IGIHE

Abarenga 200 baracyapfa babyara: Ibigikeneye kwitabwaho mu buvuzi mu Rwanda

0 19-05-2022 - saa 12:39, Prudence Kwizera

Hirya no hino mu tugari two mu Rwanda, amavuriro y’ibanze yegerejwe abaturage ku buryo kuri ubu benshi mu Banyarwanda babasha kubona serivisi z’ubuzima bitabagoye. Gusa haracyari ibibazo bikeneye kwitabwaho by’umwihariko hagamijwe gufasha abaturarwanda kugira ubuzima buzira umuze.

Mu myaka yatambutse Abanyarwanda benshi by’umwihariko abatuye mu cyaro bararwaraga bakarembera mu nzu bitewe n’impamvu zitandukanye zirimo kuba amavuriro yari kure yabo n’ubushobozi budahagije bwo kwivuza.

Mu gukemura ibyo bibazo, Leta y’u Rwanda yashyize ingufu mu kwegereza abaturage amavuriro mu tugari, kubashyira mu bwisungane mu kwivuza kugira ngo bavurwe bitabagoye, kongera umubare w’abatanga serivisi z’ubuzima, kuzana ibikoresho bigezweho mu buvuzi no gukoresha ikoranabuhanga.

Imibare yerekana ko kuva mu 2011 hatangiye kubakwa amavuriro y’ibanze mu tugari, kuri ubu hamaze kuzura agera ku 1,122 kandi 37 yamaze gushyirwa mu rwego rwa kabiri kuko atangirwamo serivisi zitandukanye zirimo kubyaza abagore, kuvura amaso n’amenyo, gupfuka ibisebe n’izindi.

Umuyobozi w’Ihuriro ry’Abaforomo n’Ababyaza mu Rwanda, Gitembagara André, avuga ko umubare w’abatanga serivisi z’ubuzima na wo ugenda wiyongera.

Ati “Mu 1995 twari dufite abaforomo hafi 400 dufite n’ababyaza bagera kuri batanu. Ubu uyu munsi wa none dufite abaforomo n’ababyaza bagera ku 14.600 urumva ko ari umubare mwiza mu myaka 27 ishize.”

Abaturage bishimiye kwegerezwa amavuriro

Abaturage bo mu tugari dutandukanye tw’igihugu bishimira ko serivisi z’ubuzima zabegerejwe ku buryo bajya kwivuza bitabagoye.

Muhimpundu Jacqueline wo mu Kagari ka Misungero mu Murenge wa Nyabimata mu Karere ka Nyaruguru, avuga ko yakoraga urugendo rw’amasaha atatu ajya gusaba serivisi z’ubuzima ariko kuri ubu akoresha iminota itarenze 30.

Ati “Mbere nakoraga urugendo nkajya ku Kigo Nderabuzima cya Ruheru nkagenda nk’amasaha atatu. Iyi nda ntwite ni iya gatanu naje kwipimisha. Ubwo nari ntwite inda ya gatatu nagiye kwa muganga ngerayo bigoranye ivamo. Kuba batuzaniye ivuriro hafi bizaturinda ibibazo nk’ibyo twahuraga nabyo. Ubu kugera hano byantwaye iminota itageze no kuri 30.”

Mwiseneza Jean Marie Vianney wo mu Murenge wa Kivu mu Karere ka Nyaruguru na we avuga ko mbere bataregerezwa ivuriro ry’ibanze byamusabaga kujya kwivuza ku Kigo Nderabuzima cya Munini akoze urugendo rw’amasaha agera kuri ane.

Ubwo twamusangaga ku ivuriro ry’ibanze yaje kuvuza umwana we urwaye amenyo yavuze ko kwegerezwa ivuriro byamuruhuye.

Ati “Ubu namuzanye hano nkoresheje iminota 30 kandi mbere nagendaga nk’amasaha ane mujyanye ku Munini.”

Amavuriro y’ibanze yo ku rwego rwa kabiri atanga serivisi z’ubuzima z’ibanze zirimo gusuzuma no kuvura indwara zandura n’izitandura nka malaria, impiswi, ibicurane, kuvura amenyo n’amaso n’izindi.

Hari kandi gukurikirana imirire y’abana no kuzahura abagizweho ingaruka n’imirire mibi; gukurikirana ubuzima bw’umubyeyi nko kuboneza urubyaro, kwisuzumisha atwite no kubyaza.

Hasuzumirwa virusi itera Sida, gusiramura, kuvura ibisebe, gusuzuma igituntu n’izindi.

Umubare w’ababyeyi bapfa babyara waragabanutse

Gitembagara avuga ko umubare w’ababyeyi bapfa babyara ndetse n’abana bapfa bavuka wagabanutse ku buryo bugaragara kandi bazakomeza gukora ibishoboka byose ngo bagere kuri zeru.

Ati “Ubu turabara ababyeyi bapfa babyara bagera kuri 203 mu bana ibihumbi 100 bavutse ariko twavuye kure cyane kuko nko mu myaka iri hagati ya 10 na 15 ishize bageraga kuri 773. Twateye intambwe ariko nanone n’ubwo yaba umwe, gupfusha umubyeyi abyara ni ikintu kibabaje cyane.’’

Yakomeje avuga ko n’ubwo umubare w’abaforomo n’ababyaza wiyongereye badahagije ugereranyije n’akazi gahari.

Ati “Nk’ubu ugiye mu bigo nderabuzima byinshi usanga dufite umubyaza umwe, ni ibigo nderabuzima bike bifite ababyaza babiri. Ushobora gutekereza umubyaza umwe uha serivisi abaturage bari hagati y’ibihumbi 12 na 15! Bituma rimwe na rimwe dukoresha abaforomo wenda nabo badafite ubwo bushobozi kubera ko ababyaza badahari.”

Avuga ko ibyo bigira ingaruka mu gutera za mpfu z’ababyeyi bapfa babyara ndetse n’abana bapfa bavuka.

Leta yihaye umuhigo

Umunyamabanga wa Leta muri Minisiteri y’Ubuzima, Dr Mpunga Tharcisse, aherutse gutangaza ko Leta y’u Rwanda ifite intego yo kwegereza abaturage serivisi z’ubuzima ku buryo mu 2025 ntawe uzajya arenza iminota 30 ari mu nzira ajya kwivuza.

Ibi bireba cyane by’umwihariko abaturage batuye mu byaro bangana na 83%.

Yavuze kandi ko serivisi z’abajyanama b’ubuzima na zo zigiye gushyirwa mu mavuriro y’ibanze mu tugari kugira ngo zegerezwe abaturage.

Yagize ati “Ibi rero turashaka kubyubakiraho kugira ngo na serivisi z’abajyanama b’ubuzima zive ku rwego rw’ibigo nderabuzima zize zubakire ku mavuriro y’ibanze. Ibyo nabyo biri muri rwa rwego rwo kugira ngo twegereze serivisi abaturage kuko kugira ngo ikigo nderabuzima gikurikirane Abajyanama b’Ubuzima bose bo mu murenge byari biremereye, byasabaga n’ibindi biremereye.”

Yavuze no ku bibazo bikigaragara ku mavuriro y’ibanze mu tugari aho usanga ahenshi hari umuforomo umwe kandi agakora mu masaha y’amanywa gusa naho nijoro no mu mpera z’icyumweru ntibakore.

Dr Mpunga ati “Hari ibikoresho bikeneye kongerwamo turabyongeramo, hari n’ikibazo cy’abakozi kuko iri vuriro ry’ibanze mubona aha ngaha kugira ngo rizakore rigere ku kigero cyifuzwa rigomba kuba nibura rifite abakozi 12. Harimo no kongeramo ikoranabuhanga kugira ngo bashobore gukoresha ubuvuzi bugezweho.”

Haracyari ibikeneye kunozwa

N’ubwo abaturage bishimira ko bakomeje kwegerezwa serivisi z’ubuzima hafi, hari bamwe bagaragaza ko batakirwa neza iyo bagiye kwivuza, bagasaba ko byakosorwa.

Urugero ni urw’umubyeyi twasanze ku Kigo Nderabuzima cya Rango mu Murenge wa Tumba mu Karere ka Huye avuga ko amaze igihe aza gupimisha inda kuko atwite ntiyakirwe ndetse n’uwakamwakiriye akamubwira nabi.

Yagize ati “Uyu ni umunsi wa kane nje hano ariko ntabwo baranyakira, iyo mbajije ushinzwe kutwakira ntansobanurira ikibazo cyabaye ahubwo ambwira nabi. Si njyewe njyenyine kuko ndi kumwe n’abandi.”

Ni ikibazo Ihuriro ry’Abaforomo n’Ababyaza ryateye imboni ku buryo iyo hagize uwo bigaragayeho akeburwa, byarambirana akaba yanahabwa ibihano birimo no kwirukanwa mu kazi.

Gitembagara ati “Ibibazo by’abivanga mu mwuga wacu byararangiye, wenda abo dusigaranye ni babandi bashobora kwitwara nabi mu kazi ariko nabyo tugenda duhugurana kenshi ndetse uwo binaniranye agahanwa n’amategeko mu buryo bw’umwuga.”

Abaturage barasabwa uruhare rwabo

Abaturage basabwa uruhare rwabo kugira ngo serivisi z’ubuzima zirusheho kuba nziza cyane cyane bagaragaza aho bitagenze neza kugira ngo bikosorwe kandi bagatunga agatoki umuntu wabakiriye nabi bakamuvuga mu mazina.

Ikindi basabwa ni ukwitabira gutanga umusanzu w’ubwisungane mu kwivuza kugira ngo bahabwe serivise z’ubuzima badahenzwe.

Barasabwa gukurikiza inama bagirwa n’inzego z’ubuzima kugira ngo birinde indwara nyinshi ziganjemo izitandura kuko zikunze guhitana abatari bake. Mu kuzirinda barasabwa gufata indyo yuzuye yiganjemo imboga n’imbuto kandi bagakora imyitozo ngororamubiri.

Ikindi ni ukwitabira kwisuzumisha kenshi izo ndwara kandi igihe hari uwumva arwaye akihutira kujya kwivuza hakiri kare atararemba.

Mu kwirinda indwara zandura barasabwa kugira isuku muri byose no kurara mu nzitiramibu kugira ngo batarumwa n’imibu itera malaria.

Bamwe mu baforomo n’ababyaza baganiriye na IGIHE bavuze ko biyemeje gushyira ingufu mu kunoza ibyo bakora batanga serivise nziza ku babagana.

Bemeza ko umwuga wabo udasaba kuba umuntu yarawize gusa ahubwo bisaba no kugira urukundo n’umutima mwiza ugaragarira mu kwita ku bo baha serivise bababwira amagambo y’ihumure.

Mu mavuriro y'ibanze hatangirwa serivisi zirimo no kubyaza abagore
Mu mavuriro y'ibanze batanga serivisi z'ubuzima zitandukanye
Dr Mpunga ari kumwe n'abandi bayobozi bareba imikorere y'amavuriro y'ibanze mu Karere ka Nyaruguru
Muhimpundu Jacqueline wo mu Kagari ka Misungero mu Murenge wa Nyabimata mu Karere ka Nyaruguru avuga ko yakoraga urugendo rw’amasaha atatu ajya gusaba serivisi z’ubuzima ariko kuri ubu agenda iminota 30 gusa
Kuvura indwara z'amaso nabyo bisigaye bikorerwa mu mavuriro y'ibanze
Serivisi z'ubuzima zitandukanye zegerejwe abaturage ku mavuriro y'ibanze mu tugari
Umunyamabanga wa Leta muri Minisiteri y’Ubuzima, Dr Mpunga Tharcisse, aganira n'abaturage baje kwivuriza ku ivuriro ry'ibanze mu Murenge wa Nyabimata mu Karere ka Nyaruguru
Umuyobozi w’Ihuriro ry’Abaforomo n’Ababyaza mu Rwanda, Gitembagara André, avuga ko umubare w’abatanga serivisi z’ubuzima nawo ugenda wiyongera

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza