IGIHE

Numvise nduhutse, nkeye ku mutima- Rtd Lt Col Guillaume Ancel avuga ku rugendo rwa Macron i Kigali

0 6-06-2021 - saa 06:27, Karirima A. Ngarambe

Guillaume Ancel wahoze ari Umusirikare Mukuru w’u Bufaransa wari mu Rwanda mu gihe cya Jenoside yakorewe Abatutsi muri Mata 1994, yatangaje ko yashimishijwe n’imbwirwaruhame Perezida Emmnuel Macron yavugiye mu Rwanda kuko irimo ukuri ku ruhare rw’iki gihugu muri Jenoside yakorewe Abatutsi.

Perezida w’u Bufaransa, Emmanuel Macron yasuye u Rwanda ku wa 27 Gicurasi mu ruzinduko rw’iminsi ibiri, rwarangiye ibihugu byombi biteye intambwe mu kuzahura umubano wari umaze imyaka 27 ucumbagira.

U Rwanda rwashinjaga u Bufaransa kugira uruhare mu gutera inkunga umugambi wa Jenoside n’ishyirwa mu bikorwa ryawo ariko u Bufaransa ntibwari bwarigeze bushaka kugaragaza uruhande buhereyemo.

Perezida Macron ubwo yasuraga Urwibutso rwa Jenoside rwa Kigali yemeye uruhare iki gihugu cyagize muri Jenoside yakorewe Abatutsi mu 1994.

Mu Kiganiro IGIHE yagiranye na Rtd Lieutenant Colonel Guillaume Ancel wari mu Rwanda mu gihe cya Jenoside yakorewe Abatutsi, yavuze ko kuba Perezida Macron yaraje i Kigali akajya ku Rwibutso agasaba abarokotse Jenoside impano y’imbabazi yicishije bugufi ari ikintu cyamukoze ku mutima.

Ancel yari amaze igihe agaragaza uruhare rw’iguhugu cye muri Jenoside yakorewe Abatutsi ndetse yabyanditseho ibitabo bitandukanye.

Yagize ati “Numvise nduhutse, nkeye. Numvise nduhutse kuko imyaka 27 yo guhakana uruhande rw’u Bufaransa yari ishize. Twari tumaze imyaka myinshi twibeshya, twibeshye mu gihe cya Jenoside, twibeshya na nyuma ya Jenoside.”

Ancel ashima intambwe Macron yateye akemera uruhare u Bufaransa bwagize muri Jenoside yakorewe Abatutsi

Guillaume yakomeje avuga ko igihe cyari kigeze ngo u Bufaransa bubare inkuru itandukanye nyuma y’igihe kinini bwifatanyije n’abo yise "Aba-Nazi bo mu Rwanda", ikuraho ihakana kandi ihoza abarokotse Jenoside.

Ati “Ibyo ni byo Macron yazirikanye muri iyo mbwirwaruhame, ntekereza ko ari iy’amateka ikwiye. Numvise nkeye kuko hari hashize igihe duharanira ko ukuri kuri iyi ngingo kujya ahabona.”

Yakomeje agira ati “Ibyo ntacyo bivuze ugereranyije n’akababaro k’abarokotse Jenoside yakorewe Abatutsi no ku Banyarwanda ariko nari mfite ipfunwe kubera igihugu cyanjye. Nari mfite ipfunwe ku bwanjye nk’umuntu wahoze ari umusirikare mukuru kuba narabaye mu mwanya nafatanyijemo n’abicanyi bo mu Rwanda (yagereranyije n’aba-Nazi) nari mfite ipfunwe ku bw’abarokotse tutahaga icyubahiro tubagomba mu gihe bibuka ababo barenga miliyoni twashoboraga kuba twaratabaye.”

Guillaume ashima intambwe ya Macron utariyibagijeumwanya arimo mu Bufaransa, akagira imbaraga zo guhagarara imbere ya Perezida Kagame yemera ko ‘bibeshye’ kandi basaba abarokotse jenoside impano y’imbabazi.

Ati “Ni ibintu bindema umutima mu buryo budasanzwe.”

Intambwe ya Kagame ni ikimenyetso cy’ubwiyunge

Perezida Paul Kagame uherutse mu ruzinduko mu Bufaransa, yagiranye ibiganiro n’abahoze ari abasirikare bakuru b’iki gihugu bari mu Rwanda kuva mu 1990 kugeza mu 1994.

Guillaume Ancel abajijwe uko yakiriye uyu mubonano aho Kagame yicaranye n’abantu bari bahanganye mu gihe cya Operation Turquoise, yavuze ko ari ikimenyetso cy’amahoro n’ubwiyunge.

Ati “Ntacyo mpisha, nashimye uyu mubonano. Ni ikimenyetso cy’amahoro yagaragaje. Ntiyigeze ashaka kurwana n’u Bufaransa kandi twagombye kuba twaramwumvise mu gihe cya Operation Turquoise. Inshuro nyinshi abasirikare [Inkotanyi] babaga bafite uburyo bwo kwica cyangwa gukomeretsa Abafaransa ariko Kagame yarababujije. Ntekereza ko Abafaransa batari bazi ko Kagame atigeze ashaka kurwana n’u Bufaransa.”

Uyu mubonamo ngo ni inzira yo kugarura amahoro no kubaka ahazaza mu mubano w’u Bufaransa n’u Rwanda.

“Byaranshimishje cyane, ndashimira Kagame ku bw’iki kimenyetso yakoze. Ni ikimenyetso cy’ubwiyunge, ni ikimenyetso cy’ahazaza.”

Umunyamakuru yabajije Ancel uko yakiriye guhura kw’abahoze ari abasirikare b’u Bufaransa na Perezida Kagame, asubiza agira ati “Ntakubeshye nanjye nifuzaga kuba naba ndi muri bariya basirikare bakuru bakiriye Perezida Kagame, ariko bahisemo abagize uruhare mu kuyobora ibyo Ingabo z’ubufaransa zakoze mu Rwanda hagati ya 1990 na 1994.”

Yavuze ko iyo aza kugira amahirwe yo guhura na Perezida Kagame yari kumushimira, akamubwira ko ari “umuyobozi w’intangarugero n’umugabo udasanzwe wanditse amateka akomeye”.

Ancel nubwo yanditse ibitabo bitandukanye ku ruhare rw’u Bufaransa muri Jenoside yakorewe Abatutsi, ntabwo yaherukaga mu Rwanda. Yagiye ahabwa kenshi ubutumire ariko akanga kuza.

Kuri ubu Ancel yavuze ko icyamubuzaga kuza Perezida Macron yagikuyeho. Ati “Ubu uyu munsi niteguye kuza mu Rwanda nkeye igihe cyose natumirwa kuko inzitizi Perezida Macron yazikuyeho.”

Guillaume Ancel yavuze ko uruzinduko rwa Macron mu Rwanda n'imbabazi yahasabiye byamuruhuye umutima
Guillaume Ancel yavuze ko kuba Kagame yaricaranye n’abantu bari bahanganye mu gihe cya Operation Turquoise ari ikimenyetso cy’amahoro n’ubwiyunge
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza