IGIHE

Ikibuga cy’indege cya Bugesera, gari ya moshi, imihanda- Imishinga y’ubwikorezi ihanzwe amaso

17 21-05-2019 - saa 14:13, Cyprien Niyomwungeri

Guverinoma y’u Rwanda yashyize imbaraga mu kubaka ibikorwa remezo, birimo imihanda mishya, gusana ishaje ndetse no kwagura iyari mito kugira ngo irusheho gusembura iterambere ry’ubukungu bw’abaturage n’ubw’igihugu muri rusange.

Hari imihanda imaze gukorwa hirya no hino mu gihugu kandi yahinduye ubuzima bw’abaturage nk’uwa Kivu Belt, iyo mu zindi ntara n’Umujyi wa Kigali n’indi y’ubuhahirane ihuza uturere n’imirenge.

Uretse iyamaze kubakwa, hari n’indi irimo ndetse n’iteganyijwe ku buryo mu gihe gito izaba yamaze kuzura. Aha harimo iya kaburimbo isanzwe n’indi izashyirwamo iyoroheje.

Mu kiganiro Zinduka cyatambutse kuri Radio 10, Umunyamabanga wa Leta muri Minisiteri y’Ibikorwa Remezo, ushinzwe ubwikorezi, Eng. Uwihanganye Jean de Dieu, yagarutse ku mishinga y’ibikorwa remezo by’ubwikorezi u Rwanda rufite irimo imihanda n’imishinga minini nk’ikibuga cy’indege mpuzamahanga cya Bugesera n’umuhanda wa gari ya moshi.

Yavuze ko mu Ntara y’Iburasirazuba hari umuhanda wa Kagitumba-Kayonza-Rusumo, urimo gukorwa ugeze kuri 80%, ndetse ukazaba uriho n’amatara. Hari undi muhanda wa Ngoma-Bugesera, watangiye gukorerwa inyigo, ukaba uzatangira kubakwa vuba.

Ati “Ni umushinga u Rwanda rufatanyije n’u Buyapani. Twatangiye inyigo, izarangira mu Ukuboza, dutangire amasoko ku buryo muri Gashyantare tuzatangira kuwukora ukamara imyaka ibiri, turatekereza ko muri 2022, uzaba wararangiye”.

Umuhanda uva Bugesera-Nyanza, hamaze gusinywa amasezerano na rwiyemezamirimo, akaba yarasabwe gutangira kuwubaka muri Nyakanga.

Huye-Kitabi, ni undi muhanda urimo kwagurwa ukazanashyirwaho amatara, ukaba ugeze kuri 80%. Wari metero esheshatu ubu urimo kugirwa zirindwi z’ubugari.

Umuhanda Huye-Gisagara, ureshya na kilometero 13, ugeze kuri 30%, uzarangira mu Ugushyingo uyu mwaka. Hari kandi umuhanda Matyazo-Kibeho, ubu ugeze ku 10%. Uyu uzava i Huye-Kibeho-Munini ukomeze ugere ahitwa Ngoma. Uzahuza kaburimbo yo ku Akanyaru n’iyo mu Mujyi wa Huye.

Eng. Uwihanganye avuga ko muri gahunda yo kubaka imihanda izenguruka ikiyaga cya Kivu [Kivu Belt], ubu hari umuhanda uva Bralirwa ukagera kuri Marines, ugeze kuri 5%, ukaba uzatangizwa ku mugaragaro mu byumweru bibiri biri imbere.

Hari uturuka kuri Bralirwa-Pfunda, nawo uzatangizwa ku mugaragaro mu byumweru bitatu biri imbere, uyu ukazajya ukoreshwa n’amakamyo.

Mu Karere ka Rutsiro hari umuhanda ujya Murunda, hamaze kuboneka rwiyemezamirimo uzawutangira mu kwezi kumwe. Umuhanda Muhanga-Rubengera, wamaze kubona rwiyemezamirimo, ikigezweho ni ugusinya amasezerano ku buryo muri Nyakanga uzatangira gutunganywa.

Urimo ibice bibiri; icya Rubengera-Nyange, nicyo kizatangira mbere, ikindi cyo kuva Nyange gukomeza kugera ku kiraro, nacyo harimo gutangwa masoko ku bufatanye bw’u Rwanda n’Abarabu, nacyo kikazatangira muri Nzeri uyu mwaka.

Eng. Uwihanganye ati “Iyi mihanda yose mvuga turayubaka kuko ari imihanda minini y’igihugu tukayishyiraho n’amatara”.

Akomeza avuga ko umuhanda uva Karongi-Gitwe-Ruhango-Nyanza, barimo gushakisha amafaranga hamaze kuboneka igice cyayo, bagiye gutangira ibijyanye no gushaka rwiyemezamirimo ku buryo muri Mutarama 2020, nawo uzaba warubatswe.

Mu Majyaruguru harimo gukorwa umuhanda Base-Rukomo, hari n’uva mu Rukomo-Nyagatare ugeze kuri 30%. Hari uwa Base-Butaro-Kidaho, hari gushakishwa rwiyemezamirimo ku buryo mu mezi abiri ari imbere cyangwa atatu azaba yabonetse, agatangira imirimo.

Umuhanda Nyacyonga-Tumba-Mukoto nawo harimo gushakishwa amafaranga mu Barabu, ukazatangira mu 2021. Hari kandi imihanda irimo ikorwa mu mijyi yunganira Kigali, imaze kuzura ingana na kilometero 30, hagiye gukorwa izindi zigera kuri 50 muri iriya mijyi.

Imihanda y’igitaka mu marembera

Eng. Uwihanganye yavuze ko Guverinoma y’u Rwanda yafashe icyemezo ko imihanda y’igitaka itazongera kubakwa kuko ikorwa ariko ugasanga nyuma y’imyaka ibiri cyangwa itatu yasenyutse, ikaba izasimbuzwa kaburimbo yoroheje.

Ati “Kuba ari umuhanda w’igitaka buriya kiba gifite santimetero 15 uko wagitsindagira kose buri mwaka santimetero 5 ziragenda, ni ukuvuga ko mu myaka itatu uba ugomba kuwusubiramo”.

U Rwanda rumaze kubaka kilometero 2000 z’imihanda y’igitaka mu gihugu hose zagiyemo hafi miliyari 200 Frw. Inyigo nto yakorewe mu Ntara y’Amajyaruguru yagaragaje ko 50% by’imihanda y’igitaka yubatswe yose bisaba kongera kuyubaka bundi bushya.

Eng. Uwihanganye ati “Niyo mpamvu twahisemo nk’igihugu kandi byaranemejwe n’Inama y’Abaminisitiri iheruka ko uko ubushobozi bugenda buboneka twava mu mihanda y’igitaka tukayisimbuza kaburimbo yoroheje”.

Umuhanda w’igitaka watwaraga miliyoni 100Frw ku kilometero mu gihe kaburimbo yoroheje ujya hagati ya miliyoni 150 na 200 Frw. Uburambe kandi burarutanwa kuko uw’igitaka umara imyaka itatu mu gihe uwa kaburimbo yoroheje umara imyaka hagati ya 8 na 10.

Eng. Uwihanganye avuga ko iyi gahunda yo kubaka kaburimbo yoroheje izatangira ‘umwaka utaha, hari uturere 6 tuzatangiriramo kilometero 200; Nyagatare, Gatsibo, Nyabihu, Gakenke, Rutsiro na Nyaruguru”.

Hari n’amafaranga ya leta agiye gukoreshwa mu gutangira imwe mu mihanda y’ibitaka igahindurwamo imihanda yoroheje”.

Ubu buryo buzafasha cyane abaturage by’umwihariko abatuye mu mijyi nka Kigali kugira uruhare mu kwiyubakira imihanda. Abaturage bazajya bishyira hamwe leta ibunganire bubakirwe imihanda yoroheje.

Gari ya moshi

Inteko Ishinga Amategeko y’u Rwanda iherutse kwemeza umushinga w’itegeko ryemera kwemeza burundu amasezerano hagati y’u Rwanda na Tanzania, yerekeye ubufatanye mu ishyirwa mu bikorwa ry’umushinga w’inzira ya Gari ya Moshi, Isaka-Kigali, yashyiriweho umukono i Kigali ku wa 09 Werurwe 2018.

Ni umushinga ukomeye wo kubaka umuhanda wa Gari ya Moshi uzaba ureshya n’ibilometero 532 ukazatwara akayabo ka miliyari 3.6 z’amadorali ya Amerika.

Uyu muhanda wa Gari ya Moshi ufite kilometero 532 muri rusange, ku ruhande rw’u Rwanda uzava Rusumo ugere mu Mujyi wa Kigali ariko haziyongeraho agace kagera ku Kibuga cy’Indege cya Bugesera.

Ku ruhande rw’u Rwanda uyu muhanda uzaba ureshya na kilometero 138 mu gihe ku ruhande rwa Tanzania ari kilometero 394.

Wose hamwe uzatwara miliyari 3.6 z’amadorali ya Amerika. Ku gice cya Tanzania ni miliyari 2.3 naho ku Rwanda ni miliyari 1.3 z’amadorali.

Ni umuhanda uzajyamo gari ya moshi igenda kilometero 120/h mu gihe itwaye abagenzi na 180/h mu gihe itwaye ibicuruzwa. Ikazaba ari gari ya moshi y’umuriro.

Eng. Uwihanganye yatangaje ko igikurikiyeho ari ukumvikana uburyo amafaranga yo kubaka yashakwa. Harimo uburyo bwo gufatanya n’abikorera, kuba leta zombi zaguza zikabona amafaranga zikubaka, bikaba ari byo biganirwaho hagati y’ibihugu.

