IGIHE

Abapadiri bavuze ku mvugo ya Pasiteri Rutayisire wanze kuba ‘Padiri w’umutindi akajya aho barongora’

137 11-02-2019 - saa 08:16, IGIHE

Umushumba w’Itorero Angilikani muri Paruwasi ya Remera, Pasiteri Antoine Rutayisire, aherutse kuvuga ko yize mu iseminari nto ya Zaza nyuma akaza kuvamo kuko atifuzaga kuba umupadiri w’umutindi, uzajya kubyara hanze no gusambana n’abagore b’abandi.

Ni ikiganiro yagiranye na IGIHE cyazamuye amarangamutima ya benshi, bamwe bamushimira umwanzuro yafashe abandi bamunenga ko yashatse gusebya abapadiri.

Rutayisire w’imyaka 61 yavuye mu iseminari afite imyaka 19. Yavuze ko uko yiyumvaga icyo gihe bitamwemereraga gukomeza ngo azabe umupadiri mwiza.

Ati “Sinjya mbeshya ngo mvuge ngo ni uko numvaga ubupadiri ntabushaka. Urabizi iyo umuntu afite imyaka 19 ari umuhungu, hari imitingito iba imaze kuba myinshi mu mubiri kandi wareba hanze ukabona inkumi zose zabaye nziza.”

“Ukareba kuzaba ingaragu y’umupadiri, inkumi nziza hariya, imitingito mu mubiri nkumva bitazahura. Rero aho kugira ngo mbe padiri w’umutindi ugenda nkabyara abana, ngasambana n’abagore b’abandi, mpitamo kujya aho barongora.”

Ntabwo yari asobanukiwe umuhamagaro

Bamwe mu bapadiri Gatolika baganiriye na IGIHE, bahurije ku kuvuga ko kuba Dr Rutayisire yaravuye mu iseminari kubera ibishuko by’abakobwa byaba byaratewe no kudashishoza.

Umunyamabanga wungirije w’Inama y’Abepisikopi Gatolika, Padiri Maniraho Jean Damascène yagize ati “Nabonye atarasobanukirwa neza n’umuhamagaro kuko umuhamagaro ugenda ukuganisha ku kintu cy’ingenzi kiruta ibindi mu buzima kikakugeza ku Mana. Imihamagaro yindi tugenda tujyamo ari ugushaka umugore no kuba umupadiri yose ni ituganisha mu bugingo bw’iteka.”

Maniraho yavuze ko bibaye byo akaba yaravuye mu iseminari kubera abakobwa beza, yaba yaribeshye cyangwa atarabitekerejeho.

Ati “Yagombye kuba yarabivuyemo ari uko abonye ko agiye gukurikira undi muhamagaro uruta uwo yari arimo kugira ngo uzamugeze mu bugingo bw’iteka. Gushishoza nicyo kintu atari afite muri icyo gihe cy’ubusore bwe bituma atarabashije kumenya icyiza cy’ubupadiri .”

Umunyamabanga wa Komisiyo y’Ubutabera n’Amahoro muri Kiliziya Gatolika, Padiri Gasana Vincent, yabwiye IGIHE ko kuba Rutayisire yarananiwe kuba umupadiri akavamo ari byiza, gusa amunenga ko yatesheje agaciro uwo muhamagaro.

Gasana yavuze ko Rutayisire atagombaga kuvuga ko yavanywe mu bupadiri n’abakobwa ngo atica umuhamagaro kuko ntaho ibigeragezo bitaba.

Ati “Nshobora kuvuga nti ‘ese ubundi ahongaho ho barongora, ni ukuvuga ko ho nta wajyayo kandi ibintu bigapfa? Ubuzima bwose bugira ingorane zabwo bukagira n’ibyiza byabwo. We rero niba abona ko ingorane ziri aho batarongora gusa cyangwa se niba yumva ko ku ruhande rwe uko yumva ubuzima kurongora ari cyo kiri imbere ibindi akabiha agaciro gake, ntabwo twahuza.”

Padiri Gasana avuga ko nubwo ibyo Rutayisire yavuze hari ukuri bigaragaza, imvugo yakoresheje ku bapadiri barenga ku masezerano yabo yamuteye kwibaza byinshi, aho yabise abatindi.

Uyu mupadiri asobanura ubutindi nk’ijambo rivuga ubukene bukabije, umuhemu witura ineza inabi cyangwa se umuntu w’indashima. Ati “Impamvu y’ibyo bisobanuro byose akenshi ni uko uwo wise umutindi ibyo byose bihita byumvikanamo.”

Gushyingirwa si ukurangiza imitingito

Umuyobozi w’Ibiro by’Inama y’Abepiskopi bishinzwe Uburezi Gatolika mu Rwanda, Padiri Nduwayezu Janvier, yavuze ko atemeranya n’imvugo ya Dr Rutayisire kuko hari abashobora kubifata nk’aho gushyingirwa bigamije kwishimisha gusa.

Ati “Abantu bashobora kumva ko gushyingirwa kugizwe no kurongora. Ukumva imitingito, ugahura n’umugore hanyuma imitingito ikagushiramo. Gushyingirwa ni igikorwa ndengakamere gikomeye Imana yahamagariye umugabo n’umugore kugira ngo babe ikimenyetso cy’urukundo Imana ikunda abantu.”

Yavuze ko gushyingirwa ari ikintu gikomeye ku buryo “byaba ari ikibazo kureka abasore bakabihitamo bashingiye ku bibazo bahuye na byo muri sosiyete.”

Ati “Ubisomye kuriya cyane nk’abakiri bato, bashobora gukeka ko gushyingiranwa ari ikintu cyo kurangiza imitingito ndetse hakabamo n’ikindi cyo kubona umukobwa ukamubonamo igikoresho cyo kwishimisha.”

Padiri Gasana umaze imyaka 38 ari Umusaseridoti, asanga ntaho ingorane zitaba haba guhitamo kuba umupadiri cyangwa kujya gushaka umugore ngo kuko ‘Kuba indahemuka ku bumanzi no kuba indahemuka ku wo mwashakanye byose bikomera. Uba indahemuka mu bapadiri n’uba indahemuka ku wo bashakanye byose biri ku rwego rumwe kandi binanirana kimwe.”

Umupadiri wasambanye n’umukiristu wasambanye bose ni bamwe

Padiri Gasana Vincent yavuze abantu badakwiriye gufata umupadiri wasambanye nk’uwakoze ishyano ku buryo acirirwaho iteka hanyuma umukirisitu wasambanye we bigafatwa nk’ibisanzwe.

Yemera ko muri buri muhamagaro habamo ingorane umuntu agomba guhangana nazo kugeza azitsinze aho kuzihunga.

Ati “Abakiristu baravuga ngo ariko abapadiri kuki basambana, wamubwira uti ‘ese mwe ko musambana’ bati ‘ariko turabyemerewe! Ubukiristu se niko buvuga ngo murabyemerewe? Wemerewe gushaka umugore umwe mukabana, mugakundana ariko ntiwemerewe gushaka bose.”

Padiri Maniraho niho ahera avuga ko Dr Rutayisire atagombaga kuvuga ko yavuye mu iseminari kubera abakobwa beza ngo kuko nta gihe batiyongera.

Ati “Ashobora kuvuga ati mu bupadiri nabonaga ntashobora kubikora neza kugira ngo nzahure n’Imana, mpisemo kujya hariya kuko mbona nzabasha kubibamo neza kandi bizampuze n’Imana ariko iyo uvuze ngo mbona abakobwa beza bagenda biyongera baba benshi, n’ubu bakomeje kwiyongera ku buryo byazarangira buri gihe ugenda udafite aho ujya.”

Umunyamabanga wa Komisiyo y’Ubutabera n’Amahoro muri Kiliziya Gatolika Padiri Gasana yavuze ko ahubwo ibigeragezo mu muhamagaro bituma ugira ubunararibonye buruseho.

Yashimangiye ko mu gihe umuntu ahuye n’ibigeragezo akabura amahitamo biba byiza kugisha inama aho guhitamo agendeye ku marangamutima. Ikindi kandi ni uko ikigeragezo kigera ku muntu kugira ngo agikuremo amasomo, bityo ko biba bisaba gushikama aho guhunga.

Pasiteri Rutayisire yaba afite ukuri?

Imvugo ya Pasiteri Rutayisire, ku rundi ruhande yahuzwa n’ibikorwa by’urukozasoni ndengakamere bikomeje gushinjwa bamwe mu bapadiri n’abandi bihayimana bo muri Kiliziya Gatolika birimo gusambanya abana b’abahungu n’abakobwa no gukorera ihohoterwa rishingiye ku gitsina ababikira ndetse bamwe bakagirwa abacakara b’ubusambanyi.

Umwaka wa 2018 waranzwe no gusaba imbabazi kwa Papa Francis no kwegura kw’abapadiri n’abasenyeri kubera ibyaha by’ubusambanyi. Urugero ni aho Abasenyeri bose bo muri Chili beguriye rimwe kuko nta cyo bakoze ku bapadiri bashinjwe ibyaha byo gusambanya abana.

Ntawakwirengagiza Raporo y’Umushinjacyaha wa Leta ya Pennsylvanie muri Leta Zunze Ubumwe za Amerika ikubiyemo ibikorwa by’urukozasoni by’abapadiri barenga 300 basambanyije abana barenga 1000.

Mu cyumweru gishize Papa Francis ubwe yemeye ko abapadiri n’abandi bihayimana bahohoteye ababikira ndetse ko hari bamwe bahagaritswe.

Umwaka ushize nibwo Musenyeri Franco Mulakkal wayoboraga Diyosezi muri Jalandhar mu Majyaruguru ya Leta ya Punjab mu Buhinde, yafashwe ashinjwa gufata ku ngufu umubikira inshuro 13 hagati ya 2014 na 2016, ariko yarabihakanye.

Ikinyamakuru cy’abagore i Vatican giherutse kwandika ko hari aho ababikira bahatiwe gukuramo inda z’abapadiri kandi ari imigirire ihabanye n’imyemerere ya Kiliziya.

Mu mwaka ushize Papa yagaragaje ubushake mu gufungura ibiganiro ku kuba Kiliziya Gatolika yatangira kwemerera abagabo bashatse kuba abapadiri bemewe hirya no hino mu bihugu usanga barabayemo iyanga. Ibi benshi babibonyemo nko gushaka uburyo abapadiri bose bazemererwa gushaka mu buryo bweruye ariko byabanje kunyuzwa kure.

Igitsina gikomeje gukora ibara mu bihayimana muri Kiliziya Gatolika, ari nako isigwa icyasha gikomeye ku buryo hageze aho gushaka kw’abihayimana kwemerwa bityo bakabasha kujya bishimisha mu mibonano mpuzabitsina biciye mu nzira zemewe mu buryo buhabanye no kwiba, gufata ku ngufu no gushuka abana bakiri bato bakabangizwa.

Umuyobozi w’Ibiro by’Inama y’Abepiskopi bishinzwe Uburezi Gatolika mu Rwanda, Padiri Nduwayezu Janvier, yavuze ko atemeranya n’imvugo ya Dr Rutayisire kuko hari abashobora kubifata nk’aho gushyingirwa bigamije kwishimisha gusa
Padiri Gasana umaze imyaka 38 ari Umusaseridoti, asanga ntaho ingorane zitaba haba mu guhitamo kuba umupadiri cyangwa kujya gushaka umugore
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Paji: 1 | 2 | 3 | 4 | 5 | 6 | 7 | 8 | 9 | ... | 14  

1
DUKOMEZEGUSENGA Védaste 2019-02-25 16:27:54

Yewe koko rero ntaho yari avuye ntaho yagiye.Nari nzi ko Protestant bivuga Umuhakkanyi w’inyigisho za kiliziya Gatolika none ndumva uyu musaseridoti(ndavuga RUTAYISIRE)adafite impamvu afatika yamuteye kuva muri Kiliziya y’i Roma akajya mu y’Ubwongereza(Anglcan).Niba rero ari nta hame rya Bibiliya uruhande rumwe rwica mu gihe urundi ruryitaho;numva n’ubundi agikorera Gatolika,akaba yahabwa inama zo gukora nk’umulayiki kuko bo bagumana n’abagore babo kandi bakagira ibyo bakora.Be kumurakarira rero kuko ibyo yavanye aho mu iseminari ni nabyo yigisha muri EAR nkurikije uko nasomye mu mvugo ye

2
Nkusi Norbert 2019-02-20 18:02:11

Ariko Rutayisire yabivuze kugiti cye ntabwo yavuzeko abapadiri ari abatindi we yavuze uko yiyumvaga ko atashobora kwihangana ahitamo kujya aho yemererwa gushaka! Abamushinja ko yasebeje abapadiri rero sinzi aho mubikura!

3
Tuyisenge Jean d'amour 2019-02-15 23:59:57

Njye ntawe ngiye kuvuga ko ari mukuri cg ngo uyu arabeshya icyo mvuga nuko waba ingaragu cg Ufite umugore ubushurashuzi nicyo kintu keze muriyiminsi evidence wajya munkiko cg ukareba hano hanze ukambwira umubare wabagabo bafite abagore ariko bateye abana babakobwa amada! nubu ndamuzi pastor afite umugore ariko umukobwa abereye umuyobozi amutwitiye umwana Ibi bivuze iki rero? kuzana umugore wamugani bidasobanuye Kuba utsinze urugamba burundu ahubwo Uba utangije urundi rushya Icyo twagakwiye gushyiraho igihe cyacu tuvuga nukugerageza kuzuza inshingano zacu uko bikwiye aho guca Imanza zo gutungana urutoki yaba bwana Rutayisire ntiyarakwiye kuvuga yaba nabo bapadiri ibyo bavuze bishoboka ko byatewe nurwikekwe, igikwiye rero nukoroherana kuko ntawejejwe ahubwo nitwe tugomba kugerageza kweza ibikorwa byacu byaburimunsi munshingano zacu

4
Rwema 2019-02-15 23:45:12

Ariko iyo ujya kuvuga ukavuga ngo uzi ukuntu nakundaga Rutayisire,uba ushatse kuvuga iki?wamukundiraga iki?ngo uhiga ubutwari na kiliziya?mujye mubanza kumva imvano yicyo umuntu yashatse kuvuga mureke guhubuka,muca imanza.ubwo se ko murimo muca iteka muca imanza,nibwo mugaragaza ko muri abakiristu?burya mujye mwirinda gukabya ibintu,nta dini cg itorero rizinjira mu ijuru.mwishyuha imitwe ,mureke abitwa abavugizi bamadini bavuge ubwo tuzareba ikivamo,bo burya baba bazi umukino kuturusha

5
Gashugi 2019-02-15 23:28:50

Ariko abafana bamadini mwaba mute?mwashyuhijwe mu mutwe n’abapadiri n’abapastors?bariya bafite aho bahurira,nimubareke mukurikire Imana maamenye,musome I Jambo ry’Imana mugerageze kurishyira mu bikorwa,kuko yaba Padiri,Pastor,ntanumwe uzaduhesha ijuru.muve rero mu matiku abacyerereza,abashyamiranya,kuko ibyo no bimwe mubituma tuguma mubukene.kd ntimukihutire kuvuga.icyi gihugu gifite ubutabera,niba harimo icyaha cyagaragaye mwiba abashinjacyaha,mureke justice ikore akazi kayo.fanatisme irasenya,irashyamiranya,.......

6
Roger 2019-02-15 12:33:31

@Kamwezi, kuba wava kuri Pr, Rutayisire ntacyo bivuze kuko utari Imana yamuremye. Uretse nawe n’iyo isi yose yamuvaho ntacyo yaba na gitokuko na YESU umwana w’Imana abantu bamuvuyeho kugeza no kuntumwa babanaga ziramugambanira izindi ziramwihakana kandi yarabakijije indwara abandi akabazurira ababo bapfuye. So, uramuvaho se ahubwo wamubayeho ryari ko atariwe wakagombye gukurikira ahubwo wakurikiye Iyakuremye ikanakwitangira urakurikira umuntu upfa gute?

7
ben 2019-02-14 15:28:19

Erega hano ntawuburanira abapadiri! Icyo tunenga n’uburyo ibyo Rutayisire yavuze bikennye ubushishozi! Kimwe cyo gushaka umugore si ukwimara irari ry’umubiri kuko umugore si umucakara w’imibonanompuzabitsina.

Ikindi, kumva ushaka umugore ntibyakubuza umuhamagaro w’ubupadiri, ahubwo ikiri ukuri, nta muhamagaro yari afite.

Ikindi ni uko nta bubasha afite bwo kuvuga ko hari umupadiri w’umutindi, haba Mu butunzi cyangwa Mu myifatire. Ahera kuki ashinja!! Wasanga abo ashinja Imana ibabonaho ubutingane.

8
Kamwezi 2019-02-14 07:50:26

Pstor Rutayisie rwose abantu bamukundaga, ariko noneho bamwe baramuvaho kuko yiyerekanye uwo ariwe.Imvugo nyandagazi nk’iriya ye ntabwo ikwiye gusohoka mu kanwa k’umukozi w’Imama. Ese ko Rutayisire afite umugore we umaze gukura akaba wenda atagishashagira, buriya iyo abonye inkumi ishashagirana abyifatamo ate ko wumva yanze kuba Padiri kubera inkumi zishashagirana yabonaga?

9
Kami 2019-02-14 07:38:41

Aya magambo iyo avugwa n’undi mu pastor bari kuvuga ngo ni ba bandi b’injiji, none dore uyu ni doctor! Ndagira nte bagenzi? Ese nkubaze nyakubahwa, nta ba pastor uzi basambana? Nta bagabo cyangwa abagore bafite ingo ariko bakajya mu busambanyi? Gusambana rero ni ingeso si ikibazo cyo kuba uri ingaragu cvyangwa umeze ute. Rwose aha watanze message mbi, yerekana ikintu kibi ndetse yerekana ko utazi Imana kandi uru pastor. Nta mukristu muzima wibasira undi mukristu kuko twese turi abanyabyaha.

10
Roger 2019-02-14 04:10:24

UBU SE IYI NKURU IVUGA KO HAGIYE KUGARAGAZWA KO ABAPADIRI BA VATIKANI 80% ARI ABATINGANYI (ABAPADIRI B’ABATINDI) UBWO NAYO NI RUTAYISIRE WAYIVUZE RA? IKIBI NTIKIZIHISHIRA NUBWO MWAFANA CYANGWA MUKABIREKA BIZANAJYA KU KARUBANDA. MUHAGARARIWE N’ABATINGANYI ICYAHA CYATUMYE SODOMA IRIMBUKA BIGARAGAZA N’UKO IYI SI IGEZE KU MUSOZO.

Paji: 1 | 2 | 3 | 4 | 5 | 6 | 7 | 8 | 9 | ... | 14  

Kwamamaza