IGIHE

RRA yahannye abacuruzi 26 batakoresheje EBM uko bikwiye

0 20-06-2022 - saa 14:59, Mugisha Christian

Ikigo cy’Imisoro n’Amahoro (RRA) cyahannye abacuruzi 26 kibaca amande agera kuri miliyoni 25,8 z’amafaranga y’u Rwanda kubera kutubahiriza inshingano zo gukoresha inyemezabwishyu ya EBM nk’uko bikwiye.

Ikigo cy’Imisoro n’Amahoro kigenda gikora ibikorwa byo kunenga bamwe mu bacuruzi badakoresha neza EBM mu kunoza imitangire y’umusoro ku nyongeragaciro (TVA).

Mu itangazo ryashyizweho umukono na Komiseri Mukuru w’Ikigo cy’Imisoro n’Amahoro (RRA), Bizimana Ruganintwali Pascal, hagaragaramo urutonde rw’abacuruzi n’ibihano bya buri wese kubera kudakoresha neza EBM.

Urutonde rwatangajwe ku wa 17 Kamena 2022, ruriho abacuruzi 26 batubahirije inshingano zo gukoresha EBM ndetse n’abacuruzi icyenda bakoze amakosa yo gutubya umusoro.

Mu bacuruzi 17 bakoze amakosa yo kudatanga inyemezabwishyu ya EBM mu bucuruzi bwabo, umunani muri bo bahanishijwe amande yikubye inshuro 10, umwe ahanishwa ayikubye kabiri, undi umwe ayikubye inshuro enye naho abandi barindwi bahanishwa amande yikubye inshuro 20 by’umusoro wose wari wanyerejwe.

Uwaciwe amande ari hejuru ni sosiyete yaciwe miliyoni 9,4 Frw nyuma yo gukuba inshuro 20 umusoro wari wanyerejwe, bivuze ko hanyerejwe amafaranga ibihumbi 474.101 Frw.

Ku ruhande rw’abacuruzi bakoze amakosa yo gutubya umusoro bagatanga inyemezabubwishyu zidahwanye n’ibyo abaguzi bakuye mu maduka, harimo batatu bahanishijwe amande yikubye kabiri, bane bahanishijwe amande yikubye inshuro 10 ku musoro wari wanyerejwe abandi babiri bahanishwa amande yikubye inshuro 20.

Uwaciwe amande menshi mu batubije umusoro ni umucuruzi waciwe amande y’ubwikube bwa 20 ku musoro w’amafaranga ibihumbi 61.017Frw wari wanyerejwe.

Amande yose yaciwe aba bacuruzi bagaragazwa na RRA ni amafaranga asaga miliyoni 25 Frw.

Mu 2013 ni bwo mu Rwanda hatangijwe gahunda yo gutanga inyemezabwishyu mu buryo bw’ikoranabuhanga, EBM.

RRA igaragaza ko gushyira ahagaragara urutonde rw’abacuruzi badakoresha neza EBM bigamije gukangurira abandi batazikoresha kurushaho kubyitabira cyane ko umucuruzi utayikoresha ahanwa hakurikijwe ibyo itegeko ribiteganya.

Mu 2019, hasohotse itegeko rigena ko n’abantu batabaruye muri TVA batangira gukoresha EBM mu bikorwa byabo bya buri munsi.

RRA kandi yakanguriye abaguzi bose gusaba inyemezabwishyu ya EBM ndetse bakibuka no kugenzura ko amafaranga bishyuye ahuye n’ayanditse ku nyemezabwishyu bahawe.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza