IGIHE

U Bushinwa bwahaye u Rwanda inkunga ya miliyari 59 Frw, bunarusonera umwenda wa miliyari 5 Frw

0 19-02-2021 - saa 14:13, Ishimwe Israel

Repubulika y’u Bushinwa yahaye Guverinoma y’u Rwanda inkunga ya miliyoni 60 z’amadolari, akabakaba miliyari 59 Frw, inarukuriraho umwenda wa miliyari 5,9 Frw ku ideni rwari rubufitiye.

Amasezerano hagati y’ibihugu byombi mu bijyanye n’imikoranire mu by’ubukungu n’ibya tekiniki yashyizweho umukono na Minisitiri w’Imari n’Igenamigambi, Dr Ndagijimana Uzziel na Ambasaderi w’u Bushinwa mu Rwanda, Rao Hongwei, kuri uyu wa 19 Gashyantare 2021.

Aba bayobozi bombi basinye amasezerano y’inkunga ingana na miliyari 59 Frw, n’ikurwaho ry’umwenda wa miliyari 5,9 Frw, mu mafaranga u Rwanda rwagombaga kwishyura u Bushinwa.

Minisitiri Ndagijimana yatangaje ko inkunga bahawe ari ingenzi cyane muri iki gihe u Rwanda ruhanganye n’icyorezo cya Coronavirus.

Yagize ati “Twishimiye iyi nkunga ya Guverinoma y’u Bushinwa muri ibi bihe bigoye byatewe n’icyorezo cya COVID-19. Gukuraho umwenda bizarengera ubushobozi bwari gukoreshwa mu kwishyura uwo mwenda.’’

Yavuze ko inkunga yatanzwe n’u Bushinwa ari ingenzi ndetse izakoreshwa mu mishinga izemeranywaho n’impande zombi.

Yakomeje ati “Ndashimira u Bushinwa ku nkunga bukomeje gutanga n’imikoranire dufitanye mu nzego nini z’iterambere ryacu cyane cyane ubwikorezi, ubuhinzi, ubuzima, uburezi n’ingufu.’’

Ambasaderi w’u Bushinwa mu Rwanda, Rao Hongwei, yavuze ko umubano w’ibihugu byombi warushijeho kuba mwiza kuva mu myaka itatu ishize.

Yagize ati ‘‘U Rwanda n’u Bushinwa ni inshuti magara, ibihugu by’ibifatanyabikorwa bikaba n’ibivandimwe. Kuva Perezida w’u Bushinwa, XI Jinping, agiriye uruzinduko rw’amateka mu Rwanda mu 2018, umubano uhuriweho hagati y’ibihugu wakomeje kuzamuka, ndetse hananozwa imikoranire by’umwihariko mu bijyanye n’ubukungu bwarushijeho gutezwa imbere.’’

U Bushinwa bwizera ko inkunga y’inyongera y’amafaranga bwahaye u Rwanda izarufasha mu rugendo rwarwo rwo kwiyubaka no guhangana n’ingaruka zatewe na COVID-19.

Ambasaderi Rao Hongwei yavuze ko amasezerano yashyizweho umukono ashimangira ubucuti bwuzuye n’inkunga ikwiye u Bushinwa buha u Rwanda.

Yijeje ko ‘‘Muri ibi bihe by’amahirwe mashya kandi bigoye, twiteguye gukorana n’inshuti zacu z’Abanyarwanda mu kubyaza umusaruro ayo mahirwe no kubaka umubano uhamye w’u Rwanda n’u Bushinwa mu gihe kizaza.’’

Kuva mu 1971, u Bushinwa n’u Rwanda bifitanye umubano mu bya dipolomasi, ushingiye ku bwubahane n’ubucuti.

U Bushinwa ni umufatanyabikorwa ukomeye w’u Rwanda mu bijyanye n’ubucuruzi, umutekano, uburezi n’ibikorwa remezo.

Amateka agaragaza ko ibigo byo mu Bushinwa byabengutswe u Rwanda mu myaka myinshi ishize, kuko nka China Civil Engineering Construction Corp, gishamikiye kuri leta y’icyo gihugu cyohereje abakozi bacyo bwa mbere mu Rwanda mu 1983, maze imwe mu mishinga yacyo ya mbere ibamo kubaka Stade Amahoro yuzuye mu 1986 kuri miliyoni $21. Ni imishinga yiyongera kuri miliyoni z’amadolari icyo gihugu cyagiye kiguriza u Rwanda n’inkunga kiruha.

Mu 2019, Guverinoma y’u Rwanda yatangaje ko nta mpungenge itewe n’umwenda ibereyemo Leta y’u Bushinwa, nyuma y’iminsi hasohotse amakuru avuga ko uzatuma rutabasha gutanga serivisi z’ibanze zigenerwa abaturage.

Icyo gihe, Guverinoma yagaragaje ko amadeni u Rwanda rufitiye u Bushinwa, ari munsi ya 5% by’amadeni yose igihugu gifite.

Minisitiri w’Imari n’Igenamigambi, Dr Ndagijimana Uzziel na Ambasaderi w’u Bushinwa mu Rwanda, Rao Hongwei, bashyira umukono ku masezerano y'inkunga
U Bushinwa bwahaye u Rwanda inkunga ya miliyari 59 Frw, bunarusonera umwenda wa miliyari 5 Frw
Minisitiri Dr Ndagijimana Uzziel na Ambasaderi Rao Hongwei bari bafite akanyamuneza nyuma yo gushyira umukono ku masezerano y'inkunga u Bushinwa bwahaye u Rwanda
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza