IGIHE

Amateka y’u Bungwe bw’Abenengwe, kimwe mu bihugu byabimburiye ibindi mu Rwanda

3 5-03-2020 - saa 12:37, Nsanzabera Jean de Dieu

U Bungwe ni kimwe mu bihugu byahozeho mu Rwanda, dore ko ari kimwe mu bya mbere byahanzwe u Rwanda rutaritwa u Rwanda tuzi ubu, kikaba igihugu cy’igihangange kuko cyageraga no mu Burundi bw’ubu.

Igihugu cy’u Bungwe cyahanzwe ahasaga mu mwaka wa 300 mu kibariro cy’ibihe byacu. Umwami uzwi mu mateka y’u Bungwe mu gihe cy’umwaduko w’ingoma Nyiginya ni uwitwa Rwamba.

Ibitabo “mizi y’u Rwanda”, umutumba wa mbere ndetse n’igitabo “Intwari z’imbanza, zubatse u Rwanda rugahamya igitinyiro’’ byombi by’Umusizi Nsanzabera Jean de Dieu, bigaragaza ko u Bungwe bwari igihugu kitisukirwa, benecyo bari barahaye akabyiniriro k’u Bungwe bw’Abenengwe.

Abami batwaye igihugu cy’u Bungwe, kugeza gitsindwa n’u Rwanda barimo Mungwe, Mungwe, Karama, Rwamba, Samukende na Rubuga. Ingoma Ngabe y’u Bungwe nk’ikirango cy’igihugu cyabo yari “Nyamibande”.

U Bungwe nicyo gihugu cyahanzwe mu bya mbere, mu bihugu byari bigize u Rwanda. Icyo gihugu cyagengwaga n’Abenengwe bakura igisekuruza cyabo kuri Mungwe (Muntu Ngwe) wari murumuna wa Rurenge umukurambere w’Abasinga b’Abasangwabutaka wahanze igihugu cy’u Budaha n’u Bwishaza.

U Bungwe cyari igihugu kibumbye uturere dutandatu. Muri two hari u Busanza bw’Amajyepfo, kuri bu aho kari gaherereye ni mu Mirenge ya Ndora, Mamba, Gishubi, Kibilizi na Muganza yo mu Karere ka Gisagara.

U Busanza bw’Amajyaruguru nabwo bwari akarere k’ingoma y’u Bungwe. Kuri ubu aho kari gaherereye ni mu Mirenge ya Maraba, Simbi, Ruhashya, Rusatira na Mbazi yo mu Karere ka Huye, ndetse n’Imirenge ya Save, Musha na Gikonko yo mu Karere ka Gisagara.

U Bufundu bwari akarere k’ingoma y’u Bungwe, kuri bu aho kari gaherereye ni mu Mirenge ya Tare, Kamegeri, Kitabi, Uwinkingi, Buruhukiro, Kibirizi, Musebeye, Kibumbwe, Mbazi na Cyanika yo mu Karere ka Nyamagabe

Mu turere twari tugize igihugu cy’u Bungwe harimo n’Akarere ka Nyaruguru. Kuri bu aho kari gaherereye ni mu Mirenge ya Rusenge, Mata, Ruramba na Kibeho yo mu Karere ka Nyaruguru, ukongeraho imirenge ya Gishamvu, Huye, Karama, Ngoma, Tumba na Mukura yo mu Karere ka Huye

Akandi karere kabarirwaga mu ngoma y’u Bungwe ni Bashumba-Nyakare. Kuri ubu aho kari gaherereye ni mu Mirenge ya Ngera, Nyagisozi na Ngoma yo mu Karere ka Nyarugururu, ukongeraho n’imirenge ya Nyanza, Kigembe, Mukindo, Mugombwa na Kansi yo mu Karere ka Gisagara.

Akarere k’u Buyenzi nako kari kamwe mu tugize igihugu cy’u Bungwe. Kuri bu aho kari gaherereye ni mu Mirenge ya Kivu, Muganza, Nyabimata, Ruheru, Busanze, Munini na Cyahinda yo mu Karere ka Nyaruguru.

Igihugu cy’u Bungwe, cyagengwaga n’ibikomangoma by’Abenengwe, ikirangamuryango cyabo cyari Ingwe . Umwami wariho ubwo Ingoma Nyiginya y’ i Gasabo yadukaga yitwaga Rwamba ari na we wa mbere wafashe umukobwa we Nyirampirangwe akamushyingira Gihanga Ngomijana, wagengaga ingoma y’i Gasabo akamubera umukwe.

Rwamba yari atuye muri Nyakizu ni ukuvuga, gakondo nkuru yabo, ari nayo yabaye ibimburiro ry’ihangwa ry’icyo gihugu cyahanzwe na Mungwe watuye mu Bisi bya Nyakibanda (Ubu ni mu Karere ka Huye mu Murenge wa Gishamvu).

Undi Mwenengwe wategekaga igihugu cye kugeza gitsindwa n’ingoma Nyiginya ni Rubuga rwa Samukende, umuhungu wa Benginzage bakunze kwita Nyagakecuru na Samukende bo mu Bisi bya Huye.

Abenengwe nibo bambutse uruzi rw’Akanyaru, bajya guhanga ibihugu byabo i Ngozi-Kayanza mu Burundi. Abenengwe baje mu Bungwe basanga igihugu kikiri amashyaba ya kimeza, baragitema, baragikonda kugeza bakigize igihugu gituwe.

Mu bihe by’iyaguka ry’u Rwanda, ubwo ibitero byo kwagura igihugu no kugihuza, uturere twaremaga ingoma y’u Bungwe twaremye ingoma bitaga ingoma z’abiyunze . Abazitwaraga bari bameze nk’Abatware b’uduce (zone) zabaga zifatanyije uturere tubiri mu rwego rwo gukaza umurengo no kongera imbaraga mu butegetsi bwabo, kugira ngo igihugu cy’u Rwanda cyabicaga bigacika muri ibyo bihe, kitazapfa kubavogera.

Iyo ngoma y’Abiyunze y’u Bungwe yari igizwe n’u Busanza bwa Nkuba ya Bagumana ( watwaraga u Busanza bw’Epfo n’ubwa Ruguru), u Bufundu bwa Rubuga rwa Kagogo ( watwaraga u Bufundu n’u Buyenzi), n’u Bungwe bwa Rubuga rwa Samukende ( bwari bugizwe na Bahumba-Nyakare na Nyaruguru).

Mu bice bikurikira, tuzabatekerereza indunduro y’ingoma y’u Bungwe.

U Bungwe bwari igihugu cy'igihangange mu Rwanda rwo hambere
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
sagyhat 2020-03-18 03:54:09

amateka nimeza.Nge ndabona kubera guhindagura amazina yuturere byaragiye byangiza amateka yu rwanda kko ibi hari abumva ko ari imigani .umutegetsi wese ugiyeho ahita ashaka amazina yahantu bityo iyo hahinduwe amteka yaho aribagirana.

2
Rwema 2020-03-06 12:35:57

Ese Nsanzabera yaba yiyambaza inzobere zibanza gusoma no kunononsora ibitabo bye mbere y’uko bisohoka? Impamvu mvuze ibi ni uko hari bimwe nasomye ngasangamo amakosa ndetse na bimwe mu byanditsemo bitarimo amanyakuri! Si ukumujoora, ahubwo ugira Imana agira umugira inama!

3
Tubane 2020-03-06 06:39:48

Mu gihugu cy’impumyi, ufite ijisho rimwe ni umwami!

Kwamamaza