IGIHE

Gitega: Impuruza ku badandaza inyama mu muhanda batazi aho zabagiwe

0 6-06-2022 - saa 17:55, Thamimu Hakizimana

Abatuye mu Murenge wa Gitega mu Karere ka Nyarugenge n’abacuruzi b’inyama muri muri aka gace, bavuga ko bahangayikishijwe cyane n’abantu basigaye badandariza inyama mu mihanda batazi aho zaturutse.

Bamwe mu baganiriye na IGIHE, bavuze ko iyi ngeso yadutse nyuma y’aho inyama zikomeje kuba ingume ku isoko.

Iki kibazo cy’inyama cyakomejwe n’indwara y’ubuganga yibasiye uduce twinshi turimo Intara y’Iburasirazuba itanga amatungo menshi y’inyama mu gihugu, kuko twinshi turi mu kato.

Ibi byatumye bamwe mu baturage bo mu Murenge wa Gitega cyane cyane abo hafi y’ibagiro riherereye aka gace batangira kudandaza inyama ku muhanda abantu batazi aho ziba zabagiwe.

Bamwe mu batuye muri aka gace babwiye umunyamakuru ko bakemanga ubuziranenge bw’izi nyama.

Byiringiro Innocent yagize ati “Mudufashije mwadukorera ubuvugizi kuko iki kibazo kimaze gufata indi ntera. Uzi ko unyura mu nzira ukabona umuntu yashyize inyama ku muhanda nka kwa kundi inyanya n’intoryi na karoti bicururizwa ku dutaro?”

Byukusenge Marie Claire, yavuze ko hatagize igikorwa izi nyama zishobora gutera abantu indwara.

Yagize ati “Wabwirwa n’iki ko izo nyama badandaza atari iz’imbwa? Hari abantu wari wabona badandaza inyama ko tuba tutazi n’aho bazibagiye?”

Yakomeje asaba ubuyobozi bw’uyu murenge gukoresha uko bushoboye mu kurwanya ubu bucuruzi.

Umwe mu bacuruza inyama muri Boucherie iherereye muri aka gace utifuje ko amazina ye atangazwa, yabwiye IGIHE, ko nabo babangamiwe n’abacururiza inyama mu muhanda kuko bibahombya.

Umunyamabanga Nshingwabikorwa w’Umurenge wa Gitega, Mugambira Etienne, yavuze ko iki kibazo cy’abadandaza inyama ku muhanda bakizi ndetse bagihagurukiye.

Yagize ati “Buriya bucuruzi bwo mu kajagari bukorwa n’abantu baba bakuye inyama mu ibagiro rya Nyabugogo kuko ababazi baririmo usanga baziba bakazinyuza ku ruhande bakaziha abagore babo . Bariya bazicuruza hanze usanga bafite abagabo bakora mu ibagiro.”

Yongeyeho ko nyuma yo kubona iki kibazo batangiye kurwanya aka kajagari. Ngo basigaye bazindukira hafi y’ibagiro kugira ngo bakumire abakura izo nyama mu ibagiro ariko banafata abazicuruza.

Kurya inyama zidapimye cyangwa bitazwi neza aho zabagiwe bishobora gutera ikibazo abazirya kuko ubuziranenge bwazo buba butizewe.

Ubuyobozi bwiyemeje guhashya abacuruza izi nyama kuko bitemewe kuzicururiza hanze
Usanga bamwe bicaye imbere y'amabaraza bahacururiza inyama bitazwi aho zaturutse
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza