IGIHE

Umuburo ku bamamaza itabi n’ubuvuzi bw’indwara zirimo izidakira mu Rwanda

8 11-01-2019 - saa 20:18, Evariste Nsengimana

Mu bitangazamakuru no ku mbuga nkoranyambaga mu Rwanda, hakunze kunyura amatangazo y’abamamaza itabi n’ubuvuzi bw’indwara zose zirimo n’izidakira nka Kanseri, diabète n’izindi kandi bitemewe.

Itegeko n°08/2013 ryo kuwa 01/03/2013 ryerekeye kugenzura imikoreshereze y’itabi, hari aho rivuga ko ‘Ibikorwa bigamije kwamamaza itabi n’ibirikomokaho bibujijwe’ uretse hagati y’abarihinga, abarikora, abaritumiza n’abaryohereza mu mahanga, n’abarigurisha.

Inyandiko zijyanye n’ubucuruzi bw’itabi n’ibirikomokaho, zigezwa gusa ku bakozi, abafatanyabikorwa cyangwa abashoramari ariko zitagamije cyangwa zidashobora gushishikariza abantu, ku buryo butaziguye cyangwa buziguye, kugura cyangwa gukoresha itabi n’ibirikomokaho cyangwa ibirango by’icuruzwa ry’itabi.

Gusa ibi ntibyubahirizwa n’abakoresha imbuga nkoranyambaga mu Rwanda, cyane cyane Whatsapp aho muri iyi minsi hari gukwirakwizwa itangazo ry’abavuga ko bafite irihumura nk’umubavu, baranguza 2500Frw nyamara nta buryo bwo kubakumira.

Abakora mu by’ubuganga cyane cyane ubuvuzi gakondo bacuruza imiti na serivisi nabo usanga babyamamaza kuri Radio, Televiziyo, imbuga za internet cyangwa nkoranyambaga, nyamara amahame ngengamyitwarire agenga abakora umwuga w’ubuvuzi, ntabemerera kwamamaza serivisi z’ubuvuzi.

Umuyobozi w’ishami rishinzwe ubuvuzi bw’indwara y’ibihaha, impyiko, diabète n’izibasira imyanya igize urwungano ngogozi mu Kigo gishinzwe Ubuzima (RBC), Niyonsenga Simon Pierre, aheruka kubwira IGIHE ko hari benshi biyitirira ko bavura diabète(imwe mu ndwara zidakira), nyamara ngo ni ‘ubutekamutwe’.

Yavuze ko kubera ububabare abarwaye indwara zidakira bahorana, ubakubiranye akabizeza kubavura bagakira, bakwemera bakamuha utwo batunze twose.

Ibi usanga bikomeje gutya byazateza ubukene abarwaye indwara zidakira cyangwa bikongera umubare w’abanywa itabi kandi rigira ingaruka nyinshi ku buzima bw’umuntu.

Umuvugizi wa Minisiteri y’Ubuzima, Kayumba Malick, yabwiye IGIHE ko babizi ko hari abantu bamamaza serivisi z’ubuvuzi kandi bitemewe ariko urugamba rwo kubarwanya rukomeje.

Ati “Hari amabwiriza abuza kwamamaza itabi n’abuza abantu kurinywera ahari abantu benshi, dusaba n’amahoteli nubwo benshi batabyubahiriza, kugira ahantu hihariye ho kurinywera iyo bibaye ngombwa.”

Minisiteri y’ubuzima ivuga ko yigisha ububi bw’itabi, ikanagenzura niba hari abaryamamaza kandi ko bisaba guhozaho kuko ribamo amafaranga menshi, abantu batareka kuricuruza.

Kayumba yaburiye abantu bakomeza kwamamaza itabi n’ubuvuzi bw’indwara zidakira, bagatuma abantu batajya kwivuza ku bavuzi bemerewe kuvura, ko ibyo bakora bitemewe.

Ati “Biriya bakora kuri radiyo, televiziyo ngo mvurira ahantu aha n’aha, umuti mfite ushobora kuvura indwara 100, ibyo byose ntabwo byemewe. Turanasaba itangazamakuru ko mudufasha gukomeza kubyamagana.”

Minisante ivuga ko yemera ko hari n’abavuzi gakondo bashobora kuvura umuntu agakira ariko igasaba ko babikora ku mugaragaro, binyuze mu rugaga rubahuza.

Kayumba ati “Igihe ibyo bitaraba(Kubikora ku mugaragaro), ntabwo dushobora kuzabyemera. Icyo dushinzwe ni uguharanira ubuzima bw’abantu, ntidushobora kwemera na rimwe ko umuntu yiha gukora ibintu adashoboye cyangwa kwigira umuganga utarabyigiye, atabifitiye n’ubumenyi.”

Hategerejwe itegeko

Kayumba yavuze ko itegeko rijyanye no gukora ubuvuzi gakondo riri kuvugururwa, rizaba rinateganya ibihano ku bamamaza serivisi z’ubuvuzi, nirisohoka rizafasha kubikumira kuko risobanura neza ibyemewe n’ibitemewe.

Rimwe mu matangazo yamamaza itabi
Rimwe mu matangazo yamamaza kuvura indwara nyinshi rihererekanywa ku mbuga nkoranyambaga
Kwamamaza itabi mu ruhame mu Rwanda birabujijwe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Christophe Rukundo 2019-01-16 00:35:07

Ubutekamutwe mu Rwanda bwaragwiriye. Ernesto c afite iyihe laboratory ivura HIV na Diabete hehe ngo leta izamusure imushimire. Ibiba muri Africa bihora ari byendagusetsa

2
Mucyo 2019-01-12 12:52:14

@Ernesto,ngo diabetes na Sida urabivura bigakira?Uri igitangaza!

3
Emeraude 2019-01-12 10:11:19

Benshi mu bamamaza cyane cyane amaradiyo bakabiriza uburyo ikibazo gikomeye kugira ngo bacuruze. Bakabeshya n’ibyo bavura. Tekereza kuvuga ngo tuguha umuti wishakira indwara zose waba ufite ukazivura. Ibi bihavanye n’ukuri. Ukumva ngo kutagira amavangingo, kwikinisha ni ikibazo nyamuku ku banyarwanda benshi ngo bigira ingaruka harimo no kubura akazi kuko utabasha gutsinda interview ufite icyo kibazo!!!

4
mazina 2019-01-12 03:01:27

This world is hypocritical!! Niba koko ibihugu byamagana ITABI,kuki badasenya inganda zizikora,ahubwo bigashyigikira izo nganda kubera ko zinjiza imisoro myinshi?ITABI ni "ikiyobyabwenge" cyangiza umubiri.Niyo mpamvu ku mapaki y’itabi bandikaho ngo:"Itabi ririca".Imana ubwayo,itubuza "kwangiza umubiri wacu".Bisome muli 2 Abakorinto 7:1.Kubirengaho ni icyaha.Niyo mpamvu abakristu nyakuri batanywa itabi.Kimwe n’ibindi biyobya-bwenge byose.

5
Masokubona 2019-01-12 02:49:40

Igihe cyose rikinjiza imisoro n’amahooro ngaho rizajya!

6
Ruhumuriza Germain 2019-01-12 02:16:13

Nibyorwose babigabanye usigaye ufungura radio ukumvanabavugako bavura umuvuduko diyabete ibyiko nizindi zikomeye ngogutera kabariro kurangizavuba ikibabaje nukobabivugira kumaradio yemewe bakoresha imvugobishakiye batitayeko harinabana badakwiriye kumva ibyobavuga abandi bashyize utumegafone kumiryango bakoreramobakwiye kubireka bakajya babibwira abinjiyemurayo mazuyabo kandi bakwiyekureka kwiyitirira ibyovadashoboye rwose kukobarabeshya cyane minisitere yubuzima ibishyiremo imbaraga ifatanyije ninzego zibanze murakoze

7
Kamikaze 2019-01-12 01:28:27

Nonese Minisante biyinanije iki gutanga amabwiriza ku ma radio yose ko batemerewe ibiganiro n’abamamaza ubuvuzi

8
Ernesto Festus 2019-01-11 14:06:55

Birababaje kuba abantu bashinzwe kureberera abaturage no kubafasha bakivuga ko hari indwara zidakira ni ukuri! Diabete irakira , HIV irakira, cancer irakira, ndetse n’izindi nyinshi abaganga bacu batazi. Ikibabaza nuko icyo umuntu atazi yumva ko kitabaho. Rwose izo ndwara zirakira n’ubuhamya bw’abazivuwe burahari kandi bakize neza. Ahubwo wenda twajya tuvuga ko kuzivura bihenze ariko imvugo ivuga ko zidakira siyo rwose. Ubihakana niba afite umurwayi urwaye indwara zamaze kujya mu mitwe y’abantu ko zidakira azamuzane tumuvure kandi akire mu maso ya buri wese ushidikanya. Murakoze.

Kwamamaza