IGIHE

Niko igihugu cyahumekaga: Nkusi Juvénal yagarutse ku rwibutso muri PAC yatitije abayobozi

0 28-10-2022 - saa 07:10, Akayezu Jean de Dieu

Umuyobozi utaramunyuze imbere ubwo yari ayoboye PAC [Komisiyo y’Inteko ishinzwe gukurikirana imikoreshereze y’imari n’umutungo by’igihugu) ajye ashima Imana. Mu ijwi rye rikakaye, igitsure gikomeye, uwabwirwaga ko azanyura imbere ya PAC iyobowe na Nkusi Juvénal yararaga asenga, asaba inema yo kumuva imbere amahoro!

Ni umusaza w’umuhanga ubarizwa mu basenateri 26 u Rwanda rufite ubu, akagira ubunararibonye muri politiki y’u Rwanda mu myaka 28 ishize rubohowe.

Inteko Ishinga Amategeko kuri we yabaye nko mu rugo kuko hafi imyaka 28 ishize niho yabarizwaga, asesengura, atanga inama, anakurikirana gahunda zitandukanye zigamije iterambere ry’igihugu.

Senateri Nkusi Juvénal yavukiye mu Karere ka Nyamagabe mu Majyepfo y’u Rwanda mu 1955. Yakuriye i Kibungo mu Karere ka Ngoma, mu Murenge wa Rukumberi na Sake. Yize amashuri abanza i Rukumberi, yiga amashuri yisumbuye mu iseminari nto y’i Zaza.Yakomereje muri Kaminuza Nkuru y’u Rwanda.

Mbere ya Jenoside yakorewe Abatutsi, Nkusi yakoze muri Minisiteri yari ishinzwe imirimo ya Leta (MINITRAPE) no mu miryango itegamiye kuri Leta.

Jenoside yakorewe Abatutsi ihagaritswe, yagiye mu Nteko Ishinga Amategeko y’inzibacyuho aranayiyobora, akomeza kuyibamo umudepite mu 2003 ubwo Itegeko Nshinga rishya ryari rimaze gutorwa.

Ku myaka 67 ibitekerezo bya Nkusi biracyari bitaraga! IGIHE yaganiriye na we ku rugendo rw’u Rwanda rwo kwiyubaka, uruhare rw’Inteko Ishinga Amategeko ndetse n’u Rwanda yifuza kubona.

IGIHE: Uri umwe mu binjiye mu Nteko Ishinga Amategeko nyuma ya Jenoside, yari imeze gute?

Senateri Nkusi : Inteko yagiyeho mu 1994 yari itandukanye cyane n’iyariho ku ngoma zabanje. Yari inteko ihuje abantu baturutse impande nyinshi, bafite amateka atandukanye ndetse n’imyumvire itandukanye kubera ko abantu bakuriye ahatandukanye.

Icya mbere cyari uguhuza abo bantu bicaranye kugira ngo bumvikane ku murongo bashobora gukurikiza. Buri wese yabaga afite ubushake bwo kugira ngo aveyo, ubushake bwo kugira ngo igihugu kiveyo.

Hanyuma abantu barabikora, igihugu kiriyubaka, hubakwa abantu, basubira mu byabo kuko mu 1994 nta Munyarwanda wari utuye mu bye, bari baraguye intagarane, umwe yaragiye ukwe n’undi ukwe. Kongera kumva ko wabashyize hamwe ni intambwe ikomeye yo kubaka igihugu.

Mwabonaga ejo hazaza hashoboka?

Abenshi dukurikije icyizere cyo kurama muri icyo gihe, abenshi twari tudafite icyizere cyo kumara imyaka 20. Icyo gihe ntabwo ari wowe wenyine uba witekerejeho, uba watekerereje n’abandi bazaza kugira ngo bazasange hari aho ugeze.

Icya mbere u Rwanda rukagira intekerezo yumva ko Abanyarwanda ari umwe, ubwumvikane bwa bose, Umunyarwanda akaba afite icyerekezo yumva ko Abanyarwanda ari abanyamigabane bakorana kandi bakora kugira ngo bose bunguke kuko nihagira udakora neza, byatuma bahombya icyo gihugu.

Kuvuga ngo buri wese agire uruhare ntihagire usigara muri ibyo bikorwa, ntihagire ujya inyuma, usigara nawe umufashe kugira ngo yihute ariko mwese mujyane. Muri icyo gihe iyo nzira nikurikizwa ibyiza bizagerwaho.

Benshi vuba aha bakuzi muri PAC, Nkusi umudepite utavugirwamo… ?

Gukora kuriya buriya ni igihugu kiba gituma ubikora kuko cyiyemeje ihame ry’uko umuntu agomba kubazwa ibyo yakoze, buriya ntabwo ari ukuvuga ngo ni kanaka, ngo ni Nkusi cyangwa bagenzi banjye, oya buriya igihugu nicyo kiba cyatanze umurongo w’uko ibintu bigomba gukorwa.

Noneho nawe ukagira Imana ukaba uri muri uwo mwanya icyo gihe. Ni ubushake igihugu kiba cyagaragaje ko buri wese mu nshingano ze, arangiza inshingano kandi akazirangiza neza. Muri aho rero niho hava ibintu abantu bapfa, imicungire y’umutungo, ibyo gusangira, bapfa kudakora neza.

Umutungo wa leta ucunzwe neza nta kibazo cyazamo, iyo ucunzwe nabi ni ukuvuga ngo bariya se kuko bawucunga nabi? Rero ni ubushake bw’igihugu kandi bukomeza na n’ubu, murabibona buri gihe. Ubushake bwo kugira ngo umuntu wese iyo yakoze ikintu azakibazwe.

Amahame arahari yo gukurikiza, amahame yo gukora neza, kuzuza inshingano zawe ukazirangiza neza, iyo utabikoze ni ukuvuga ngo uba uhemukiye Abanyarwanda, ibigo birahari bishobora kugukurikirana.

Kuki abayobozi benshi bitabaga PAC bagutinyaga?

Biriya rero niko igihugu cyahumekaga ntabwo ari ukuvuga ngo ni umuntu. Bo baba baguhemba, uba ufite umushahara baguhaye n’ibindi baguha, icya ngombwa ni uko ubikora uko bishakwa, uko bigenwa kandi ukabirangiza nk’inshingano Abanyarwanda baguhaye. Kubijenjekera nibyo byaba ari ikosa, ugomba gukora ku buryo iby’Abanyarwanda byitabwaho mu mpande zose kuko ni intego abantu biha, kuyigeraho biba ari ikibazo ariko ni ukugerageza.

Kugerageza kubikora, ababikoze [abacunze nabi ibya rubanda] bagatangazwa, bakagira ison […] umuntu ugasanga yiyitaga inyangamugayo ejo bundi wamwumva, uti burya hahandi yageze ngo yari umugabo, arashoboye, buriya uriya mutungo yawuvanye hariya?

Byonyine ubwabyo ni igihano kuko gituma abantu bagutakariza icyizere. Iyo uhombye aho ngaho n’ahandi urahomba.

Kwegurira ibigo bya Leta abikorera mubona ari umuti urambye wo kubirinda ibihombo?

Abikorera ntabwo ariwo muti wa nyuma kuko nabo barahomba. Mugira ikinyamakuru iyo ngisomye hari ibintu bya cyamunara, ntimubisohora? Si abikorera se? Icya ngombwa ni umurongo abantu baba bagomba gukurikiza.

Kandi iyo bavuga gucunga […] nk’ubwo watanze urugero rwa leta, urabona ko mu 2024, Abanyarwanda bose bazaba bafite umuriro w’amashanyarazi, urumva kugicunga [Ikigo gishinzwe Ingufu, REG] ari kimwe n’igihe umuriro twajyaga tuwubona hano muri Kigali gusa mu cyaro utahagera ?

Ni ukuvuga ngo abakiliya bariyongereye, umuriro usigaye uboneka buri gihe, gukurikirana kujya kureba muri za mubazi, guhuza amafaranga muri za konti n’ibindi. Ibyo ni imicungire igenda yiyongera nayo n’abacunga nabo bakagenda bongerwa.

Niba abakiliya babaye miliyoni eshanu n’igihe wari ufite abakiliya ibihumbi 200 […] Ese abakozi bakiraga abantu ibihumbi 200 nibo bazafasha miliyoni eshatu? Urumva ko n’abakozi bagomba guhora bahugurwa ku bijyanye n’imicungire igezweho.

Nkusi Juvénal yagaragaje ko gukurikirana ikoreshwa ry'umutungo wa Leta nta kujenjeka ari ingenzi kugira ngo iterambere igihugu cyifuzwa rigerweho
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza