IGIHE

Umusaza, amaze imyaka 25 avura abantu atabona

0 13-10-2019 - saa 09:00, Thamimu Hakizimana

Umusaza Joseph, ni umugabo ufite ubumuga bwo kutabona wemeza ko umaze imyaka 25 avura abantu batandukanye mu buryo bwo kubagorora ingingo bakunze kwita ’Physiotherapy’ mu kigo cya HVP Gatagara mu Karere ka Nyanza.

Kimwe mu bikunze gutangaza benshi ni uburyo uyu mugabo abasha kuvura abantu batandukanye mu gihe atanararangije amashuri yisumbuye.

Buri muntu wese iyo abonye uburyo uyu mugabo avura abantu batandukanye kandi atabona birabatungura ndetse bikanabatangaza cyane gusa we avuga ko n’ubwo atasoje amashuri yisumbuye yagiye ahabwa amahugurwa atandukanye.

Ubwo yaganiraga na IGIHE,Umusaza yemeje ko ubuhanga bwo kuvura yabwigishijwe n’abazungu b’ababiligi bamwigishaga mbere ya Jenoside yakorewe abatutsi mu 1994.

Avuga ko mbere yagiye kwiga i Gatagara azi ko azavamo umucuranzi ariko umuzungu wabigishaga amwumvisha ko akwiye kwiga ibijyanye n’ubuvuzi kuko aribwo buzamuteza imbere cyane ko muzika nyarwanda y’icyo gihe yari itaratera imbere.

Ati “Naje nje kwiga muzika umwe mu bazungu arambwira ngo umuziki wo mu Rwanda nturatera imbere naguhitiramo Physiotherapy mbyiga gutyo nyine numva ni byiza kandi ubu uyu munsi nta muntu wansuzugura kuko ushobora kunkenera nanjye nkagukenera.”

Yemeza ko mu myaka 25 amaze avura hari abantu benshi batandukanye yavuye kandi bagakira neza kandi muri bo hari n’abo adashobora kwibagirwa.

Ati “ Hari umubyeyi wari wakoze impanuka y’imodoka aravunika ku buryo bari bamubwiye ko atazongera kugenda ,azajya agenda mu igare ariko uyu munsi n’umudogiteri wamubaze iyo amubonye ashima Imana kuko ntiyiyumvisha uburyo yahagurutse akagenda.”

Yemeza ko zimwe mu ngorane nk’ufite ubumuga bwo kutabona ahura nazo zirimo kuba hari n’abantu bashobora kumubona bakamusuzugura babona ko atabasha kumuvura

Ati “ Ndabyibuka njya kwimenyereza umwuga mu Bitaro bya Kigali hari umuzungu wayoboraga ishami rya Physiotherapy yampaye abarwayi noneho bose barajujura ngo umuntu nawe ntiyibereyeho ngo agiye kutuvura?”

Ngo muri abo barwayi, haje kuvamo umwe yemera ko amuvura nyuma bagenzi baza kumubona yarakize birabatungura noneho bose batangira kujya bifuza ko ari we wajya abavura.

Umusaza avuga ko ku munsi ashobora kuvura abantu batanu cyangwa akabarenza ndetse akanashimangira ko abonye ubushobozi yakomeza amashuri yisumbuye akayarangiza cyane ko Leta y’iki gihe idaheza abafite ubumuga.

Umusaza Joseph ubwo yitaga ku murwayi waje kwivuza amunanura ingingo
Umusaza amaze imyaka 25 akora uyu murimo wo kunanura abafite ibibazo by'ingingo
Umusaza avuga ko ku munsi ashobora kuvura abantu batanu cyangwa akabarenza

Thamimu Hakizimana

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza