IGIHE

Portia de Rossi yitabiriye itangizwa ry’imirimo yo kubaka ikigo cya Ellen DeGeneres mu Rwanda

1 12-02-2019 - saa 15:54, Mukaneza M.Ange

Portia de Rossi, umukunzi w’icyamamare Ellen DeGeneres kuri uyu wa Kabiri yitabiriye umuhango wo gushyira ibuye ry’ifatizo ahazubakwa ikigo cye kigamije kubungabunga ingagi zo mu birunga.

DeGeneres ni umugore w’imyaka 61 wamamaye muri Leta Zunze Ubumwe za Amerika kubera ikiganiro cyamwitiriwe kuri Televiziyo kizwi nka ‘The Ellen DeGeneres Show’.

Ikigo ‘Ellen DeGeneres Campus’ cyatangiye kubakwa mu Kinigi mu Karere ka Musanze ni impano Portia de Rossi yahaye DeGeneres bashyingiranwe bahuje ibitsina, ubwo yuzuzaga imyaka 60 y’amavuko.

Iki kigo kizunganira ibikorwa bisanzwe bikorwa n’Ikigega cyitiriwe Diana Fossey, bigamije gushyigikira intego za Leta y’u Rwanda mu kubungabunga ibidukikije n’umutungo kamere.

Imirimo yo kucyubaka yitezweho gutanga akazi ku baturage basaga 1500 baturiye Pariki y’Ibirunga, ahazakoreshwa asaga miliyoni ebyiri z’amadolari mu kubahemba mu gihe andi miliyoni 2.5$ azashorwa mu bikoresho by’ubwubatsi bikorewe mu Rwanda.

Muri Gicurasi 2018, Ellen ufata Fossey nk’icyitegererezo mu buzima bwe yaje mu Rwanda nabwo ari kumwe na Portia de Rossi. Ni uruzinduko yatangaje ko rwahinduye ubuzima bwe dore ko yanakabije inzozi zo kubona ingagi yari amaranye igihe kitari igito.

Ati “ Biragoye gusobanura uburyo ibihe byiza nahagiriye byari bimeze. Nubona amahirwe yo kujya mu Rwanda uzayakoreshe. Igihugu ni cyiza, abaturage beza, abantu bavugaga ko iyo ugiye kureba ingagi uba uzegereye, ibi kandi nibyo.”

Ellen DeGeneres Campus niyo izaba irimo ibiro by’ ikigega Dian Fossey Gorilla Fund kimaze imyaka isaga 50 gikorera mu Rwanda binyuze mu gashami kacyo gashinzwe ubushakashatsi ka Karisoke Research Centre mu Karere ka Musnze.

Kizaba kirimo laboratwari, ibyumba by’inama, ibyo kwigishirizamo n’inzu ndangamateka ivuga kuri Dian Fossey wishwe mu Ukuboza 1985.

Biteganyijwe ko ikigo gishya kizafungura imiryango ku mugaragaro mu ntangiriro za 2021, gitwaye miliyoni 10 z’amadolari.

Umuhango wo gushyira ibuye ry’ifatizo ahazubakwa Ellen DeGeneres Campus wanitabiriwe n’abandi bayobozi barimo Umuyobozi Mukuru ushinzwe Ubukerarugendo mu Kigo cy’Igihugu cy’Iterambere RDB, Belise Kariza; Guverineri w’Intara y’Amajyaruguru, Gatabazi Jean Marie Vianney na Ambasaderi wa Leta Zunze Ubumwe za Amerika mu Rwanda, Peter Vrooman n’abandi.

Kubaka iki kigo bizatanga imirimo ku baturage 1500 baturiye Pariki y'Ibirunga
Kariza na Portia de Rossi (iburyo) mu bitabiriye umuhango wo gushyira ibuye ry'ifatizo ahazubakwa Ellen DeGeneres Campus
Guverineri Gatabazi na Portia bitegereza igishushanyo kigaragaza uko iki kigo kizaba kimeze

[email protected]

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
NIYIGENA EPIMENI 2019-02-13 11:34:14

TURA BYISHIMIYE CYANE NKATWE NK’URUBYIRUKO BAZADUHE AKAZI, MUBI SHYANYE N’UBWUBATSI. MURAKOZE!

Kwamamaza