Sosiyete ifasha abanyarwanda kugira ubwiherero bwujuje ibyangombwa, SATO, yifatanyije n’ishuri rya Trinity Primary School kwizihiza umunsi mpuzamahanga w’umugore, irigenera ubwiherero bwitezweho gufasha abana kunoza isuku.

Ni igikorwa cyabereye ku Ishuri Trinity Nursery and Primary School ku Gisozi ku gicamunsi cyo kuri uyu wa Mbere tariki 9 Werurwe 2020. Umuyobozi wa SATO mu Rwanda, Ntaganira Cyrus, yavuze ko bahisemo kwifatanya n’iryo shuri kwizihiza umunsi mpuzamahanga w’umugore no kurigenera ubwo bufasha nk’ishuri ryashinzwe n’umugore.

Ntaganira yavuze ko icyo gikorwa kiri muri gahunda za SATO zo gufasha abaturage mu bijyanye n’isuku no kugira imisarani myiza haba ku bayisanganywe bashaka kuyivugurura cyangwa abari kuyubaka.

Ati “Twaje hano kugira ngo dufatanye mu gikorwa cyiza cyo kwizihiza umunsi w’umwari n’umutegarugori ariko nkatwe turi muri gahunda zijyanye n’isuku n’isukura cyane cyane muri gahunda yo gufasha abaturage kugira ubwiherero bwujuje ibyangombwa bakoresheje imisarani ya SATO kugira ngo bavugurure imisarani imwe n’imwe twabageneye.”

Imisarani ya SATO ifite uburyo bwo kwipfundikirwa igihe ikoreshwa bikaba ari impamvu yorohereza abantu kunoza isuku. Ibyo ngo bituma isazi cyangwa utundi dusimba nk’ibinyenzi tutagira duhurira n’uwo mwanda.

Ni imisarane ikoze ku buryo kuyitunganya bitwara amazi make mu bwoko bwayo butandukanye burimo iyo kwicaraho cyangwa gusutamaho. Mu bijyanye no kuvidura ubwiherero, nabyo byorohera ababikora kuko abantu batabasha gushyiramo ibyo babonye byose.

Umuyobozi wa Trinity Nursery and Primary School, Umutoni Peace, yavuze ko ubwiherero butanu bahawe bugiye kubafasha kunoza isuku.

Ati “Ni ubwiherero bwiza cyane buje bwunganira ubwo twari dufite ariko noneho umwihariko bufite ni uko bufite isuku ihagije kandi butanga umutekano uhagije mu bana bato ku buryo nta mpungenge wagira ngo umwana aribwandure cyangwa ari butsikire.”

SATO ikomoka mu Buyapani, ikora imisarane irimo iyo gusutama, igura 8000 Frw na 12 000 Frw n’iyo kwicaraho igura 15 000 Frw. Trinity Nursery and Primary School ni ishuri rifite ishuri ry’incuke n’iribanza ryatangiye mu 2014 ribona ubuzima gatozi mu 2015. Abana biga mu mashuri abanza bamaze gukora ibizamini bya leta inshuro enye.

Abanyeshuri biga muri Trinity School bishimiye kwizihiza umunsi w'abagore
Igice cy'aho umwanda unyura gikoze ku buryo ugwamo hagahita hifunga kandi bukoze mu buryo unyerera ku buryo bidasabye amazi menshi mu kuyikorera isuku
Ntaganira Cyrus asobanura imikorere y'imisarani bakora muri SATO
Umuyobozi wa Trinity Nursery and Primary School, Umutoni Peace, yavuze ko ubwiherero butanu bahawe bugiye kubafasha kunoza isuku
SATO yavuze ko yahisemo gutanga ubufasha kuri iryo shuri mu kwizihiza umunsi mpuzamahanga w'umugore kubera ko ryashinzwe n'umugore


Kwamamaza

2009 - 2020 ©. All rights reserved