IGIHE

RRA yiyemeje kwishyura umwenda wa miliyari 21 Frw ibereyemo abacuruzi

0 13-05-2022 - saa 11:09, Akayezu Jean de Dieu

Komiseri Mukuru w’Ikigo cy’Igihugu gishinzwe Imisoro n’Amahoro, Bizimana Ruganintwali Pascal, yavuze ko iki kigo gikomeje gukora ibishoboka byose ngo kibashe kwishyura abacuruzi agera kuri miliyari 21 Frw bagombaga gusubizwa nyuma yo kwishyura umusoro ku nyongeragaciro.

Ni ibyatangajwe mu ntangiro z’iki Cyumweru ubwo abayobora inzego z’abikorera abikorera bo mu Rwanda bari bahuriye mu mwiherero i Nyamata mu Karere ka Bugesera.

Ubusanzwe umusoro ku nyongeragaciro wishyurwa n’umuguzi wa nyuma. Ni ukuvuga ko nk’umucuruzi uranguza, iyo aranguje ibintu akabigurisha n’umuntu ugiye gucuruza muri ‘Super Market’ aba yishyuye umusoro ku nyongeragaciro.

Uwo ucuruza ‘Super Market’ na we iyo acuruje n’umukiliya akamwishyura na we mu mafaranga yishyura haba harimo umusoro ku nyongeragaciro. Ni ukuvuga ko umusoro ku nyongeragaciro uba wishyuwe kabiri.

RRA ivuga ko amafaranga wa mucuruzi wa ‘Super Market’ yishyuye nk’umusoro ku nyongeragaciro, ayasubizwa kuko n’umuguzi wa nyuma aba yishyuye umusoro ku nyongeragaciro.

Kugira ngo uwo mucuruzi asubizwe ayo mafaranga y’umusoro ku nyongeragaciro arabimenyekanisha muri RRA, ubundi akayasubizwa.

Mu kiganiro cyatanzwe na Komiseri Mukuru wa RRA, Bizimana Ruganintwali Pascal hagaragajwe ko hari abacuruzi batandukanye mu gihugu bamaze kumenyekanisha ayo mafaranga bagomba gusubizwa aho agera kuri miliyari 21Frw, batari basubizwa, ariko hakaba n’abandi bataramenyekanisha.

Abacuruzi baganiriye na IGIHE bagaragaje ko ari ikibazo gikomeye kuko aya mafaranga ari menshi ku buryo aba ashobora gutuma bamwe muri bo bayaberewemo banafunga imiryango kubera ibihombo cyangwa kubura igishoro.

Ku rundi ruhande ariko Bizimana avuga ko Guverinoma y’u Rwanda iha agaciro abasora, ndetse ko hari gushakishwa uburyo ayo mafaranga yasubizwa kandi yizeza ko bitazatwara igihe kirekire.

Bizimana ati “Ni ikibazo natwe nk’ubuyobozi bw’imisoro kiduhangayikishije, njyewe binantera ipfunwe ariko ubu turimo gukora ibishoboka byose ngo tubishyure ku gihe.”

RRA mu rugendo rwo kongera imisoro yinjizwa buri mwaka

Bizimana agaragaza ko RRA yinjije mu isanduku ya Leta amafaranga angana na miliyari 763.4 mu mwaka wa 2013-2014, umwaka wakurikiyeho wa 2014-2015 RRA yinjije miliyari 859.1.

Agaragaza ko kuva icyo gihe amafaranga RRA yinjiza buri mwaka yiyongeragaho miliyari 100Frw, ku misoro yagombaga kwinjira.

Mu ngengo y’imari y’umwaka wa 2020-2021, RRA yinjije mu isanduku ya Leta imisoro ingana na miliyari 1654.5 z’amafaranga y’u Rwanda.

Ni mu gihe umwaka wabanje wa 2019-2020, imisoro n’andi mafaranga akusanywa na RRA byazamutse ku mpuzandengo ya 9.1%.

Komiseri Mukuru wa RRA avuga ko guhera mu 2019 imisoro yagiye igabanyuka kubera COVID-19 bituma n’umusaruro mbumbe w’Igihugu ugabanyuka, gusa agashimangira ko bakomeje korohereza abasora.

Ati “Dushimira abatanze imisoro uko bikwiriye. Hari ingamba zafashwe kugira ngo tworohereze abasora. Twakuyeho inyungu z’ubukererwe mu gihe cya Covid-19, twongera n’igihe cyo gusora.”

Hari ingamba Leta yagiye ifasha mu korohereza abasora. Leta yasoneye abikorera bari mu nganda no mu bwubatsi umusoro ufite agaciro ka miliyari 50.

Ubu RRA irimo gushyira ingufu mu gukoresha ikoranabuhanga ari nayo mpamvu abikorera bakangurirwa gukoresha EBM mu gutanga inyemezabuguzi.

Ubuyobozi bwa RRA butangaza ko hari abacuruza ibikoresho by’ubwubatsi badatanga inyemezabuguzi ya EBM kimwe n’abakora ubucukuzi bw’amabuye.

Ati “Icyo tugamije ni ukugira ngo abo mu bwubatsi bagaragaze ibyo bashyira mu bwubatsi. Icyo bidufasha ni uko uwinjiza ibicuruzwa muri gasutamo tuba tuzi ibintu yaranguye uko bingana cyangwa ingano y’ibyo yinjije.”

Yakomeje agira ati “Iyo watanze inyemezabuguzi tumenya uko ububiko (Stock) bwawe bugabanyuka. Ariko noneho iyo udatanga EBM icyo gihe turakubwira tuti ko ububiko bwawe butagabanyuka bite?.”

RRA itangaza ko mu minsi iri imbere igiye kugenzura uko ububiko buhagaze hirya no hino mu Gihugu.

Kugeza ubu habarwa amoko agera kuri 5 ya EBM zikoreshwa kuri buri cyiciro cy’abacuruzi bityo abikorera bakaba basabwa gukoresha ikoranabuhanga.

Bizimana uyobora RRA yavuze ko bakomeje gushaka uburyo bakwishyura vuba abacuruzi babereyemo amafarnaga agera muri miliyari 21Frw
Abacuruzi bijejwe gusubizwa amafaranga akomoka ku musoro ku nyongeragaciro baba bishyuye
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza