IGIHE

Urubanza rwa Karasira Aimable rwimuriwe mu Rukiko Rukuru

0 25-11-2022 - saa 17:05, Ntabareshya Jean de Dieu

Urukiko Rwisumbuye rwa Nyarugenge rwemeje bidasubirwaho ko rudafite ububasha rwo gukomeza kuburanisha urubanza rwa Uzaramba Karasira Aimable, ukurikiranyweho ibyaha byo gupfobya no guha ishingiro Jenoside yakorewe Abatutsi.

Mu iburanisha ryo ku wa 18 Ugushyingo 2022 ubwo Karasira yagezwaga imbere y’urukiko, umucamanza yagaragaje ko Urukiko Rwisumbuye rwa Nyarugenge rudafite ububasha bwo gukomeza kubumuburanisha.

Ibi yabishingiye ku kuba ibyaha Karasira Uzaramba Aimable yakoze bishobora kuba biri ku rwego mpuzamahanga cyangwa byambuka imbibi, bityo ko rubyibwirije, rwabisuzuma rugafata icyemezo.

Icyemezo cy’Urukiko cyasomwe kuri uyu wa Gatanu tariki ya 25 Ugushyingo 2022, rwanzura ko nta bubasha rufite rwo kuburanisha uru rubaza rufite, kubera ko ibyaha Karasira yakoze biri ku rwego mpuzamahanga.

Rwahise rutegeka ko urubanza ruregwamo Uzaramba Karasira Aimable, rwohererezwa mu Rukiko Rukuru - Urugereko ruburanisha ibyaha Mpuzamahanga n’ibyambukiranya imbibi ruherereye i Nyanza.

Urukiko rusobanura ko impamvu ishingiye ku kuba uregwa, ibyaha yarabikoreye kuri YouTube kandi bifatwa nk’ibyaha byo ku rwego mpuzamahanga, kandi byarengaga imbibi bikagera no mu bindi bihugu.

Umushinjacyaha yakunze kugaragaza ko ku cyaha cyo guhakana Jenoside, Karasira yatangaje amashusho ku rubuga nkoranyambaga rwa YouTube ahakana Jenoside yakorewe Abatutsi mu 1994, bityo icyo cyaha cyakorewe mu ruhame.

Ni ibiganiro byatambutse ku miyoboro ya YouTube irimo Ukuri Mbona yashinze na Umurabyo TV ya Uwimana Nkusi Agnès.

Ku cyaha cyo guha ishingiro Jenoside, Umushinjacyaha yavuze ko Karasira yavuze ko ihanurwa ry’indege ya Habyarimana ariryo yabaye imbarutso ya Jenoside, ndetse ngo ko abantu bishwe bazize ko abana babo bari baragiye mu Nkotanyi, bagaruka mu gihugu batera amabombe, bituma abari mu gihugu bica ababyeyi babo n’abavandimwe.

Ni ikiganiro ngo cyaciye ku Umurabyo TV, cyongera gutambuka ku Ukuri Mbona.

Mu maburanisha atandukanye yagiye aba, Karasira Aimable yakunze kwanga kuburana asaba ko yahabwa igihe cyo kwifuza kuko afite indwara zirimo n’izo mu mutwe.

Karasira yanavuze ko arwaye ihungabana, ndetse "kuva nafatwa ntabwo nari navuzwa ubuzima bwo mu mutwe."

Karasira wigeze kuba umwarimu muri Kaminuza y’u Rwanda, afungiwe muri Gereza ya Nyarugenge iri Mageragere kuva ku wa 30 Kamena 2021.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza