IGIHE

RCB yagarutse ku kimenyane cyavuzwe mu guha hoteli kwakira abashyitsi mpuzamahanga

1 12-02-2019 - saa 20:11, Ferdinand Maniraguha

Ikigo gishinzwe kumenyekanisha ubukerarugendo bushingiye ku Nama (Rwanda Convention Bureau, RCB) cyatangaje ko nta kimenyane kiba mu kwemerera amahoteli kwakira abashyitsi bitabira inama mpuzamahanga mu Rwanda.

Mu mwaka wa 2015 nibwo havuzwe ukwinuba kwa bamwe mu bafite amahoteli, aho bavugaga ko bashishikarijwe kuzubaka zamara kuzura ntibabone abakiliya.

Hari n’abavugaga ko abashyitsi bitabira inama mpuzamahanga zibera mu Rwanda boherezwa mu mahoteli amwe gusa, andi akaba aho bikayaviramo guhomba.

U Rwanda ni kimwe mi bihugu byateje imbere ubukerarugendo bushingiye ku nama mpuzamahanga, dore ko mu mezi arindwi ashize urwo rwego rumaze kwinjiza miliyoni 52 z’amadolari.

Umuyobozi wa RCB, Nelly Mukazayire yavuze ko iterambere ry’ubukererugendo bushingiye ku nama butashoboka hatabayemo ubufatanye na za hoteli.

Yahakanye amakuru avuga ko mu kohereza abashyitsi muri hoteli runaka bishingira ku kimenyane.

Ati “Bigitangira umuntu yashoboraga kubivuga gutyo ariko iyo urebye nko mu mwaka ushize n’inama dufite uyu mwaka, usanga zifite abantu batandukanye b’ibyiciro by’ubushobozi bitandukanye. Iyo bitandukanye rero ntabwo abantu bose bashobora kujya muri hoteli imwe. Nibyo koko hari hoteli nini zishobora kugaragara nk’izigira abantu benshi kubera ko niba ari inama ifite abashyitsi bakomeye, bafite hoteli z’urwego rwabo bajyamo.”

Mu Rwanda hari ibyumba bisaga 5000 bya hoteli zifite hagati y’inyenyeri ebyiri n’eshanu.

Mukazayire yavuze ko hoteli zibona abashyitsi bitabiriye inama mpuzamahanga biterwa n’inyenyeri zifite n’icyiciro cy’abitabiriye inama.

Ati “Nk’inama y’ejobundi yo kuboneza urubyaro (International Conference on Family Planning) yagize abantu barimo n’abagiye kurara mu macumbi y’ibigo by’amashuri kuko yari inama ifite ibyiciro bitandukanye. Umuntu wese utugannye aje gukoresha inama hano tumuha hoteli zose tukanamugira inama ukurikije ibyiciro by’abantu bazaza.”

Umuyobozi Ushinzwe igenzura ry’ibijyanye n’Ubukerarugendo mu Kigo cy’Igihugu gishinzwe Iterambere (RDB), Nsabimana Emmanuel, yavuze ko guhomba kwa hoteli bidakwiriye kureberwa gusa ku kuba itabonye abakiliya.

Ati “Kugeza ubu turi kuri 43 % by’amahoteli abona abantu (occupancy rate) ugereranyije n’akarere ntabwo turi kure cyane kuko Uganda na Kenya bari hafi kuri 48 % ariko ushobora gusanga n’ubundi hoteli ihomba cyangwa ikagurishwa atari uko mu by’ukuri yabuze abayigana.”

Yavuze ko hari amavugurura bari gukora ku bufatanye n’amabanki, bareba ba nyir’amahoteli afite inguzanyo kugira ngo basesengure niba igituma bahomba koko ari ukubura abakiliya, nubwo atatangaje ikizakorerwa amahoteli nyuma y’ubwo busesenguzi.

Mukazayire yavuze ko bari guharanira ko no mu mijyi yunganira Kigali haba ibikorwa by’ubukerarugendo bitandukanye kugira ngo amahoteli yaho abashe kubona abakiliya.

Muri ibyo bikorwa harimo kujya bafata zimwe mu nama zabereye mu Rwanda zikoherezwa muri iyo mijyi.
Mu mahoteli aherutse guhomba harimo nka Karisimbi yashyizwe mu cyamunara mu minsi ishize kubera kunanirwa kwishyura amadeni.

U Rwanda rwiyemeje ko mu mwaka w’ingengo y’imari ya 2018/2019 ruzinjiza miliyoni 74 z’amadolari yo gutegura no kwakira inama mpuzamahanga, avuye kuri miliyoni 42 zinjijwe mu 2017.

Inkuru wasoma: Hotel zirenga ijana zigiye gutezwa cyamunara

Nelly Mukazayire (hagati) uyobora RCB, mu kiganiro n'abanyamakuru kuri uyu wa Kabiri
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
lg 2019-02-13 22:56:51

Uvuga ko Hotel zidahomba kubera kubura abazijyamo, yumva ahandi Hotel ikura amafaranga ali he!! keretse iyo avuga ko zibona abantu hanyuma amafaranga akibwa, naho ubundi ni nyinshi zizagurishwa kubera igihembo cyo kubura abaxikoresha

Kwamamaza