U Rwanda na Tanzania birimo kuganira ku buryo bwo kubona miliyari 3.6 z'amadolari yo kubaka umuhanda wa gari ya moshi

Ikibuga cy’Indege cya Bugesera

Eng. Uwihanganye yavuze ko imirimo yo kubaka ikibuga mpuzamahanga cy’indege cya Bugesera igeze hafi kuri 27%, ariko itacyihuta nk’uko yatangiye kuko hatangiye gusubiramo inyigo.

Inyigo yasubiwemo yateganyaga ko ikibuga cy’indege cyari cyaratangiye kubakwa kizafungura gifite ubushobozi bwo kwakira abantu miliyoni 1.7 ku mwaka, cyakuzura hakubakwa ibindi byiciro kugeza kigize ubushobozi bwo kwakira abantu miliyoni eshanu ku mwaka z’abagenzi.

Muri uku kubaka, ikibuga cy’indege cya Kigali cyagize gukura cyane bitewe no gutera imbere kwa RwandAir, ku buryo ubu kiri hafi kugeza kuri miliyoni y’abagenzi ku mwaka. Bivuze ko bishoboka cyane ko icya Bugesera cyafungurwa n’icya Kanombe kigeze kuri miliyoni 1.7.

Eng. Uwihanganye ati “Turavuga ngo reka twubake igikorwa remezo kinini, cyiza cyo ku rwego rwo hejuru. Duhitamo gusubiramo inyigo duhuza bya byiciro bitanu cyari kubakwamo”.

Avuga ko inyigo izarangira muri Kanama akaba ari bwo hazamenyekana ubunini ikibuga kizaba gifite n’amafaranga gikeneye n’igihe kucyubaka bizatwara.

Eng. Uwihanganye asobanura ko ikibuga cya Bugesera nicyuzura icya Kanombe, hari inyigo y’uko kizakoreshwa mu bikorwa birimo ‘kwiyereka kw’indege’, aho u Rwanda rushaka guhagararira imurika ry’indege muri Afurika.

Mu Rwanda hari ishuri ryigisha abana gutwara indege, ariko hari ikibazo cyo kwigisha harimo n’ingendo z’indege. Kuzura kw’ikibuga cy’indege cya Bugesera bikazatuma n’abiga gutwara indege bakoresha icya Kigali bisanzuye.

Ikibuga cy'Indege cya Bugesera kirimo guhindurirwa inyigo ku buryo muri Kanama izaba yarangiye
Ikibuga cy'Indege cya Bugesera kizubakwa cyose aho kuba mu byiciro nk'uko byari biteganyijwe
Imiterere y'Ikibuga cy'Indege cya Bugesera mbere yo guhindura inyigo
Imihanda izenguruka ikiyaga cya Kivu izwi nka Kivu Belt yarakozwe ariko hari indi iteganyijwe
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2  

1
bizimana 2019-06-09 04:21:37

None se uyu muhanda Nyacyonga-Tumba-Mukoto nta deviation ibayeho kuko wakagombye kwitwa:Nyacyonga-Mbogo-Mukoto!

2
Kayitesi 2019-05-28 17:22:48

NTAKO BISA banyarwanda ayo mahirwe tuyabyaze Umusaruro twubake Imiturirwa yaza Hotels zinyuranye n Imangazini ZA Sociyeti zikomeye etc byerekeza iyo . ENGEN SHELL TOYOTA ETC.MARRIOT ETC...

3
Jane 2019-05-22 23:40:01

Natwe mutwubakiye umuhanda uva mu karere ka rwamagana,umurenge wa nyakaliro werekeza ahitwa I kabuga muri Kigali mwaba mukoze

4
Jamali 2019-05-22 22:36:55

Rwanda oyeeee!uwapfuye yarihuse pe!ndashima cyane umwanditsi wiyi nkuru

5
Braise 2019-05-22 17:23:53

Bizaba bishimishije byose nibyubakwa nkuko mubivuze ariko icya SGR Kigali-Isaka byo bizaba nka ya mabati babeshye abanyabugesera.

6
Murwanashyaka jean paul 2019-05-22 02:07:29

murakoze cyane nukuri najye nari naryohewe pee gusa najye harundi muhanda nabazaga nabonye utavuzwe haruguru kandi nabonye wari waratangiye gukorwa wa zindiro-masizi-kugera gasanze wo ntimwatumenyera aho bigeze murakoze

7
john paul 2019-05-22 01:18:00

Dore inkuru ahubwo!

8
me1 2019-05-22 00:33:24

Rwanda yacu komeza uterimbere love u my PREZO byose tubikesha Imana nawe urimpfura nziza

9
Oscar 2019-05-22 00:06:36

Iyi nkuru Ni nziza kabisa! Ese umuhanda Nyamagabe-Nyanza wo ni ryari ko abaturage bigeze kubisaba Nyakubahwa Perezida was Repuburika?

10
Ineza Joseph 2019-05-21 22:01:37

iryo shuri ryigisha gutwara indege riba hehe mu Rwanda?

Paji: 1 | 2  

Kwamamaza