IGIHE

Minaloc yatangaje amabwiriza avuguruye y’imikoresheze y’insengero mu kwirinda COVID-19

0 31-07-2020 - saa 09:16, Philbert Girinema

Minisiteri y’Ubutegetsi bw’Igihugu yatangaje amabwiriza mashya agomba kubahirizwa n’insengero bijyanye no kwirinda icyorezo cya Coronavirus, aho buri rusengero rwasabwe kujya rugaragaza umubare w’abantu ntarengwa bakwiriye kurusengeramo kandi ukamanikwa ahantu hagaragara mu gihe amateraniro yo agomba kuba rimwe mu cyumweru.

Aya mabwiriza aje akurikira inama yahuje minisiteri zitandukanye n’abayobozi b’imiryango nyobokamana, yabaye ku wa Kane tariki ya 30 Nyakanga.

Mu mabwiriza mashya asimbura ayari yatanzwe ku wa 17 Nyakanga, harimo ko hagati y’iteraniro rimwe n’irindi hagomba gushyirwamo nibura igihe cy’amasaha abiri yo kugira ngo urusengero rusukurwe neza.

Ni mu gihe mbere havugwaga isaha imwe ariko ku munsi wa mbere ubwo insengero zafungurwaga, habaye iteraniro rimwe kuko ubuyobozi bwasanze icyo gihe kidahagije ngo urusengero rube rwasukuwe uko bikwiriye.

Icyo gihe mu Mujyi wa Kigali, insengero 18 ni zo zemerewe gusubukura ibikorwa. Umuyobozi w’Umujyi wa Kigali, Rubingisa Pudence, yasobanuye ko gufata uyu mwanzuro wo kugabanya amateraniro bishingiye ku kubahiriza amabwiriza yo kwirinda iki cyorezo.

Ati “Twasobanuriye neza abayobozi b’insengero n’imisigiti ko ikigambiriwe ari uko abantu bajya mu nsengero ariko hirindwa icyorezo cya Coronavirus. Ubwo rero hagati ya misa n’iya kabiri, cyangwa hagati y’amateraniro abiri, hagomba gukorwa icyo gikorwa cy’isuku kandi mu buryo bwimbitse.”

Mu mabwiriza mashya yatangajwe harimo ko “amasengesho aba umunsi umwe mu cyumweru bitewe n’ukwemera k’umuryango ushingiye ku myemerere kandi amateraniro ntarenga amasaha atatu ku munsi wo gusenga”.

Ku wa Gatanu abemerewe gusenga ni Abayisilamu, ku wa Gatandatu ni Abadivantisiti b’umunsi wa karindwi naho ku Cyumweru ni amadini asanzwe agira amateraniro rusange ku Cyumweru.

Akomeza agira ati “Icyakora imihango y’idini yo gusezera uwapfuye no gushyingura ikorwa ku munsi uwo ariwo wose hubahirijwe amabwiriza yo kwirinda COVID-19.”

Aya mabwiriza avuga ko abana bari munsi y’imyaka 12 batemerewe kujya mu rusengero naho abakuze barengeje imyaka 65 bo bajya mu materaniro yihariye atandukanye n’ay’abandi.

Imihango yo gushyingura no gusezerana ibera mu rusengero yo ntabwo igomba kurenza abantu 30.

Aya mabwiriza avuguruwe mu gihe imibare y’abandura iki cyorezo nayo ikomeza kuzamuka umunsi ku wundi mu gihugu. Ubu harabarurwa abantu 1994 bamaze kwandura, abapfuye bo ni batanu.

Minisitiri w’Ubuzima aherutse gutangaza ko isesengura ry’ubwiyongere bw’ubwandu ryaragaragaje ko abenshi bari kurwara iki cyorezo ari abari hagati y’imyaka 20 na 49, kuko batari kubahiriza amabwiriza yo kwirinda nk’uko yatangajwe.

Abari muri iki cyiciro ngo usanga bamwe bagiye mu mihango ya Kinyarwanda yo gusezera ku bantu bapfuye cyangwa se no ku kiriyo, ukabasanga ari benshi cyane bamwe batambaye udupfukamunwa kandi bacucitse nta ntera bahanye.

Ati “Imibare ukuntu imeze n’uko abantu bari kwitwara, sinzi niba bari kuducira amarenga ngo tubasubize muri Guma mu Rugo ariko wagira ngo nibwo butumwa bashaka kuduha bw’uko batitaye ku mabwiriza, ntibari kuyubahiriza, ari abakoresha, abakozi, ari abakuru b’imiryango mu ngo”.

Nubwo serivisi nyinshi zikomeje gufungurwa, abanyarwanda barasabwa kutirara ngo bumve ko icyorezo cyarangiye. Bagirwa inama yo gukomeza kubahiriza amabwiriza yashyizweho, bibuka kwambara agapfukamunwa buri gihe bavuye mu ngo, bakaraba intoki kenshi, birinda amakoraniro n’ibindi bintu byose bishobora guhuriza hamwe abantu benshi, ndetse by’umwihariko uwiyumvamo ibimenyetso by’iki cyorezo birimo inkorora, guhumeka nabi, gucika intege n’ibindi, agahamagara umurongo utishyurwa wa 114 kugira ngo ahabwe ubufasha n’abaganga.

Insengero zasabwe kandi kugaragaza imyanya yemewe kwicarwaho
Ikoranabuhanga riri kwifashishwa mu kwiyandikisha mbere yo kugana mu rusengero
Insengero zasabwe gukomeza kwimakaza uburyo bw'ikoranabuhanga mu gutanga amaturo
Insengero zasabwe ko buri wese agomba kubanza gupimwa umuriro mbere yo kwinjira
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza