IGIHE

Inkomoko y’Insigamugani: Baramugera amajanja!

6 20-09-2018 - saa 15:32, Nsanzabera Jean de Dieu

Uyu mugani bawuca iyo bamenye uri mu makuba ariko bataramufata bakimunuganuga; ni bwo wumva bahwihwisa mu magambo bati “Baramugera amajanja”.

Wakomotse ku ijambo rya Bituganyi, mu miburo y’ifatwa rya Rugaju rwa Mutimbo wari umutoni w’akadasohoka kwa Yuhi Gahindiro.

Yuhi Gahindiro yakunze Rugaju cyane kuva mu bwana, aramutonesha by’akadasohoka amugabira ibye byose. Ubwo butoni nk’uko bisanzwe mu bakomeye, Rugaju yabugizemo abanzi n’abakunzi.

Mu banzi be haje kuvamo babiri bamutinyutse bamwanga ku mugaragaro barimo Bituganyi na Ruhwenya. Abandi bamwangaga rwihishwa batinya ko yabicisha kuri Gahindiro kuko nta cyo yamusabaga ngo akimwime.

Byaje kugera igihe Gahindiro aratanga, hima umuhungu we Rwogera. Amaze kwima, rubanda rushoka ruvuga ko se yarozwe na Rugaju, ibwami batangira kumwanga bashaka kumutanga ariko barabitinya kuko yari afite amaboko cyane.

Icyakora ntibabitinye ngo baterere iyo, bakomeje gusirisimba; abapfumu bagahora ku muti baraguriza gufata Rugaju.

Byageze aho inzuzi zirera, abahungu barabimenya kuko bose bari bafite ishyushyu ryo kubona ifatwa rya Rugaju w’igihangange.

Bajyaga biherera, bamwe bati “Nta rutajya rwaba Rugaju bagiye kumwica” abandi bati “Nta cyabasha Rugaju mu Rwanda”. Bituganyi na Ruhwenya bakabaseka bati “Rugaju turamugera amajanja none ngo nta cya mubasha?

Babivuze batyo abahungu bariyamirira bati “Koko turamugera amajanja”. Bikomeza kuvugwa bityo ibwami bakimuresaresa bagira ngo babanze kumumaraho amaboko bazabone ubumufata bitabagoye.

Bamaze kwigarurira ingabo ze mu cyayenge baramutinyuka, ashengereye ibwami bamuha abashinja b’ibinyoma kuko nta we ibwami batangaga atabanje kuregwa ngo aburane namara gutsindwa abone gutangwa.

Nuko indamutsa imaze kuramutsa, umwami ateka mu twicarabami. Imanza ziratangira, bahamagara abashinja barega Rugaju ko ari we waroze Gahindiro.

Ubwo Rugaju byemezwa ko ari we waroze Gahindiro. Abahari bose batera hejuru bati “Ntibabeshya ni we waroze Gahindiro”. Arafatwa arabohwa. Bituganyi amusaba ibwami kumurarana, baramumuha amujyana iwe. Bageze iwe ashaka abantu bafata amaganga bayavugisha umutsima barawumuha. Arawakira arawurya. Ubwo ni bwo yavuze rya jambo, ati “Uyu mutsima wo kwa Bituganyi ni impingane”.

Iryo jambo ni ryo ryabaye umugani w’umugenurano bacira ku kintu kiruhije bagira bati “Ni impingane nk’umutsima wo kwa Bituganyi”.

Rugaju arara aho ku ngoyi buracya, mu gitondo Bituganyi amusubiza ibwami uko yakaboshye. Amutungukanye ku Karubanda aho abahungu bateraniye ariyamira ati “Bahungu sinababwiye ko tumugera amajanja”. Abahungu bariyamirira baraseka; bati “Wabivuze imvaho”.

Nuko iryo jambo rya Bituganyi ryamamara mu Rwanda, kuva ubwo aho umuntu uri mu makuba ashayishije ariko atarafatwa cyangwa atarahanwa bakarimwibukiraho bagira ngo “Baramugera amajanja”. Kugera amajanja= Gushakashaka amayeri yo gushobora ikiruhije.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Mutimbo 2018-10-23 14:41:09

Ibi ni ibyo Nsanzabera apfundikanya, ahimbahimba. Iby’umutsima wo kwa Bituganyi, Rugaju yawuhawe bavuye guhiga, kandi Gahindiro yari akiriho.

Ikindi kandi nta nsigamugani ibaho ivuga ngo, "Baramugera amajanja". Ihari ni ivuga ngo, "Urupfu ruramugera amajanja".

Nsanzabera ajye kandi avuga aho akura ibyo ashyira mu nyandiko ze. Kuko ibyinshi biri hano ari ibyo yakuye mu gitabo cyitwa Ibirari by’Insigamigani.

2
Maburakindi 2018-10-17 09:41:59

Ntangazwa cyane n’uburyo hogagizwa ubugome, ubugambanyi,kubeshyera abandi kandi bigafatwa nk’umuco utagomba kwamaganwa. Ko ari ibyakera se ariko nk’abona n’ubu bitaracika. Ngaho da, ibyo se na byo ni abakoloni babizanye? Kamere ntikurwa na reka kandi akabaye icwende....

3
NIYONGABO Jasper 2018-10-17 09:31:48

Murakoze
Muzadushakire ubusobanuro bwa ntiribara umukuru nkumuto wariraye

4
laurent 2018-10-09 01:35:20

murakoze bavandimwe, twajyaga tuvuga muri refectoire ngo kawunga batetse nimpingane tutazi nicyo bivuga naho burya numutsima uvanze namaganga wo kwa bituganyi. merci beaucoup.

5
Dan 2018-09-21 08:38:28

Andika hano urakoze cyane uzadushikire umugani bavuga ngo yaje ikubagahu icyobize.

6
mukasa 2018-09-21 04:04:37

uyu ntamugani urimo

Kwamamaza