IGIHE

Abahanga mu by’imiti bibukijwe kunoza imikoranire n’izindi nzego z’ubuzima

0 30-10-2019 - saa 20:59, Twarabanye Venuste

Ishyirahamwe ry’Abahanga mu by’Imiti b’Abanyafurika batuye mu Bufaransa (APAF), baratangaza ko nubwo abahanga mu by’imiti bakiri bake bakwiye kurushaho gukorana n’izindi nzego z’ubuzima kugira ngo abarwayi babone serivisi nziza, imiti n’inama za ngombwa ku ndwara bajya kwivuza kwa muganga.

Byatangarijwe mu nama y’iminsi ibiri ihuje APAF n’Urugaga rw’Abahanga mu by’Imiti mu Rwanda, yiga ku iterambere ry’umwuga wabo binyuze mu gukorana n’izindi nzego zita ku buzima by’umwihariko izo abantu bagana barwaye.

Umuyobozi w’Urugaga rw’Abahanga mu by’Imiti mu Rwanda, Dr. Hahirwa Innocent, avuga ko batumiye abo bahanga kugira ngo baganire ku kunoza umwuga hagamijwe kurengera ubuzima bw’abarwayi.

Dr. Hahirwa ashimangira ko umwuga w’ubuzima usaba kwihugura mu buryo buhoraho hagamijwe kurushaho kuwunoza.

Ati "Twifuje gukora iyi nama kugira ngo duhane ibitekerezo, uburyo uyu mwuga ukorwa n’uburyo, twakorera hamwe kugira ngo tubashe guteza imbere umwuga wacu. Ikigamijwe ni ukugira ngo ubuzima bwa wa muntu utugana bubashe gufashwa no kugezwa ku rundi rwego rushimishije."

Mu byo baganiraho, harimo ikibazo bavuga ko kiri ku Isi yose cyo kumenya no kwita ku nshingano n’imikoranire hagati y’izindi nzego z’ubuzima.

Dr Hahirwa ati “Isi yose isa n’ikirwana nabyo kugira ngo abanyamwuga mu rwego rw’ubuzima buri wese amenye uruhare rwe kandi bumve ko bagomba gufatanya, umuhanga mu by’imiti yumve ko hari ibyo azi ashobora gufasha umuganga, umuganga yumve ko hari ibyo azi yafasha umuhanga mu by’imiti, ni urugamba tukiri kurwana ariko bari kugenda babyumva.”

Urugaga rwifuza ko abahanga mu by’imiti batanga ubuhanga bwabo ku barwayi ku rwego rwo hejuru rushoboka ntibibe nk’aho uwo muhanga atanga imiti gusa ahubwo ajye atanga inama, bakanifuza ko ahatangirwa imiti hose haboneka umuhanga mu by’imiti nubwo bikiri urugendo rukomeye.

Minisiteri y’Ubuzima itangaza ko kugeza ubu Urugaga rw’Abahanga mu by’Imiti mu Rwanda, rukora neza kugira ngo imiti iboneke kandi igere ku Banyarwanda mu bigo nderabuzima no mu mavuriro bagana.

Umuyobozi Mukuru ushinzwe Ibikorwa by’Ubuvuzi rusange muri Minisiteri y’Ubuzima Dr. Muvunyi Zuberi, avuga ko rufasha kumenya ikoreshwa rikwiye ry’imiti n’ubuziranenge bwayo.

Ati "Ni bo batumenyera ikoreshwa rikwiye ry’imiti, ni bo bamemya ko imiti ibonetse mu gihugu, ko dufite imiti myiza cyangwa ko ifite ikibazo bakayivanaho bakayishyira ku ruhande ubuzima bw’Abanyarwanda bugakomeza bukaba bwiza bakabona imiti ifite ubuziranenge."

Avuga ko igihe hagaragajwe ubushakashatsi busaba ko umuti runaka uva ku isoko cyangwa hari ukenewe nabyo babigiramo uruhare rukomeye.

Ati “Bisaba ko aba banyamwuga bahora bakurikirana bakamenya igikenewe ku nyungu z’abagana amavuriro”.

Umuyobozi wa APAF, Patrice Tagne, yavuze ko kugeza ubu hari ibibazo by’abahanga mu by’imiti bakiri bake ariko ko gihuriweho n’ibindi bihugu ku Isi.

Yavuze ko muri iyi nama hari bubeho kuganira uburyo mu mikorere yabo barushaho gukorana n’izindi nzego kugira ngo icyo cyuho cyoye kugira ingaruka ku barawayi.

Ati “Umubare w’abahanga mu by’imiti ni ikibazo kurusha icy’imiti, ibyo bihagurutsa abantu ku Isi. Ibyo bigomba gutuma abahanga mu by’imiti bagira ubufatanye n’izindi nzego zo mu buzima; abaganga, abajyanama mu by’ihungabana, abaforomo n’abandi. Muri iyi nama turabereka uburyo mu mikorere yabo bakomeza kwigarurira icyizere cy’abarwayi. ”

Abahanga mu by’imiti basaba abarwayi gufata imiti bandikirwa neza kuko iba ifite amabwiriza y’ubuzima yagendeweho bayandikirwa.

Kugeza ubu mu Rwanda umuhanga mu by’imiti umwe yita ku bantu ibihumbi 14, hakifuzwa ko nibura yaba yita ku ibihumbi 10 mu 2025.

Imibare y’Ihuriro ry’Abahanga mu by’Imiti ku Isi (FIP) yo mu 2017 yerekana ko abantu 100 000 bitabwaho n’abahanga muri urwo rwego batageze kuri batanu.

Abahanga mu by'imiti b'Abanyafurika baba mu Bufaransa bitabiriye kuganira ku kunoza umwuga wabo
Abahanga mu by'ubuzima barungurana ibitekerezo bagendeye ku bibazo by'ubuzima byo muri Afurika
Rwabuhungu Mukandabarasa Monique ushinzwe ibikorwa bya za Farumasi, yagaragarije abitabiriye inama uburyo u Rwanda rwatoje abunganira abahanga mu by'Imiti kugeza ku mudugudu (abajyanama b'ubuzima)
Umuyobozi wa APAF, Patrice Tagne, avuga ko abahanga mu by'imiti bagomba gukorana n'izindi nzego z'ubuzima
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza