IGIHE

U Rwanda ntiruzamanikira amaboko Uganda ariko ntiruzanakurayo amaso

0 13-10-2021 - saa 14:01, Kabagambe R. Ignatius

U Rwanda rushaka amahoro n’umutekano bishingiye ku nkingi ebyiri za mwamba ari zo ubumwe n’imiyoborere igendera ku kubazwa inshingano, iterambere rya bose na Afurika muri rusange.

Ubuyobozi bw’igihugu bwumva neza akamaro ko gukorera hamwe nk’akarere ndetse n’Isi muri rusange kugira ngo ibi byose bigerweho. Amaso u Rwanda rwayahanze iterambere rirambye ariko rishingiye ku mutekano.

Aho ni ho ruzingiye kuba u Rwanda rutazafunga amaso ngo rwemere ibyo Uganda ishaka uko byakabaye, gusa ntiruzanakurayo amaso.

Birigaragaza ko ku muturanyi wacu wo mu Majyaruguru, hari ibyo dukeneyeyo ariko hari n’ibyo tudakeneyeyo. U Rwanda rushishikajwe n’ubufatanye bubyara ubukungu ariko ntirushaka abaruhungabanyiriza umutekano.

Muri uko kurinda ubusugire n’umutekano warwo, rugomba kwamagana ubufasha Uganda iha imitwe irwanya Leta y’u Rwanda. Ku rundi ruhande ariko, ku mpamvu z’iterambere, u Rwanda ruzakomeza guharanira ko hasubiraho umwuka mwiza worohereza ubuhahirane n’ubufatanye mu bucuruzi ku mpande zombi.

Amayeri u Rwanda rukoresha yacanze Uganda

Guverinoma y’u Rwanda ifite uburenganzira n’inshingano zo gukomeza gukurikirana intego yihaye mu nyungu z’abenegihugu. Ushatse wasimbuza ahari Uganda ikindi gihugu ushaka nk’u Bubiligi, Afurika y’Epfo n’ibindi, n’ubundi uragera ku gisubizo kimwe kuko dipolomasi y’u Rwanda ishingiye ku gihugu.

Ni inshingano zacu kandi nk’abaturage kumva neza politiki ziriho zikaba izacu, hanyuma tugafatanya kuzisakaza aho tugiye hose, duha umusanzu Guverinoma. Nitwe barwanashyaka b’imena b’igihugu cyacu.

Wakwibaza ngo kuki mvuze ibi? Ni ukubera benshi mu bavandimwe bacu bari muri Uganda. Basa n’abari mu rujijo kubera amayeri u Rwanda rukoresha.

Ntabwo barasobanukiwe uburyo u Rwanda rufunga umupaka uruhuza n’igihugu cyabo, ngo ruhindukire rusabe Guverinoma yabo i Kampala gukora ibituma umupaka wongera gufungurwa. Turabibona ku mbuga nkoranyambaga bari mu mpaka zidashira, batanga impamvu za njya he na mvahe bikarangira bageze ku myanzuro iteye isoni.

Reka nemere gato bitewe n’aho baturuka. Perezida wabo aherutse kubwira umunyamakuru wo mu Bufaransa ngo ajye kubaza Perezida w’u Rwanda niba azafungura umupaka kuko ari we wawufunze. Yavuze ibi nyamara abizi neza ko iby’ibanze bisabwa ngo umupaka ufungurwe biri mu biganza bye bwite.

Abanya-Uganda nabo baravuga bakavuga, bagashingira kuri uwo murongo ngo “kubera ko ari u Rwanda rwafunze umupaka, rugomba kuwufungura nta yandi mananiza”, ndetse bakongera ubwishongozi ngo “Ni akazi kabo. N’ubundi ni u Rwanda rukeneye Uganda kurusha uko irukeneye.” Iyo batangiye kuvuga aya magambo, umenye ko batarashirwa batitaye ku buswa buyarimo.

Museveni yanze kumva ubusabe bw'u Rwanda nyamara urufunguzo rw'ibibazo byose ruri mu biganza bye

Baravuga bakatwibutsa ubunini bw’igihugu cyabo n’ubukungu bwacyo. Ntibibagirwa kuvuga uburyo u Rwanda ari agahugu gato ndetse ko ari nk’akarere kamwe ka Uganda! Bikomanga mu gatuza sinakubwira, ngo bafite ingabo z’igitangaza n’abaturage bakubye inshuro enye ab’u Rwanda.

Hari umuvugizi wabo wanga u Rwanda kubi uherere i Toronto, we yavuze ko ubukungu bwa Uganda ari nk’inzovu, hanyuma ubw’u Rwanda bukaba umubu. Naramwinginze rwose ngo agerageze kutabera, nibura ubukungu bw’u Rwanda abwite imbogo niba ubwa Uganda abubona nk’inzovu.

U Rwanda rwo ntirujya rukinisha ibyo kwibutsa Uganda iby’ahahise ariko iyo bakomeje, nta kundi wagira urasubiza:

Uganda gutakaza abasirikare b’Abanyarwanda byabariye ahantu babyumva neza mu 1995 ubwo itsinda rito ry’abasirikare ba RPA bari bayobowe na Major (ubu ni Major Gen) Andrew Kagame boherezwaga muri Uganda bisabwe na Museveni, kumurindira ahantu hakomeye mu gihugu nka Entebbe, Jinja na Kampala.

Mu gihe cy’amezi 12, ingabo za Maj Kagame zari zamaze gutanga umutekano ku kibuga cy’indege cya Entebbe, Nsamizi ahari radar y’ingenzi utibagiwe Entebbe hafi y’ingoro ya Perezida, Owen Falls Dam, n’ahari inganda zikomeye z’isukari i Lugazi na Madvhani.

Impamvu aho hantu hoherejwe ingabo za RPA ni uko ariho hari ah’ingenzi kandi hashobora guhura n’akaga. Museveni yari amaze iminsi ahawe amakuru ko hari igihugu cy’igituranyi cyiteguye kugaba ibitero kuri Uganda, kikabigaba ahantu hakomeye mu gihugu hanyuma ingabo za Joseph Kony zigahaguruka zigana mu Majyepfo za Jinja na Kampala.

Ntabwo Museveni yazuyaje, ni ibintu byamusabaga kuba afite ingabo zikomeye kandi aho kuzikura yari ahazi. Mu gihe cy’amezi 12, ingabo za RPA zafashije Museveni ku buntu. Nta n’urumiya u Rwanda rwaciye Museveni ku bwo kumurinda. Ni nk’ibyo RDF iri gukora muri Mozambique.

Bantu mwe, ubu muracyashaka kuvuga ko hari icyo u Rwanda rubagomba?

Akenshi iyo tugiye mu biganiro nk’ibi kuri Internet, rubura gica. Abanyarwanda hari ubwo bahitamo kwicecekera kuko uburyo tubonamo ibintu bitandukanye n’uko babibona cyane. Turabyoroshya bakagira ngo ni ugutsindwa, bagakomeza bakivamo berekana imitekerereze iciriritse.

Birazwi ko Uganda ifite abanyabwenge barenze bariya tubona ku mbuga nkoranyambaga cyangwa mu binyamakuru bibasira u Rwanda. Bisa nk’aho bariya birirwa ku mbuga nkoranyambaga ngo bavugire Guverinoma, babuze ibindi bakora.

Kampala rwose mureke kwigiza nkana, mwumve ijwi ry’amahoro rituruka i Kigali

Reka nongere mbishimangire ko ibi mvuga bireba mbere na mbere bamwe mu banya-Uganda. Niba uri umwe muri abo, gerageza gato nibura umenye neza u Rwanda urwo ari rwo. Ntabwo Abanyarwanda bakunda kwiyemera, si umuco wacu ni nayo mpamvu utazumva tuvuga ngo twabaho tutabafite, ni uko twarezwe, turabakeneye.

Mutubabarire kuba twemeye ibi bintu, icyakora ni ku mpamvu zo gufatirana amahirwe yose ahari y’ubucuruzi, si ukugira ngo bucye kabiri nk’uko mubitekereza.

Niyo mpamvu uzakomeza kumva Perezida Paul Kagame asaba mugenzi we kureka kwigira nyoni nyinshi ngo ntacyo bitwaye Uganda. Igihe cyose ahaturukaga amafaranga habuze, bigira ingaruka ku bukungu. Kubura ahavaga amafaranga menshi byo bibabaza kurushaho.

Perezida Museveni niwe wigeze kubwira Amama Mbabazi ubwo bashwanaga mu myaka itandatu ishize, ati “Ntukazane amarangamutima mu bintu bireba igihugu”.

Igihe kirageze ngo yumve neza ubu butumwa na we ubwe. Ntabwo kwiyumva kwe gukwiriye kuruta inyungu z’igihugu. Ntabwo ari ibintu bibereye umusaza nka we.

Ba bagande bo ku mbuga nkoranyambaga, bavuga ko Perezida Museveni arambiwe ‘ubusabe budashinga’ bwa Kigali kugira ngo umupaka ufungurwe. Baranabyiyemereye mu nama ubwo bahuraga na bagenzi babo bo mu Rwanda.

Kuki badashaka kuvuga ukuri? Ni uko ari bwo buryo bwo guhunga ibimenyetso simusiga u Rwanda rugaragaza rw’ibibi Uganda irukorera. Ni yo mpamvu nta cyakozwe nubwo habaye inama zirimo n’iyaberere muri Angola.

Turabizi ko hakiri urugendo ngo umubano mwiza ugaruke. Uko byagenda kose ariko, u Rwanda ntiruzabakuraho amaboko. Mubimenye rwose, tuzabikora nta gutakaza indangagaciro zacu n’inyungu z’igihugu, tuzakomeza gukorana namwe ku bifite akamaro. Ni ahanyu kutwiyungaho mu rugendo. Mwesibe biri.

Amasezerano yasinyiwe i Luanda Uganda yanze kuyashyira mu bikorwa ngo umubano wongere kuba mwiza
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza