IGIHE

Shining Stars yateguye umugoroba wihariye wo kuramya yatumiyemo Masasu n’abahanzi bakunzwe

2 14-08-2019 - saa 12:55, Uwiduhaye Theos

Itsinda ryo kuramya no guhimbaza Imana mu mbyino rya Shining Stars ryateguye igitaramo ryise “Slaves of Worship 2019” ryatumiyemo Apôtre Ndagijimana Yoshua Masasu n’umugore we Pasiteri Lydia Masasu n’abahanzi bazwi mu ruhando rw’indirimbo ziririmbirwa mu nsengero.

Shining Stars ibarizwa muri Evangelical Restoration Church, Paruwasi ya Masoro mu itorero riyoborwa na Masasu.

Ryateguye igitaramo giteganyijwe kubera kuri ERC Masoro ku wa 18 Kanama 2019 muri Shekinah Hall guhera saa kumi n’imwe z’umugoroba, kwinjira akaba ari ubuntu.

Iki gitaramo ngarukamwaka kigiye kuba ku nshuro ya kabiri; cyatumiwemo abahanzi barimo Patient Bizimana, Serge Iyamuremye, Arsene Tuyi, James & Daniella bamamaye mu ndirimbo ’Mpa amavuta’, Christian Irimbere, Tehillah Dawn Ministries, Shekinah Dance Masoro, Shekinah Drama Team na Worship Team.

Gifite intego iri mu Gitabo cy’Abaroma 6.18 hagira hati “Maze mubatuwe ku byaha, muhinduka imbata zo gukiranuka.’’

Visi Perezida wa Shining Stars, Muganura Samuel, yabwiye IGIHE ko igitaramo kigamije gufasha abantu kunezererwa mu kubaturwa ku bubata bw’Isi y’umwijima bagana mu y’umucyo.

Yagize ati “Tuzaba tunezerwa ko twavuye mu bubata bw’umwijima tukaba turi mu mucyo. Tuzabwira urubyiruko ko bishoboka kubohoka ku ngoyi z’ibindi ukabatwa n’Imana.’’

Yakomeje ati “Bazaze biteguye gutungurwa k’Umwuka Wera. Icyo nabizeza ni uko tuva mu bwiza tujya mu bundi.’’

Igitaramo “Slaves of Worship” kizayoborwa na Apôtre Masasu n’umugore we Pasiteri Lydia Masasu.

Kuri Shining Stars ibifata nk’umugisha kuzabana n’ababyeyi bayo mu by’umwuka, kuko bibereka ko bashyigikiwe.

Ati “Turashima Imana ko tugira abantu baturera mu mwuka. Uwumva ko atagikeneye kurerwa ibye biba byarangiye. Turashima Imana ko batuba hafi buri munsi bakaduha n’umurongo wo kunoza ibyo Imana yaduhaye. Kujyana n’umubyeyi wawe akagushyigikira bigutera ishema, bikagukomeza.’’

Shining Stars yatangijwe mu 2004 aho ikora umurimo wo kuramya no guhimbaza Imana mu mbyino zigezweho za kizungu. Yatangiranye intego yo gufasha bagenzi babo gukizwa no kugarukira Imana.

Kuri ubu igizwe n’abagera kuri 60 barimo abagaragara ku rubyiniro bagera kuri 20.

Iri tsinda ryishimira ko mu mpano z’abarigize benshi bagiye bamenya Imana barimo 26 bakiriye agakiza muri uyu mwaka wa 2019.

Shining Stars yashinzwe mu 2004 ikora umurimo wo kuramya no guhimbaza Imana mu mbyino zigezweho
Ku nshuro ya kabiri, Shining Stars yateguye igitaramo yise "Slaves of Worship"
Shining Stars ni itsinda rimaze kubaka ibigwi mu muziki wo kuramya Imana ryanagiye ryegukana ibihembo bitandukanye bitangwa na Groove Awards Rwanda
Apôtre Masasu n’umugore we Pasiteri Lydia Masasu ni bo bazayobora igitaramo cya Shining Stars
Rugarama James n'umugore we Rugarama Daniella bamamaye mu ndirimbo 'Mpa amavuta' batumiwe mu gitaramo
Shining Stars yateguye igitaramo cyagutse cyo kuramya Imana binyuze mu mbyino zitandukanye
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Mbabazi verene 2019-08-15 17:00:35

Imbata za Kiristo turahari cyane ngo turamye UMWAMI tunamushimira ko yatubohoye ku ngoyi z’Umwanzi, Courage rero Turahari ngo tumuramye,tumushime.Ameeeen

2
MAN 2019-08-15 04:58:48

Ni byiza cyane rwose iyo umuntu akijijwe aba avuye mu bubata bw’umwanzi akaba imbata ya Kristo, niwe dukwiriye kuramya. Courage Shining Stars, turabashyigikiye kandi kuc yumweru tuzaza.

Kwamamaza