IGIHE

Imiryango yahamije ubuhangange mu mateka y’u Rwanda: Igicumbi cy’uwa Rwakagara (Igice cya kabiri)

5 15-12-2019 - saa 17:00, Nsanzabera Jean de Dieu

Mu mateka y’abakurambere mpangarwanda, hari imiryango yagiye ihamya ibigwi n’ibirindiro, ikagira amavugwa ku bw’ibigwi n’ibirindiro babaga barakoreye igihugu, hagati mu muryango mugari bakomokamo. Ni imiryango yagiye igira amaboko akomeye kubera kugira abantu benshi kandi bagwije ubugabo igitinyiro n’ubuhangange.

Iki ni igice cya kabiri gikurikira icyo twabatekerereje ku mateka y’igicumbi cy’umuryango mugari ufite inkomoko kuri Rwakagara rwa Gaga. Iki ni igice gikurikiraho mu bindi bizibanda mu kubatekerereza imbumbe y’imiryango migari yabayemo ibihangange ikanagira n’inzu zikomeye mu mateka y’u Rwanda.

Nk’uko tubikesha ibitabo “Iyororoka ry’Abanyarwanda, inkomoko y’imiryango migari ’’ n’icyitwa “Intwari z’imbanza zubatse u Rwanda rugahamya igitinyiro’’ by’Umusizi Nsanzabera Jean de Dieu, inzobere mu Busizi, umuco n’amateka y’u Rwanda, tugiye kwinjira mu muryango mugari w’abakomoka kwa Rwakagara, mu mavu n’amavuko yawo n’inzu z’ibihangange zawukomotseho.

Tugiye gusubukurira aho twagereje ubushize, tubabwira ibigwi n’ibirindiro by’igicumbi cy’umuryango wa Rwakagara, wahamije ibigwi n’ibirindiro mu mateka y’u Rwanda.

Mu bandi bibukwa mu bihe bya vuba bo mu muryango wa Rwakagara, ntitwabura kuvugamo Rwubusisi rwa Cyigenza cya Rwakagara, wari umwuzukuru wa Rwakagara, wari ingabo ihamye ku Ngoma y’Umwami Yuhi Musinga, akamufasha guhamya ubutware bwe mu Rwanda ubwo yafataga Basebya ba Nyirantwari wari warigometse ku ngoma ya Musinga.

Mu muryango mugari w’Abega bo mu nzu ya Rwakagara, hanavuyemo abatware benshi batwaye imisozi itandukanye yo mu Rwanda.

Muri bo twavuga:

1. Nyarwaya ya Rwesa rwa Ruterambuku rwa Gaga, wari umwuzukuru wa Rwakagara kwa se wabo watwaraga Susheferi ya Nduba muri Sheferi ya Bwanacyambwe muri Teritwari ya Kigali.

2. Rwabutogo rwa Kabare ka Rwakagara, wari umwuzukuru wa Rwakagara, watwaraga muri Sheferi y’u Buganza bw’Iburasirazuba muri Teritwari ya Kibungo, mu bihe by’Ingoma ya Musinga mu 1926.

3. Rutaremara rwa Kayondo ka Mbanzabigwi bya Rwakagara, wari Umwuzukuruza wa Rwakagara watwaraga muri Susheferi ya Gikongoro muri Sheferi ya Bufundu muri Teritwari ya Astrida.

4. Rwakayiru kwa Nyirinkwaya ya Giharamagara cya Rwakagara wari Umwuzukuruza wa Rwakagara watwaraga muri Susheferi ya Zivu muri Sheferi ya Mvejuru muri Teritwari ya Astrida.

5. Ngarambe ya Sengati ya Rwabanda rwa Nyamushanja wa Rwakagara, wari Umwuzukuruza wa Rwakagara, watwaraga Susheferi ya Rubavu muri Sheferi ya Bugoyi muri Teritwari ya Gisenyi.

6. Rwigema rwa Sengati ya Rwabanda rwa Nyamushanja wa Rwakagara, wari Umwuzukuruza wa Rwakagara, watwaraga Susheferi ya Cyanyanza muri Sheferi ya Budaha muri Teritwari ya Gisenyi.

7. Rwabuyonza rwa Nkubamiheto ya Giharamagara cya Rwakagara wari Umwuzukuruza wa Rwakagara, watwaraga Susheferi ya Ngobagoba muri Sheferi ya Budaha muri Teritwari ya Gisenyi.

8. Nyirakabuga ka Cyigenza cya Rwakagara wari umwuzukuru wa Rwakagara, watwaraga Susheferi ya Vumwe muri Sheferi y’i Gihunya muri Teritwari ya Kibungo.

9. Gakirage ka Nyakayiru ka Cyigenza wari umwuzukuru wa Rwakagara, watwaraga Susheferi ya Gasetsa muri Sheferi y’i Gihunya muri Teritwari ya Kibungo.

10. Rwubusisi rwa Cyigenza cya Rwakagara, wari umwuzukuru wa Rwakagara, watwaraga Susheferi ya Murambi muri Sheferi y’u Buliza muri Teritwari ya Kigali.

11. Rwabuyonza rwa Nkubamiheto ya Giharamagara cya Rwakagara, wari umwuzukuruza wa Rwakagara, watwaraga Susheferi ya Ngobagoba muri Sheferi ya Budaha muri Teritwari ya Gisenyi.

12. Gisagara cya Munyakigeli cya Mbanzabigwi bya Rwakagara, wari umwuzukuru wa Rwakagara, watwaraga Susheferi ya Kinyinya muri Sheferi ya Bwanacyambwe muri Teritwari ya Kigali.

13. Kanobana ka Rwubusisi rwa Cyigenza cya Rwakagara, wari uwuzukuru wa Rwakagara, wari umwuzukuruza wa Rwakagara watwaraga Susheferi ya Muhororo muri Sheferi y’u Buliza muri Teritwari ya Kigali.

14. Hitiyise ya Rwabutogo rwa Kabare ka Rwakagara, wari umwuzukuruza wa Rwakagara, watwaraga Susheferi ya Rwamagana muri Sheferi y’u Buganza bw’Amajyepfo muri Teritwari ya Kibungo.

15. Ngoga ya Kanimba ka Karubambana rwa Giharamagara cya Rwakagara, wari ubuvivi bwa Rakagara, watwaraga muri Susheferi ya Nyanza-Juge muri Sheferi ya Amarangara muri Teritwari ya Nyanza.

16. Karinganire ka Karushoza ka Giharamagara cya Rwakagara wari umwuzukuruza wa Rwakagara, watwaraga muri Susheferi ya Shaki muri Sheferi ya Ndiza muri Teritwari ya Nyanza.

17. Bangambiki cya Nyantabana ya Kabare ka Rwakagara, wari umwuzukuruza wa Rwakagara, watwaraga muri Susheferi ya Mbuye muri Sheferi ya Nduga muri Teritwari ya Nyanza.

18. Nkubito ya Mwikarago ya Rwabanda rwa Nyamushanja wa Rwakagara, wari Ubuvivi bwa Rwakagara watwaraga muri Susheferi ya Rwesero muri Sheferi y’u Busanza bwa Ruguru muri Teritwari ya Nyanza.

19. Karuretwa ka Mwikarago ya Rwabanda rwa Nyamushanja wa Rwakagara, wari Ubuvivi bwa Rwakagara, watwaraga muri Susheferi ya Mushishiro muri Sheferi ya Amarangara muri Teritwari ya Nyanza.

20. Gashagaza ka Sekaryongo rya Rwibishenga bya Rwakagara, wari umwuzukuruza wa Rwakagara, watwaraga muri Susheferi ya Sogwe muri Sheferi y’u Busanza bwa Ruguru muri Teritwari ya Nyanza.

21. Naho ya Sebwayi bwa Nyamushanja ya Rwakagara, wari umwuzukuruza wa Rwakagara watwaraga muri Susheferi ya Kanyarira muri Sheferi ya Amarangara muri Teritwari ya Nyanza.

22. Mbaraga za Mwikarago ya Rwabanda rwa Nyamushanja wa Rwakagara, wari Ubuvivi bwa Rwakagara watwaraga Susheferi ya Kinunu muri Sheferi ya Kanage muri Teritwari ya Gisenyi.

23. Rutemesha rwa Rugemera rwa Nyamushanja ya Rwabugili, wari umwuzukuruza wa Rwakagara watwaraga Susheferi ya Kiruli muri Sheferi y’Akabagali muri Teritwari ya Nyanza.

