IGIHE

RDB yitabiriye imurikagurisha ry’ubukerarugendo mu Bufaransa

0 5-12-2018 - saa 09:08, Karirima A. Ngarambe

Ikigo cy’igihugu gishinzwe iterambere (RDB), cyitabiriye imurikagurisha ry’ubukerarugendo ribera mu Mujyi wa Cannes mu Bufaransa, aho cyagaragaje iterambere ry’ubukerarugendo mu Rwanda no gushishikariza abaryitabiriye kubumenyekanisha.

Ni ku nshuro ya Gatatu u Rwanda rwitabiriye iri murikagurisha rizwi ku izina rya ILTM (International Luxury Travel Market), ribera mu mujyi wa Cannes, uzwi cyane nk’umujyi uhuriramo ibihanganjye mu bijyanye na sinema ku Isi.

Iri murikagurisha ry’ubukerarugendo ribera muri ‘Palais des Festivals’ ari nayo nyubako yakira iryo murika rya sinema ku rwego mpuzamahanga.

Rihuza abaguzi, abagurisha n’abafatanyabikorwa mu bijyanye n’ubukerarugendo rwo ku rwego ruhanitse. Ritegurwa ku Isi yose mu matsinda yo muri Afurika, Aziya, Amerika y’Amajyepfo, Cannes, ibihugu by’Abarabu n’u Bushinwa.

Mu nshuro zose u Rwanda rwitabiriye, ruhagararirwa n’abagurisha ubukerarugendo ku giti cyabo baturuka mu Rwanda babifashijwemo na Leta y’u Rwanda binyuze muri RDB.

Itsinda ry’abanyarwanda bitabiriye imurikagurisha ry’ubukerarugendo rigizwe na Robert Gakimbiri wo muri Primate Safaris, Rosette Chantal Rugamba wo muri Songa Africa and Amakoro Lodge, Elise Milenge wo muri Charleston Travel and Tours.

Hari kandi Manzi Kayihura wo muri Thousand Hills Africa, Robert V. wo muri Wilderness Safaris, Mwaka wa Uber Luxe Safaris, Habba A. wo mu Akagera Aviation, Claudine Rubagumya na Linda Mutesi bo muri RDB.

Ku munsi wa mbere u Rwanda nk’umwe mu baterankunga nk’uko bigaragara ku byambarwa biranga abitabiriye iki gikorwa, rwahariwe umwanya ubanza mu kwereka itangazamakuru mpuzamahanga aho rugeze mu bikorwa by’ubukerugendo no kubashishikariza kururanga.

Linda Mutesi uhagarariye RDB, mu ijambo rye yasobanuye byimbitse iterambere ry’ubukerarugendo mu Rwanda, agaragaza ibikorwa by’umwimerere n’ibyagezweho, bigaragaza u Rwanda nk’ihuriro ry’ahantu nyaburanga mu rwego rw’ubukerarugendo ruhanitse.

Mutesi kandi yashishikarije abakora ibikorwa byo kugurisha ubukerarugendo bateraniye muri iri murikagurisha gusura u Rwanda kugira ngo bahashore imari.

Umusaruro u Rwanda rukura mu bikorwa by’ubukerarugendo wageze kuri miliyoni 438 z’amadolari mu 2017, ukaba wiyongereyeho miliyoni 34 z’amadolari ugereranyije n’uwa 2016.
Ukwiyongera k’umusaruro w’ubukerarugendo gufite imvano kuko muri Pariki y’Igihugu y’Akagera hagejejwemo ubwoko butanu bw’inyamaswa zikomeye zirimo Inkura, Intare, Imbogo, Inzovu n’Ingwe. Izi zikurura ba mukerarugendo benshi.

Mu gihe bigaragara ko imibare y’abanyamahanga ikiri hejuru mu gusura ibice nyaburanga u Rwanda rufite, RDB yatangije igikorwa yise ‘Tembera u Rwanda’, kigamije gushishikariza Abanyarwanda gukunda no gusura ibyiza by’iwabo, mbere y’uko ab’ahandi babimenya.

Kuba u Rwanda ruri ku mwanya mwiza mu kwakira inama mpuzamahanga ndetse n’inyungu rukura mu bukerarugendo zikiyongera, binaterwa n’uko abanyamahanga basigaye bahabwa visa bageze mu Rwanda.

Kuba indege ya RwandAir isigaye yerekeza ahantu henshi ku Isi ikorohereza benshi kuza mu Rwanda, nabyo ni isoko y’iterambere ry’ubukerarugendo.

Abagurisha serivisi z'ubukerarugendo mu bijyanye n'amahoteli
Abanyamakuru mpuzamahanga bakurikirana uko ubukerarugendo bw'u Rwanda bwateye imbere
Hanze aho binjirira ku itapi y'umutuku
Linda Mutesi wo muri RDB asobanura urwego rw'iterambere ry'ubukerarugendo mu Rwanda
Ni uruhande rw'amazi ya Côte d'Azur
Aho u Rwanda rurimo kugaragariza ubukerarugendo rwabwo
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza