IGIHE

DeGeneres na Portia bateguye ibirori birebana n’ingagi zo mu Rwanda byitabiriwe n’ibyamamare muri Hollywood

1 15-10-2019 - saa 08:46, IGIHE

Ellen DeGeneres n’umugore we Portia de Rossi kuwa Gatandatu w’icyumweru gishize bateguye ibirori byiswe ‘Gorillapalooza’ byari bigamije gushishikariza abantu kwita ku ngagi zo mu birunga mu Rwanda hakusanywa inkunga yo kuzibungabunga.

Ibi birori byabereye mu cyumba cya Hollywood Palladium, cyafunguwe mu 1940, kikaba gifite ubushobozi bwo kwakira abantu 5000. Byitabiriwe n’abahanzi ndetse n’ababyinnyi b’ibyamamare.

Byakusanyirijwemo inkunga ya miliyoni $5 yo gushyira mu kigega The Ellen Fund, gitera inkunga ibikorwa byo kubungabunga inyamaswa ziri mu kaga ko gukendera ku Isi ndetse no kurangiza kubaka ikigo kigamije kubungabunga ingagi zo mu birunga mu Rwanda.

Iki kigo cyiswe The Ellen DeGeneres Campus kizafasha mu bikorwa by’umuryango witiriwe Dian Fossey, aho kizibanda ku bushakashatsi bugamije kubungabunga ingagi zo mu misozi miremire ziri gukendera ku Isi.

Portia de Rossi yabwiye abitabiriye ibi birori ati “Ndashaka ko abantu babyitaho. Ndakeka ko ari byo twese dushaka, ko abantu babyitaho bakamenya icyo bisobanuye ku kiremwamuntu kugira ibiremwa bitangaje nk’ibi biriho kandi bibayeho neza”.

Yakomeje agira ati “Nagerageje guhindura Hollywood Palladium ishyamba ryo muri Afurika. Nashakaga mu by’ukuri ko yumvikana nk’aho ingagi ziri hariya kuko nkeneye ko abantu aho bari mu mudendezo i Los Angeles bajya mu Rwanda bakumva uko biba bimeze kuba ukikijwe n’ibi biremwa bidasanzwe”.

Ibi birori byagombaga kuririmbamo umuhanzi Miley Cyrus ariko ntibyakunda kubera uburwayi, asimburwa na Chris Martin, waririmbye indirimbo eshanu zirimo; I’m a Believer, Party in the U.S.A n’izindi.

Cyasojwe kandi umuhanzi Bruno Mars, aririmbye indirimbo zirimo; ‘Uptown Funk’, ‘24K Magic’ na ‘Just the Way You Are.’

Iki gikorwa cyakusanyijwemo miliyoni $5 z’amadolari harimo ayavuye muri cyamunara yakozwe na DeGeneres afatanyije n’icyamamare James Corden umenyerewe mu kiganiro Late Late Show, aho abitabiriye ibirori Julia Roberts na Sofia Vergara, batanze igiciro kiri hejuru.

The Ellen Fund irimo kubaka ikigo kizafasha mu bikorwa bya Dian Fossey Gorilla Fund, kizaba kiri ku buso bwa metero kare zirenga 4600, gifite laboratwari, isomero, ibyumba by’inama, ahazajya habera imurikabikorwa, amashuri n’amacumbi y’abashakashatsi n’abanyeshuri.

Inyubako zizaba zirimo amacumbi, aho kwigira, ibigo by’ubushakashatsi ndetse n’aho kumurikira ibihangano by’ubugeni bijyanye no kubungabunga ibinyabuzima.

Iki kigega kivuga ko “Intego ni ugufasha umuryango witiriwe Dian Fossey wita ku ngagi, Dian Fossey Gorilla Fund, mu bikorwa byawo byo kurengera ingagi. Ni no kubera icyitegererezo buri wese uyisuye mu bijyanye no kwita ku ngagi ndetse no kuzibungabunga”.

“Icy’ingenzi cyane, iki kigo kizafasha mu kwigisha abanyafurika b’igisekuru cy’ahazaza ibijyanye no kubungabunga urusobe rw’ibidukikije.”

Muri iki kigo nta ngagi zizahaba ahubwo hazaba abanyeshuri n’abashakashatsi. Mu kubaka iki kigo abaturage 1500 bazahabwa imirimo. Ibuye ry’ifatizo ryashyizweho tariki 12 Gashyantare 2019.

Muri icyo kigo ni naho hazaba hari ibiro by’ ikigega Dian Fossey Gorilla Fund kimaze imyaka isaga 50 gikorera mu Rwanda binyuze mu gashami kacyo gashinzwe ubushakashatsi ka Karisoke Research Centre mu Karere ka Musnze.

Ikigega Dian Fossey Fund ni kimwe mu miryango mpuzamahanga ikomeye mu bijyanye no kubungabunga ingagi.

Iki kigo kizashimangira ubushake bw’u Rwanda mu kubungabunga urusobe rw’ibinyabuzima no guteza imbere ubumenyi. Biteganyijwe ko ikigo gishya kizafungura imiryango ku mugaragaro mu ntangiriro za 2021.

DeGeneres na de Rossi, bamaze kuza mu Rwanda inshuro eshatu mu bikorwa byo kurengera ingagi zo mu birunga.

Ellen DeGeneres n’umugore we Portia de Rossi bafite umushinga wo kubaka ikigo cyita ku ngagi mu Rwanda
Icyamamare James Corden na DeGeneres barimo gukoresha cyamunara
Umuhanzi Chris Martin yaririmbye indirimbo eshanu
Umuhanzi Bruno Mars yaririmbye indirimbo zirimo ‘Uptown Funk’, ‘24K Magic’ na ‘Just the Way You Are
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Hamza Makombe 2019-10-31 07:26:46

Degeneres ni umugabogore?!

Kwamamaza