Ishuri ribanza rya Kigali Parents School ryahembye abanyeshuri bane baje mu banyeshuri 10 ba mbere batsinze neza ibizamini bisoza amashuri abanza mu mwaka wa 2021 ku rwego rw’igihugu, basabwa kuzakomeza guhatana no guharanira guhesha ishema ishuri bizeho.

Mu manota y’abanyeshuri basoje amashuri abanza n’icyiciro rusange, mu bana 10 ba mbere batsinze neza ku rwego rw’igihugu mu basoza amashuri abanza, bane ni abiga muri Kigali Parents School.

Aba bana bane barimo Rutaganira Yanis Ntwari wabaye uwa mbere ku rwego rw’igihugu, Uwayo Ryan Giggs wabaye uwa gatatu, Nziza Daniel wabaye uwa karindwi na Cyusa Eddie Twagirimana waje ku mwanya wa cumi.

Rutaganira Yanis Ntwari yavuze ko kuba ikigo cyabatekerejeho kibaha ishimwe byongera kubaha imbaraga zidasanzwe ku buryo no mu cyiciro bagiyemo bazarushaho guhangana no guharanira intsinzi mu masomo yabo ya buri munsi.

Ababyeyi na bo bagaragaje ko kurerera muri Kigali Parents School uba wizeye ko umwana wawe azabona amanota meza, bemeza ko nta mpungenge bashobora kugira no kuri barumana babo bakiri mu mashuri abanza bitewe n’uko ubuzima bw’umwana ku ishuri bukurikirwa umunota ku wundi.

Umuyobozi wa Kigali Parents School, Buzaale Gershom, yabwiye IGIHE ko gushimira abana biri mu buryo bwo kubahamagarira kongera kwitwara neza no kubagaragariza ko babashyigikiye.

Ati “Ubundi guhemba umwana bimuha kuzamura icyizere cye, buri mpano uko yaba ingana kose inezeza umutima w’umuntu nubwo yaba ari mukuru. Noneho kumva ko ari impamvu yo gutsinda neza bituma ahora aharanira gukora cyane kugira ngo ahore abona bya bihembo. Kandi no muri bagenzi be bimutera ishema.”

Bazaale yakomeje asaba aba banyeshuri gukomeza kwitwararika bagahesha ishema intsinzi babonye.

Ati “Icyo tubasaba ni ugukomeza kwitwara neza, bagakomeza kuzirikana inama bahawe na mwarimu igihe icyo ari cyo cyose kandi icya mbere tubashishikariza kurangwa n’ikinyabupfura muri byose.”

Yagaragaje ko icyafashije abana gutsinda ari uko mu bihe bya Covid-19 byanatumye amasomo ahagarara, bashyizeho uburyo bw’ikoranabuhanga bubafasha gukomeza gukurikirana amasomo yabo bityo bibarinda kudindira mu myigire. Iri shuri ntiryigeze ryifuza gutangaza ibihembo byahawe aba bana.

Yasabye ababyeyi bari bafite abana basoje amashuri abanza gukomeza gukurikirana ubuzima bwabo n’imibereho y’ishuri kugira ngo imyigire yabo itazasubira inyuma ndetse bikaba intandaro yo gutsindwa kandi bari abahanga.

Kigali Parents School ni ishuri riherereye mu Mujyi wa Kigali, Akarere ka Gasabo mu Murenge wa Kimironko, risanzwe ritsindisha abana benshi mu bizamini bisoza amashuri abanza kandi umuco wo gushimira uhoraho mu gihe cyose hari abana bahiga bagaragaye mu 10 ba mbere ku rwego rw’Igihugu.

Ubuyobozi bw’ishuri buvuga ko kugeza ubu intego bugiye gukoreraho muri uyu mwaka w’amashuri wa 2021/2022 ari uko nibura abanyeshuri 10 ba mbere mu gihugu bazatsinda neza ibizamini bya Leta bazaba biga kuri iri shuri.

Byari ibyishimo ku buyobozi bw'ishuri, abanyeshuri n'ababyeyi babo
Aba banyeshuri bane bigaga muri Kigali Parents School baje mu 10 ba mbere batsinze neza ibizamini bisoza amashuri abanza mu Gihugu
Umuyobozi wa Kigali Parents School, Bazaale Gershom yavuze ko bashimiye abanyeshuri kuko bibatera imbaraga zo kurushaho gukora cyane


Kwamamaza

2009 - 2021 ©. All rights reserved