IGIHE

Umwami ntiyica hica rubanda

3 10-12-2019 - saa 21:51, Ntwari Pie

Iyi ni impamo yahozeho kuva u Rwanda rwamenya ubucamanza. Umwami ni we wari umukuru w’ikirenga muri politiki y’igihugu irimo n’ubutabera. Kuko ahari abantu hatabura urunturuntu, gushyamirana byahozeho nta n’aho bizajya. Iyo byabagaho, imfura ni zo zafataga iya mbere mu gukemura amakimbirane, byarenga umurongo w’ubwumvikane hakiyambazwa abenge bo muri sosiyete.

Byakomeza kunanirana, urubanza rukagenda rukagera i Bwami. Iyo umwami yashakaga, yagishaga inama ibyegera bye, ubundi akaruca akurikije ibimenyetso yahawe. Rimwe na rimwe umwami yajyaga atanga abagome cyangwa se undi muntu wese wabaga yagomeye ingoma, akicwa.

N’ubwo umwami yajyaga afata ku bwe ibyemezo bikomeye ntawe abajije, nta na rimwe yigeze atwara u Rwanda adafite abajyanama. Usibye kuba rwari runini, politiki n’imiyoborere yarwo byari bikomatanye n’urugamba ruhoraho rwo kurinda ubusugire bw’igihugu kandi ni umurimo utoroshye.

Kugeza magingo aya ubwo busugire buracyabungwabungwa kuko impamvu nto iyo ariyo yose yatuma bujegajega yageza igihugu mu icuraburindi. Urugero ni irondakoko n’irondakere byubatsweho umusingi wo gutegura Jenoside yakorewe Abatutsi mu 1994.

Uko Perezida wa Repubulika ashyirwa ku butegetsi (kuko atorwa) n’abaturage, ni nako abo ashyiraho ngo bamufashe kuzuza inshingano ze ari abaturage baba babashyizeho kuko abaturage ari bo shingiro.

Umuyobozi wese uyoboye abaturage neza, akabageza ku iterambere rijyanye n’ibyo bifuza kugeraho aba abikoze mu cyimbo cya Perezida wa Repubulika kuko nicyo abaturage baba baramutoreye. Ni kenshi iyo bavuga ijambo ryabo imbere y’abaturage twumva bashima Perezida wabatumye ngo begere abo baturage. Ukuboko kwe kugaragarira muri bo kuko ni we muyoboro w’imirongo migari y’icyerekezo cy’igihugu.

Mu minsi ishize, uturere twatangiye gahunda yo kwegera abaturage mu rwego rwo gukusanya ibyifuzo by’ingingo zazashyirwa imbere mu igenamigambi ya 2020-2021. Ni ukuvuga ko icyerekezo abaturage bazahitamo, kizashingirwaho n’abayobozi batandukanye mu kuzuza neza imihigo bagirana na Perezida wa Repubilika.

Ni kenshi rero dusanga iyo mirongo migari iba yatanzwe n’igihugu, urwego Perezida ahagarariye, itubahirijwe. Mu buryo butaziguye, Perezida wabatumye ni we uba yatengushywe ariko mu buryo buziguye ni abaturage batenguhwa mbere y’undi wese. Ibitagenze neza ni twe bigiraho ingaruka mbi mbere ya Perezida wabatumye kandi iyo bigenze neza ni natwe bigirira inyungu mbere ya Perezida wa Repubulika.

Abo bayobozi ni indorerwamo zifite ibirahure tuba tugomba kwibonamo. Iyo ubonyemo umuyobozi wowe ntiwibone uba wayirebyemo impindurize cyangwa intambike. Iyo utibonyemo wayifashe neza, ni uko umuyobozi ubonamo aba yirunzemo ubwe, agashyira inyungu ze imbere izawe azakazipfukirana.

Ibyo badukorera byose biba bigomba kugira ingaruka nziza cyangwa mbi ariko mbere na mbere kuri twe abaturage. Niyo mpamvu twumva kenshi Nyakubahwa Perezida abashishikariza gushyira umuturage ku isonga, byabananira bagaha umwanya ababishoboye.

Ibigenda neza rero, bikwiye kudutera ishema nk’abaturage kuko biduha amanota yo kuba twaratoye umuyobozi w’igihugu uduha ibyo yadusezeranyije binyuze mu mfura aba yaratugeneye ngo zituyobore ku bwe. Hari n’abo twitoramo ubwacu ngo batuyobore. Bamwe bakadukundira abandi bakatugomera.

Ibitaragenze neza nabyo biba byagenze nabi kubera impamvu ebyiri cyangwa eshatu. Hari ibituruka kuri ba bayobozi baba barabaye imfura z’umutima muke (nanze kubita ibigwari), hari ibituruka kuri byinshi igihugu kidafiteho ububasha, nk’ubushobozi mu by’umutungo cyangwa se ibituruka ku miterere y’aho igihugu giherereye ariko kandi hari n’ibituruka ku baturage ubwabo harimo kwinangira umutima, imyumvire mibi n’umutima muke no gushyira imbere guhinyuza.

Uko byagenda kose, kimwe n’ibyagenda neza, muri ibi nsorejeho biba byagenze nabi nta kidafite uwo cyabazwa mbere y’uko kibazwa Nyakubahwa Perezida wa Repubulika.

N’ubwo mu mwanya muke agira atega amatwi abaturage, haba mu ngendo agirira hirya no hino mu gihugu cyangwa se binyuze mu itumanaho rigezweho, ibibazo byose yakemura ubwe, bipfa kuba bivuye ku muturage, hari uba yarabirengeje ingohe. Uwo ni umuyobozi uhura cyangwa se wagahuye n’uwo muturage mu buryo bworoshye kuko aricyo yashyiriweho ndetse ahemberwa.

Abihutira rero kunenga Nyakubahwa Perezida wa Repubulika ku biba bitagenze neza ni abatazi uko inzego zakabaye zikora imirimo zishinzwe.

N’abo abaturage batishimira imiyoborere yabo cyangwa se bakora andi makosa (n’iyo abaturage batabimenya) Perezida akabakuraho icyizere aba abikoze mu nyungu z’abaturage. Ubwo ni nk’aho ari abaturage bakanabakuyeho. Ibyo rero Perezida aba yarubatse ngo abaturage babigerekeho amabuye bubake ibirenzeho nta wabisenya tureba. Iyo nzira itazima turwana mu kubaka u Rwanda ikwiye kutubera indi mpamvu yo kudashyigikira uwatuyobora uko yishakiye mu nyungu zitandukanye n’izishyira umuturage ku isonga.

Utuyobora neza aba abikoze mu izina rya Nyakubahwa Perezida wa Repubulika ariko ubikoze nabi aba ahindanyije izina ry’umukuru w’igihugu wamutumye ni uwo kugawa. Ugaya uwamutumye, yitwaje ko mu Kinyarwanda tuvuga ngo “Zitukwamo nkuru” ariko n’izo nto iyo zitutswe zijye zibuka ko zizize wa muturage kuko “Umwami atica hica rubanda”.

Imyenda yanduye imeserwa mu gikari

Mu gusoza iyi nyandiko ndisabira ababona ibitagenda mu gihugu cyacu byose bakabivugira ku karubanda: Niko se, n’ubwo mudasobwa zadushyize igorora, twaretse gusobwa tukaba imfura.

Kunenga ibitagenda si bibi. Ariko se kuki umuntu uzi Ikinyarwanda neza twamunenga mu Rufaransa cyangwa Urwongereza? Hari uwasubiza ngo wenda nizo ndimi ziba zorohewe nyakunenga ariko simbibonamo ubupfura, noneho cyane cyane iyo hanengwa inzego zashyizweho ngo zibe umuyoboro w’ubuyobozi twihitiyemo.

Iki ni igitekerezo bwite cya Ntwari Pie, Kicukiro

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Rugamba 2019-12-11 16:04:53

Ibyo se ni ibiki bimeze nk’ibyo muri wa mugani w’Abidishyi.
Ibitagenda bigomba kuvuga rwa ku mugaragaro nk’uko ibigenda neza bivugwa! Ibyo byo kujya mu gikari nta gahunda! Uwanga amazimwe abandwa habona! Icyangombwa ni ukubikora mu mvugo zidasesereza naho ubundi bigomba kuvugwa!

2
Petra 2019-12-11 00:50:30

Nkunze ko urangije uvuga ko iki ari igitekerezo cyawe bwite kuko hari aho wivuguruje, kuko wavuze ko umuyobozi ukoze ibyiza aba abikoze mu cyimbo cya Nyakubahwa Perezida, ariko ukongeraho ko ibitagenda neza bitagomba kwitirirwa Perezida. Ubwo se aho hantu urumva hasobanutse. Njye numva umuntu yajya abazwa ibikorwa bye byose byaba byiza cg bibi. Ibyiza akabishimirwa, ibibi nabyo akabibazwa. Ngirango na Perezeda hari indirimbo yasabye ko bahindura, aho Kuvuga ko ibyiza babigejejweho nawe bakavuga RPF cg Gouverinoma. Aha yerekanye ko nawe aha agaciro ibikorwa byabo bafatanyije kuyobora.

3
Seruhanga 2019-12-10 19:41:45

"Abwirwa benshi akumva bene yo". Ntwari urakoze ku mpanuro n’inama zawe ku buzima rusange bw’abanyarwanda. Uvuze byinshi ku bumva.

Kwamamaza