IGIHE

Ibyo wamenya ku muryango mugari w’Abacyaba n’impamvu babarirwa mu Banyiginya

0 14-05-2022 - saa 10:38, Nsanzabera Jean de Dieu

Benshi mu bakurikiranira hari iby’inkomoko n’imyororokere by’imiryango migari y’Abanyarwanda, bakunze kwibaza impamvu nyamukuru ituma abakomoka mu muryango mugari w’Abacyaba bagaragaza ko inkomoko yabo ari mu gicumbi gikuru cy’imiryango y’Abanyiginya kandi bizwi neza ko bafite inkomoko mu gicumbi gikuru cy’imiryango migari y’Abazigaba.

Igitabo ”Iyororoka ry’Abanyarwanda, inkomoko y’imiryango migari” cy’umusizi Nsanzabera Jean de Dieu, inzobere mu muco, amateka n’ubuvanganzo, gisobanura ibyo twibaza ku miryango migari y’Abanyarwanda harimo n’uw’Abacyaba cyane cyane ku nkomoko yabo.

Abacyaba ni umuryango mugari witirirwa umukuramberekazi wa bo Nyirarucyaba rwa Gihanga washatse mu Bazigaba bakabyara: Kagara (Gacyaba), Kanage, Karashi, Karandura, Rusengo na Kabuguma.

Ni we wabaye inkomoko y’Abacyaba, usibye ko Gihanga yanze ko umwana we rukumbi w’umukobwa aheranwa n’Abazigaba bakoye Nkuri, agahitamo guha irage abana bamukomokaho hamwe na ba nyirarume.

Ni yo mpamvu bakunze kuvuga ko Abacyaba ari umuryango mugari ukomoka ku mugore (Ubwoko bw’umugore), kuko bakomoka kuri Nyirarucyaba, wari umugore wo mu Bazigaba, kandi bimenyerewe ko inkomoko y’umuryango mugari itangwa n’umugabo.

Nk’uko amateka abitugaragariza, Gihanga yashatse abagore bane barimo Nyamususa, Nyirampingiye, Nyirampirangwe na Nyangobero, babyarana abana icyenda barimo Nyirarucyaba umukobwa umwe rukumbi yabyaranye na Nyamususa wa Jeni rya Rurenge.

Gihanga yakundaga kwitabira umuhigo cyane, dore ko yari n’umukogoto w’umuheto. Yahigaga inyamaswa z’amoko yose cyane inini n’iziringaniye zirimo Imondo, Urusamagwe, Ingwe, Inyemera, Impara, Imparage n’izindi, impu zazo akaziha abagore be Nyirampirangwe, Nyamususa n’abandi. Bakajya bajya ibihe byo kuzakira, umwe akazifata uyu munsi, undi akazazifata ejo, bityo, bityo.

Rimwe Gihanga yambitse umuhigo, maze abahigi be bica inyamaswa yitwa Impwi, ari na bwo bwa mbere bayishe mu mateka y’umuhigo wabo. Baraza barayibaga, uruhu bararubamba.

Sinzi rero uko byagenze, abagore ba Gihanga, Nyamususa na Nyirampirangwe, bapfa urwo ruhu. Umwe ati "Ni njye utahiwe no kurubambura". Undi ati "Urabeshya nijye utahiwe, uruherutse ni wowe warutwaye". Abagore rero baratongana, bigeza aho kururwanira.

Nyirarucyaba atabara nyina Nyamususa, yenda urubambo rumwe bari babambishije urwo ruhu, arutikura ku nda ya Nyirampirangwe wari utwite inda nkuru. Amufomoza umwana w’umuhungu wavutse muri ubwo buryo ni we wiswe Gafomo mu bana ba Gihanga, kuko yari yafomojwe mu nda ya nyina. Nyirampirangwe ya Rwamba agwa aho.

Nyirarucyaba rero abibonye amenengana mu ishyamba, yanga ko se aza kumugirira nabi. Ageze kure, agwa mu nzu y’umunyeshyamba witwaga Kazigaba wari utunzwe no kugurisha inkono yabumbaga no guhiga inyamaswa z’ishyamba.

Kazigaba amubonye aramwishyingira amugira umugore, babyarana Kagara (Gacyaba), Kanage, Karandura, Karashi, Kabuguma na Rusengo babaye sekuruza b’Abacyaba benshi bo ku isi.

Urwo rupfu rwa Nyirampirangwe, ngo ni rwo rwatumye Impwi ziba umuziro w’Abanyiginya mu muhigo wa bo; kuva ubwo Gihanga ategeka ko hatazagira umwana we wambara uruhu rwayo, cyangwa ngo arukoreho, habe no gutekereza kuyihiga!! Kuko rwakuruye amakimbirane y’akaga mu muryango w’imbanza. Bituma umwe mu bakurambere mu bagore b’ibwami Nyirampirangwe ya Rwamba ahasiga ubuzima.

Ni na byo byatumye igikomangoma Nyirarucyaba cyomongana, gikora amahano yo kwishyingira binyuranije n’amahame y’u Rwanda rw’ibyo bihe.

Mu gihe cy’itangwa ry’umurage ahasaga mu wa 1120, mu nama y’umushyikirano yabereye i Nyamirembe ya Humure, mu Murenge wa Remera wo mu Karere ka Gatsibo, hamwe mu hari urugo rwe mu binyejana bya mbere. Gihanga yashatse kuraga abana be, muri ibyo bihe ni bwo yafashe abana be umunani b’abahungu, abongeraho abuzukuru be batandatu babyawe na Kazigaba na Nyirarucyaba, abahera umurage hamwe.

Impamvu abana ba Kazigaba na Nyirarucyaba baragiwe Ibunyiginya, ntibahabwe umurage w’Ibuzigaba, ni uko Nyirarucyaba yakowe Nkuri nka bumwe mu buryo bwakoreshwaga mu gukwa mu Rwanda rwo ha mbere.

Gukwa Nkuri mu mateka y’inkwano z’Abanyarwanda, ni amasezerano y’inkwano yabaga hagati y’imiryango idafite inkwano yo gukwa umukobwa bahisemo gushyingira
umuhungu wabo, kandi imiryango yombi yemeranya gushyingirana, icyo gihe bakemeranya ko inkwano izashakwa igihe cyose yabonekera ikazatangwa.

Ayo masezerano y’inkwano yo gukwa Nkuri yabaga atandukanye no gukwa ubuntu buziturwa kuko yo yavugaga ko igihe cyose uwayahwe atarayasohoza abana bakomoka ku mukobwa wakowe Nkuri bazaba abo kwa sekuru ubyara nyina mu buryo budasubirwaho.

Uko ni ko byagendekeye umuryango wa Kazigaba na Nyirarucyaba wambuwe abana ba bo batandatu bagabanywe na sekuru Gihanga bitirirwa batyo umuryango mugari ukomoka gicumbi gikuru cy’Abanyiginya kandi bakomoka mu gicumbi gikuru cy’imiryango ikomoka ku Bazigaba, kuko Nyirarucyaba yakowe Nkuri.

Mu ndunduro y’ubuzima bwa Gihanga ku isi, yasanze atagomba gusoza ubuzima bwe hano asize urujijo rw’imibanire hagati y’abana be na muramu wabo Kazigaba wari warakoye Nkuri, kandi ubuzima bwa sebukwe Gihanga bwarageze ku ndunduro ataratanga ibiteganywa n’amasezerano yo gukwa Nkuri.

Nubwo amateka atagaragaza niba umuryango wa Kazigaba n’uwa Nyirarucyaba, barigeze bahura ngo bemeranye amasezerano yo gukwa Nkuri, ariko atugaragariza ko ari bwo buryo bw’amasezerano y’inkwano yakoreshwaga mu Rwanda rwo ha mbere, Gihanga yahisemo gukoresha ngo asige akemuye ikibazo gishingiye ku nkwano cyazavuka mu bana be na muramu wabo Kazigaba mu gihe azaba atakiriho.

Uko ni ko muryango mugari w’Abacyaba warazwe inkomoko yo mu gicumbi gikuru cy’imiryango migari y’Abanyiginya, kandi bizwi neza ko bafite inkomoko mu gicumbi gikuru cy’imiryango migari y’Abazigaba.

Abakuru babizi neza, badutekerereza ko kugeza ku ndunduro y’ingoma ya cyami mu Rwanda cyane, cyane ku ngoma ya Mutara Rudahigwa, Abazigaba bari bagitsinsurana n’Abanyiginya bashaka ko babasubiza abana babo na bo bakabakwera. Rudahigwa yemeye icyifuzo cy’Abazigaba cyo kubakwera na we akabasubiza abana babo ari bo babumbiye mu muryango mugari w’Abacyaba ariko Abacyaba na bo bagasubiza umurage bahawe na sekuru Gihanga ugasubira Ibunyiginya bakajya guhabwa uw’Ibuzigaba.

Ihurizo ryo kurekura uwo murage bahawe na Gihanga kw’Abacyaba, ni ryo ryadindije ishyirwa mu bikorwa ry’aya masezerano yari amaze kwemeranywaho n’abahagarariye imiryango yombi (uw’Abazigaba n’uw’Abanyiginya) ariko abuzukuru ba bo b’Abacyaba bababera ibamba banga kurekura umurage w’Ibunyiginya kuko babonaga ko ufite agaciro gahanitse.

Ingoma ya Rudahigwa yarinze igera ku ndunduro Abacyaba batarafata umwanzuro wo kugaragaza aho bahagaze no guhindura amateka y’aho bagomba kubarizwa nyuma y’imyaka isaga 839 (1120-1959) icyo kibazo kivutse.

Ng’ayo ng’uko! Ng’iyo inkomoko y’umuryango mugari w’Abacyaba bagaragaza ko inkomoko yabo ari mu gicumbi gikuru cy’imiryango migari y’Abanyiginya kandi bizwi neza ko bafite inkomoko mu gicumbi gikuru cy’imiryango migari y’Abazigaba.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza