IGIHE

U Rwanda rwinjije miliyoni 52 z’amadolari mu nama rwakiriye mu 2018

9 11-01-2019 - saa 12:23, Cyprien Niyomwungeri

Hashize imyaka isaga itanu Guverinoma y’u Rwanda yihaye intego yo kwagura ubukerarugendo hibandwa ku kwakira ibiganiro, inama mpuzamahanga n’ibikorwa bitandukanye, byiswe MICE mu magambo ahinnye y’Icyongereza.

Intego ni uko rwinjiza amadolari asaga miliyoni 150 buri mwaka aturutse muri iyi gahunda.

Ikigo cy’Igihugu cy’Iterambere (RDB), cyatangaje ko hari icyizere cyo kugera kuri iyi ntego kuko ‘mu 2018 u Rwanda rwakiriye inama 201 zitabiriwe n’abarenga 35 000, zikinjiza miliyoni 52 z’amadolari’.

Mu nama zikomeye u Rwanda rwakiriye umwaka harimo iyasinyiwemo amasezerano ashyiraho isoko rusange rya Afurika (AfCFTA), azatuma Afurika ihurira ku isoko rya miliyari imwe na miliyoni 200 z’abaturage bayituye, ndetse izamure ubucuruzi bukorwa hagati y’ibihugu bya Afurika.

Hari inama ku kuboneza urubyaro yitabiriwe n’abagera ku 3000 baganira ku byiza byakozwe, kwishimira ibyagezweho no kureba ibigikenewe muri uru rwego, inama y’ubuyobozi bw’Ishyirahamwe ry’umupira w’amaguru ku Isi (FIFA), inama mpuzamahanga yiga ku ikoranabuhanga muri Afurika (Transform Africa Summit 2018) yitabiriwe n’abasaga ibihumbi bine.

U Rwanda kandi rwakiriye inama mpuzamahanga y’Ihuriro Next Einstein Forum (NEF) yiga ku bumenyi bushingiye ku mibare, Inama ihuza urubyiruko rw’inkorokoro mu ikoranabuhanga ku mugabane wa Afurika, YouthConnekt Africa Summit 2018, yitabiriwe n’abagera ku 3000.

Habereye kandi igikorwa cyiswe Mo Ibrahim Governance Weekend, inama y’Ihuriro Nyafurika rigamije guteza imbere ubuhinzi, AGRF n’izindi.

Imibare igaragaza ko umusaruro w’ubukerarugendo bushingiye ku kwakira inama n’ibikorwa mpuzamahanga ugenda wiyongera cyane. Mu 2010 wari 17, 863, 560 z’amadolari, mu 2013 wari miliyoni zisaga 23 z’amadolari, 2014 wari miliyoni zisaga 29 z’amadolari, mu 2015 wageze kuri miliyoni zisaga 37 z’amadolari.

Mu 2016 wageze kuri miliyoni 47 z’amadolari mu 2017 zigera kuri miliyoni zirenga 41 z’amadolari. Umwaka ushize ubukerarugendo bushingiye ku kwakira inama bwinjije miliyoni 52 z’amadolari, bivuze ko hiyongereyeho miliyoni 11 z’amadolari.

Iyi gahunda ya MICE kandi yatumye abaza mu Rwanda bitabiriye inama n’ibikorwa mpuzamahanga gusa biyongera kuko mu 2010 bari 13 533, mu 2015 baba 23 804, mu 2017 bagera ku 28 306, mu gihe mu mwaka ushize barenze 35 000.

Igikomeje gukurura abantu benshi ni ibikorwa remezo bibereye kwakira inama nk’inyubako ya Kigali Convention Centre, yiyongereye ku mazina ya hoteli zikomeye ku rwego mpuzamahanga nka Marriott, Radisson Blu, Park Inn n’izindi.

Imibare y’Ikigo cy’Igihugu cy’Iterambere (RDB) yo mu 2018 igaragaza ko mu Rwanda hari ibyumba bya hoteli 14 866, birimo 8183 mu Mujyi wa Kigali na 6683 mu ntara.

Mu 2017 Ikigo gishinzwe kumenyekanisha ubukerarugendo bushingiye ku nama mu Rwanda, cyateguye inama n’ibikorwa birenga 46, uyu mwaka byariyongereye cyane kuko bigera kuri 201.

Ishyirahamwe Mpuzamahanga rishinzwe ibyo gutegura Inama zikomeye (ICCA), riherutse gushyira u Rwanda ku mwanya wa gatatu muri Afurika, nka hamwe mu hantu hakunzwe n’abategura inama mpuzamahanga mu 2016.

Aha naho hagaragara impinduka zikomeye kubera MICE kuko mu 2013 rwari ku mwanya wa 21, mu 2014 ruba urwa 13, n’urwa karindwi mu 2015.

RDB itangaza ko kuba u Rwanda ruri ku mwanya mwiza mu kwakira inama mpuzamahanga, ari umusaruro wo kuba abanyamahanga basigaye bahabwa visa bageze mu Rwanda ndetse n’indege ya RwandAir isigaye yerekeza ahantu henshi ku Isi ikorohereza benshi kuza mu Rwanda.

Hari kandi no kuba kompanyi Mpuzamahanga zikorera i Kigali nka KLM, Brussels Airlines, Qatar Airways, Turkish Airlines na Kenya Airways.

Inyubako ya Kigali Convention Centre ikomeje gukurura abategura inama mpuzamahanga
Park Inn ni izina mpuzamahanga mu by'amahoteli riri ku isoko ry'u Rwanda kandi ryishimirwa n'abitabiriye inama muri Kigali
Marriott Hotel ni indi hotel y'izina rikomeye ifite ibikorwa mu Rwanda
Aho gufatira amafunguro hatuje kandi hatekanye naho hajyana n'ibi bikorwaremezo
Radisson Blu Hotel yishimirwa cyane n'abitabiriye inama mu Rwanda
Onomo Hotel ni izina rishya mu Rwanda rimaze kwigarurira imitima ya benshi bitewe n'aho iyi hotel yubatse
Bisate Lodge ikundwa cyane n'abajya gusura ingagi zo mu birunga
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Yaya 2019-01-21 07:05:59

Mujye mutubwira ikiguzi byatwaye (Cost of sales) kugirango tumenye inyungu uko ingana (Net Profits). Naho ubundi amakuru atangwa yaba atuzuye. Byaba bibabaje warashoye 100 Mio ukinjiza 52 Mio bwacya ugakora umunsi mukuru ngo winjije 52 Mio.

2
Bwenge 2019-01-12 13:59:55

Wowe yitwa Kiiza uri Kiibi uri na Kiigoryi niyo mpamvu wandika imvaho...niba utari ikigoryi ubu ubona ubima bubi abanyarwanda benshi nabayemo arubwo kuza ubaratira ko wungutse kandi bamwe bamaze amezi abiri badahembwa? Ibi ninkokuva guhembwa ukagenda ubwira uwariwe wese ko wahembwe kandi mubo ubibwira ubizi neza ko utari bubishyure ayo ubafitiye. None uravuga ubusa gusa utera iseseme abantu

3
toto 2019-01-12 03:16:24

Ntimukabivuge cyane mudatuma Arsenal iza gusaba kongera amasezerano

4
Marcelline 2019-01-12 01:20:38

Ariko izo miliyoni zose mudutangariza mujya munibuka kuzishyuraho umwenda wa miliyoni zisaga 300 z’amadolari zubatse KOMVENSHONI?! Niba mwarayungutse koko mwishyuyemo angahe?!

5
Kiiza 2019-01-11 14:08:38

Ariko abanyarwanda tugira amatiku no kwikunda bikabije ndetse rimwe na rimwe bijyana n’ubujiji.

Abavuga ko ntacyo byamariye abanyarwanda, mutekereza ko abanyarwanda tungana iki? Turi 13million ntashyizemo inda zitagira umubare zitwitwe n’abana hirya no hino mugihugu.

Niba izo nama zitanga akazi, abakozi bo mubikoni n’abakira abantu bakabona ibyo gukora, iyo ni inyungu kuri twese.

Igihe cyose ibyakozwe byagiriye umunyarwanda umwe cyangwa benshi akamaro, biba byakangiriye nange.

Ntabwo twese twagerwaho n’impinduka ako kanya. Gusa kwishimira ibyo abandi bagezeho bigomba kuba umuco.

Abadahembwa si uko igihugu gikennye kuko na nyuma gato ya génocide barahembwaga kandi ntibyigeze bihagarara.

Mureke amatiku mwubake, twishimire ibyo dufite, twitange kandi

Twige kwishimira ibyo abandi bagezeho. Nanga amatiku yacu ameze nk’aya abarozi.

6
Félix Kabura 2019-01-11 10:05:27

Mutere imbere nk’umuzinga kuko mufise vision nziza y’ukubaka.Igihugu canyu,Imana ibakomeze,

7
Ukuri 2019-01-11 08:37:40

Wowe wanditse iyi nkuru urabeshya kuko ntago. Leta yakinjiza ako kayabo ngo inanirwe guhemba bamwe m’abakozi bamaze amezi atatu badahembwa Cg ngo ibure kwishyura abakosoye ibizamini ... Ntimukabeshye ahubwo iyo uvuga ko leta yahombye ayo mafaranga ... Twemere ko leta ikinnye nkuko natwe rubanda dukennye

8
Ukuri 2019-01-11 08:35:41

Wowe wanditse iyi nkuru urabeshya kuko ntago. Leta yakinjiza ako kayabo ngo inanirwe guhemba bamwe m’abakozi bamaze amezi atatu badahembwa Cg ngo ibure kwishyura abakosoye ibizamini ... Ntimukabeshye ahubwo iyo uvuga ko leta yahombye ayo mafaranga ... Twemere ko leta ikinnye nkuko natwe rubanda dukennye

9
hishamunda 2019-01-11 05:41:34

Ni byiza gutangaza ibyinjiye ariko mbona byaba byiza kurushaho mugiye munatangaza icyo byahinduye ku buzima bw’abaturage. Bishobora kwinjira ari byinshi ariko biramutse ntacyo bihinduye gifatika ku mibereho y’umuturarwanda ntacyo byaba bimaze. Ngira ngo no mu mihigo duhiga mu kazi kacu icyibandwaho ni ukureba icyo ibyagezweho byamariye umuturage.

Kwamamaza