IGIHE

BNR yarasahuwe hasigara ibiceri, amafaranga mashya yacubije abajenosideri—Ikiganiro na John Rwangombwa

4 13-08-2019 - saa 09:59, Ferdinand Maniraguha

Jenoside yakorewe Abatutsi yahitanye ubuzima bw’abasaga miliyoni, isiga impunzi zigera kuri miliyoni eshatu, inasiga ihungabana ridasanzwe haba ku bayirokotse, abayibonye n’abayigizemo uruhare.

Nyamara mu byasenywe na Jenoside si ubuzima bw’Abanyarwada gusa kuko n’ubw’igihugu muri rusange bwari bwahagaze.

Abakoze Jenoside ntibasize gusenya ibikorwa remezo, gusahura no kwangiza ubukungu bw’igihugu.

Mu 1994 ubukungu bw’u Rwanda bwari bugeze aharindimuka icyo gihe izamuka ryabwo ryasubiye inyuma kuri -41.9%, ibi binagira ingaruka ku musaruro mbumbe w’umuturage ku mwaka kuko wavuye ku madolari 374 mu 1990 ukagera ku 146 mu 1994.

Kugira ngo umusaruro mbumbe w’umuturage ku mwaka wongere kuzamuka, ugere kuri $788 mu 2018 byasabye imbaraga, kugira icyerecyezo n’ibyemezo bikarishye nkuko byatangajwe na Guverineri wa Banki Nkuru y’Igihugu (BNR) John Rwangombwa.

BNR yarasahuwe hasigara ibiceri

Mu kiganiro aherutse kugirana na One Nation Radio, Radiyo yashinzwe n’Abanyarwanda baba muri Leta Zunze Ubumwe za Amerika, Rwangombwa yavuze ko u Rwanda rwa mbere no mu gihe cya Jenoside, n’urwa nyuma y’aho mu bijyanye n’ubukungu ari ibihugu bibiri bitandukanye.

Mbere yo guhunga ubwo ingabo za FPR Inkotanyi zatanyaga zihagarika Jenoside, Leta yakoraga Jenoside yari irajwe ishinga n’imirimo ibiri, kwica no gusahura igihugu ngo abazakizamo nyuma bazabure epfo na ruguru.

Rwangombwa avuga ko igihugu kimaze kubohorwa, muri BNR nta mafaranga basanzemo kuko yose yari yasahuwe na Leta yakoze Jenoside, yari yambutse muri Zaïre yitegura kugaruka gufata ubutegetsi.

Yavuze ko amafaranga basanzemo ari ibiceri gusa nabyo bidafite agaciro kuko byo byabaga biremereye ku buryo bitashobokeye abasahuye kubitwara.

Yagize ati “Abajenosideri baragiye basahura igihugu byose. Nko muri BNR nta kintu cyitwaga ifaranga cyabagamo uretse nk’ibiceri byari bigoye kwikorera nabyo bidafite icyo bivuze. Uko twatangiye nk’igihugu cyasenyutse burundu, cyasenyutse mu by’umutungo w’igihugu, mu by’imibereho y’abantu no muri BNR niko byari bimeze.”

Nyuma yo guhagarika Jenoside, Rwangombwa yakoraga kuri gasutamo ariko yemeza ko nta mafaranga ahagije babonaga. Na duke babaga binjije ku munsi, BNR yabaga itegereje ko batuzana ngo tujye kwifashishwa mu bikora bimwe na bimwe bya Guverinoma.

Ati “Nakoraga ku mupaka wa gasutamo twakiraga udufaranga dukeya buri munsi bakaba bategereje utwo dushoboye kubona kugira ngo twohereze bashobore kugira ibikorwa bya Leta bike bakora.”

Ku ngabo n’abari abayoboke ba FPR Inkotanyi bari barangije urugamba rw’amasasu, nta bwoba bwinshi bari batewe no kuba igihugu kiri ku busa.

Rwangombwa avuga ko bari bamenyereye gukoresha bike bakabibyazamo byinshi, ari nawo murongo bakomeje mu myaka itatu ya nyuma ya Jenoside.

Mu byahereweho ngo ubukungu bw’igihugu busubire ku murongo, Rwangombwa avugamo kunoza uburyo bwo kwakira imisoro n’ubucuruzi.

Amafaranga yasahuwe BNR yakoreshwaga mu kugaba ibitero ku Rwanda yarahinduwe

Leta yakoze Jenoside imaze guhungira muri Zaïre, yatangiye gutegura ibitero byo kugaruka ku butegetsi i Kigali, ikanakomeza umugambi wa Jenoside.

Mu byabateraga akanyabugabo harimo amafaranga bari barasahuye muri BNR no mu zindi banki zo mu Rwanda ariyo nayo bifashishaga bagura intwaro n’ibindi nkenerwa ngo bagaruke kugaba ibitero ku Rwanda.

Rwangombwa yavuze ko ubusanzwe kugira ngo ubashe kugenzura ubukungu na politiki y’ifaranga, ugomba kuba uzi umubare w’amafaranga atembera mu gihugu no hanze yacyo.

Iyo mibare ntabwo yari izwi kuko amenshi yari yarasohowe mu gihugu ari gukoreshwa mu gutegura ibitero bigamije guhungabanya umutekano.

Mu gusubiza ibintu ku murongo, Rwangombwa yavuze ko hafashwe umwanzuro wo guhindura amafaranga u Rwanda rwakoreshaga kugira ngo BNR ibashe gucunga neza politiki y’ifaranga no guca intege abashaka guhungabanya umutekano bitwaje amafaranga basahuye.

Ati “Mu ntangiriro za 1995 habayeho guhindura amafaranga, ya yandi ya mbere mu gihe gito cyane aba ahindutse ibipapuro. Byarafashije mu guca intege bariya bayakoreshaga mu guhungabanya umutekano mu Rwanda ariko byanafashije gutangira bundi bushya kumenya amafaranga u Rwanda rufite.”

U Rwanda rwagize ibirura byihinduye intama

Nyuma ya Jenoside, u Rwanda rwagize imiryango myinshi itegamiye kuri Leta yaje mu bikorwa bitandukanye byo gufasha ngo igihugu cyongere cyiyubake.

Muri Gicurasi 1995, mu Rwanda habarizwaga imiryango mpuzamahanga itegamiye kuri Leta isaga 130.

Rwangombwa avuga ko imwe muri iyo miryango yari ifite ibindi byayizanye bitari ugutera inkunga u Rwanda, ari nayo mpamvu mu Ukuboza 1995 imwe yahagaritswe ngo igihugu kibashe kugera aho kigeze ubu.

Ati “Byabaye ngombwa gusezerera za ONG zimwe kuko iyo bidakorwa icyo gihe igihugu cyari kubura umurongo kiganamo. Hari benshi bitwa ko bafashaga ariko bari mu bindi, hari nyinshi zahagaze. Ni ibyemezo nk’ibyo abantu rimwe babonaga bidashoboka ariko byafashwe biba ngombwa ko igihugu kigira umurongo kigenderaho kandi cyihitiyemo.”

Icyo gihe imiryango mpuzamahanga 38 yarirukanywe, indi 18 ibikorwa byayo birahagarikwa.

Rwangombwa avuga ko gukuramo ako kajagari byatumye igihugu kigira umurongo kigenderaho mu guteza imbere abaturage n’ubukungu.

Mu bindi byemezo Rwangombwa yavuze ko byafashwe ngo ubukungu bw’igihugu busubire ku murongo, harimo guteza imbere ishoramari.

Mbere ya Jenoside na nyuma yaho gato, u Rwanda kimwe na byinshi mu bihugu biri mu nzira y’amajyambere byakoreshaga uburyo bwo kubanza gusaba uruhushya igihe hari ushaka gusohokana amadovize hanze, akabisabira uruhushya muri BNR.

Rwangombwa yavuze ko nk’igihugu cyabaga gicungira ku mafaranga make, byabaga ngombwa ko BNR ariyo itanga uruhushya imaze kumenya aho ayo madovize agiye n’inyungu azazana nibemera agasohoka.

Ubwo buryo u Rwanda rwaje gusanga atari bwiza, kuko bwafungaga ishoramari n’ubucuruzi, inyungu igihugu cyagombaga kubona ikaba nke.

Ati “Iyo ufunguye ubukungu bishobora kukugora mu ntangiriro ariko bituma abantu bumva bisanzuye kuzana amadovize yabo, gushora imari mu gihugu cyawe. Ni kimwe mu byemezo bya mbere byafashije gufungura ubukungu bw’u Rwanda hazamo abashoramari batandukanye.”

Rwangombwa avuga ko byageze mu 2000 ubukungu bw’u Rwanda bumaze kugira icyerecyezo, ari naho havuye umurongo w’Icyerecyezo 2020.

Yavuze ko n’abaterankunga bumvaga ko u Rwanda ntacyo rwakwigezaho batangiye kubona umusaruro w’ibyemezo bikomeye byagiye bifatwa.

Ati “Byaduhaye intumbero ifatika yatumye igihugu kirushaho gutera imbere. Ibi tumaze kugeraho ni ibintu byubatswe buhoro buhoro kugira ngo tube abayobozi b’ibyo dushaka kugeraho nk’igihugu.”

Mu 1994, umusaruro mbumbe w’u Rwanda wari miliyoni 753.6 z’amadolari, mu 2000 wageze kuri miliyoni 1735, mu 2015 ugera kuri miliyari 8.278 z’amadolari, naho mu 2018, umusaruro mbumbe w’igihugu (GDP) wiyongera ku rugero cya 8.6 %, ugera kuri miliyari 8,189 Frw.

Ingengo y’imari y’igihugu yikubye inshuro 14, mu gihe ingengo y’imari ituruka imbere mu gihugu yo yazamutse inshuro 20 mu myaka 20 ishize.

Rwangombwa avuga ko byageze mu 2000 ubukungu bw’u Rwanda bumaze kugira icyerecyezo, ari naho havuye umurongo w’Icyerecyezo 2020
Mu gihe cya Jenoside yakorewe Abatutsi, BNR yasahuwe amafaranga yose yari arimo hasigara ibiceri
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Joseph H 2019-08-15 00:12:26

Ni ishema rikomeye kuba umunyarwanda wa none,ntabwo . Nkunda igihugu cyanjye cyane kandi aho cyavuye n’aho kigeze haratangaje. Nari mpari mbibona mfatanije n’abandi turwubaka.Afrika nitwe irimo kwigiraho. Bayobozi barangajwe imbere na P.K mukomeze imihigo. Imana ibidufashemo tubere isi urumuri rwo kwigira.

2
Kigeme 2019-08-14 05:36:53

Hari ikintu uyu mugabo yibagirwa. U Rwanda rwasonewe imyenda yose rwari rufitiye ibyo birura. Harya ibyo birura ntabwo byaragurutse? kandi kugirango bizongere bidusonere tugomba gusenga imana rurema dore ko byanashyizeho amabwiriza adatuma tuzongera gusaba gusonerwa?

3
Tambo 2019-08-13 08:48:34

Ibi ni byiza cyane, ntabwo byari kugerwaho iyo tutagira abayobozi beza.

4
Ben Kiki 2019-08-13 03:56:13

Nibyiza ko tugira ahotuva nahotuga maze tukubaka iguhu cyacu ayo namateka Meza yokurata murakoze

Kwamamaza