana be bose; abaha inka; Nyagupfa we ntiyamuha n’impomarutaro kuko umunani we yawupfushije ubusa; abandi baratunga baratunganirwa.

Nyagupfa rero amaze kubura umunani mu nka, atangira kuraragira no kuraraguza; akajya arara aho abonye bigeze ubwo arwara amavunja aramwarika. Akomeza kuyadogagirana, ageze ahitwa i Gihara cya Mwogo mu bantu atazi, amavunja amufatanya n’uruhato aramwivugana.

Iyo hakaba umuntu waturutse iwabo mu Nkobwa, arabimenya asubira yo ajya kubikira Rusine. Inkuru isakara mu Nkobwa; uhuye n’undi akamubaza ati “Mwene Rusine wapfuye ni nde ?” Undi ati “Hapfuye Nyagupfa”. Uwabazaga, ati “N’ubundi yari yarapfuye, byabaye guhuhuka”. Iyo nkuru mbi irakorerana igera kuri Mukankebya, ayumvise ishavu n’agahinda biramwegura ariyahura.

Ni yo mpamvu ituma iyo babonye umuntu ufite ibyago bitamusibaho bamwita “Nyagupfa”. Naho yaba apfuye adafite akamaro, bati “Hapfuye Nyagupfa”.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
JBson 2019-10-17 04:53:03

Mwakoze kuri iyi nsigamugani yapfuye nyagupfa. Ariko nifuza ko mwazatubwira ahakomotse imvugo ngo " ibintu cg se ubuzima ni gatobe gatoki" niba atari ubuzima ni gatebe gatoki nkuko bamwe ariko babivuga.
Murakoze cyane

2
Rwangabwoba Jean 2019-10-01 02:12:12

Murakoze cyaneee! Nbaikunze pe! Twose nadusomye turaryoshye! Ntituzongera kuncaho! Nimukomerezaho!
Najyaga mbona insigamigani nabyo sinumve icyo bivuze kubera amateka yatumye bamwe muri twe tutamenya neza ururimi rwacu!

3
JULIEN 2019-09-09 11:14:07

Murakoze cyane. ubutaha muzatubwire nyakamwe ntavumba mu bakara inkomoko n’ubusobanuro.Murakoze

4
Patrick 2019-08-29 06:09:04

Muraho, bibaye byiza nibura buri
cyumweru muge mudushyiriraho insigamugani imwe.

5
umusomyi sarah 2019-08-29 02:37:28

Utu tuntu kudusoma dufite akamaro, najyaga nducaho ariko sinzongera

Kwamamaza