24. Ntunda ya Nyirinkwaya ya Giharamagara cya Rwakagara, wari umwuzukuruza wa Rwakagara watwaraga Susheferi ya Mutakara muri Sheferi y’u Bunyambilili muri Teritwari ya Nyanza.

25. Fundi ya Rwagataraka rwa Rwidegembya rwa Rwakagara, wari umwuzukuruza wa Rwakagara, watwaraga Susheferi ya Gishyita muri Sheferi ya Rusenyi- Itabire muri Teritwari ya Cyangugu.

Kubera ubuhangange, ibigwi n’ibirindiro bahamije mu mateka y’u Rwanda, abakomoka mu muryango wa Rwakagara, bubatse inzu ikomeye cyane ikomoka mu muryango mugari w’Abega.

Abahungu be bose uko ari 15, biyomoye ku nzu se Rwakagara akomokamo y’Abega b’Abagaga, barema inzu yabo y’igikonyozi, yitwa “Abega b’Abakagara’’ imwe mu nzu ikomeye yo mu Bega mu zabayeho mu mateka y’u Rwanda igizwe n’abantu benshi bakomeje kororoka no kugwiza ubuhangange, kugaragaza ubushobozi bwo kubaka igihugu no kukirinda.

Kugeza ubwo aya mateka yandikwaga mu 2019, benshi mu bakomoka mu nzu yo kwa Rwakagara, bari biganje mu buyobozi bw’ingabo z’igihugu no mu yindi mirimo y’ikirenga y’igihugu. Ubwo aya mateka yandikwaga kandi, u Rwanda rwari ruyobowe n’umwe wo mu nzu y’Abakagara, ariwe : Kagame ka Rutagambwa rwa Kampayana ya Cyigenza cya Rwakagara, akaba ari ubuvivi bwa Rwakagara, umukurambere w’Abega b’Abakagara.

Urabe wumva mwana w’i Rwanda, ibyo ni byo bisekuruza byo mu muryango wo kwa Rwakagara.

-  Soma: Imiryango yahamije ubuhangange mu mateka y’u Rwanda: Igicumbi cyo kwa Rwakagara (Igice cya mbere)

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Kabare William 2020-01-06 11:46:07

Nongeye Kugushimira Ku Mateka Y,iwacu Kwa Rwakagara Umwega W,injonge Akaba Umwega W,igorora,umva Amazina Sha:giharamagara, Kabare,cyigenza,Ruhinankiko...Buriya Amazina Ya Bene Rwakagara Afite Ibisobanuro Byajyanaga N,igihe Bavukiye Mu Mateka Y,u rwanda Uwo Wavuze Ngo Akeneye Ibisekuru Uhereye Ku Cya Cumi,azabibona...Murakoze Ni Kabare Ka Ruzindana Rwa Mukaro Ka Bigirinka Ka Kabare Ka Rwakagara.

2
Fifi 2019-12-16 06:01:31

Wawww aha harimo grand père na oncle . Ndabyibutse ibisekuru nari narabyibagiwe . Murakoze cyane

3
Maniriho Emmanuel 2019-12-16 05:56:20

Urakoze Nsanzabera. Ariko ntuvuze abana na bamwe mu buzukuru aho batwaraga. Baba batarabaye abatware? Aha ndavuga nka Kigenza n’umuhungu we Rwidegembya. Bo ntibatwaye? Ese Kayondo ka Mbanzabigwi, ari we ari na se ntawatwaye? Ni benshi wavuze amazina uterekanye utambuka.

4
NYIRUKURI 2019-12-16 04:53:09

ushaka kumenya byimazeyo ibisekuruza bya Rwakagara kugeza ku cya mber, muzasome igitabo: IYOROROKA RY’ABANYARWANDA, INKOMOKO Y’IMIRYANGO MIGARI. cyangwa se : IMIRYANGO YAHAMIJE IBIGWI N’IBIRINDIRO MU MATEKA Y’U RWANDA

5
Gi 2019-12-15 14:04:18

Buriya umuntu wese wabwiwe igisekuruzu cye ndemeza neza aha y’ibona ko ari mwene Rwakagara , ubwanjye , Rwakagara ari ku gisekuru cya 4 , ahubwo bishobotse yazatubwira byimbitseho kubamubanjirije kuko nibura ababyeyi abenshi batubwiraga 10 gusa , Murakoze kandi kur’inkuru

Kwamamaza