IGIHE

Musenyeri Kambanda agiye kwicazwa ku ntebe y’ubushumba ya Arkidiyosezi ya Kigali

3 12-01-2019 - saa 13:31, HABIMANA James

Arkidiyosezi ya Kigali yateguye ibirori byo kwicaza ku ntebe y’ubushumba Arkiyepiskopi mushya wayo, Musenyeri Kambanda Antoine, ugiye gusimbura Musenyeri Ntihinyurwa Thaddée Uzajya mu kiruhuko cy’izabukuru.

Ni ibirori bizabera kuri Stade Amahoro ku cyumweru tariki 27 Mutarama 2019, aho bizabimburirwa n’igitambo cy’Ukaristiya kizatangira i saa tanu.

Mu Ugushyingo 2018 nibwo Umushumba wa Kiliziya Gatolika ku Isi, Papa Francis, yemereye Musenyeri Thadée Ntihinyurwa, kujya mu kiruhuko cy’izabukuru, amusimbuza Musenyeri Kambanda Antoine, wayoboraga Diyosezi ya Kibungo.

Nyuma yo guhabwa izo nshingano, Musenyeri Kambanda yabwiye IGIHE ko yiteguye gusohoza ubutumwa yahawe abifashijwemo n’Imana.

Ati "Ni inshingano ziremereye ariko byose tubifashwamo n’Imana. Ubu hakurikiyeho gahunda yo kuzimukirayo no kuzahabwa inshingano no guhererekanya ububasha n’uwo nsimbuye."

Musenyeri Kambanda yavutse ku itariki ya 10 Ugushyingo 1958, avukira muri Arkidiyosezi ya Kigali. Ubu afite imyaka 60.

Amashuri abanza yayigiye i Burundi no muri Uganda, amashuri makuru nyuma y’imyaka mike yagiye kuyakomereza muri Kenya. Yarangije amasomo ya Tewolojiya mu iseminari nkuru ya Nyakibanda muri Diyosezi ya Butare.

Tariki ya 8 Nzeri 1990 yahawe ubupadiri na Mutagatifu Papa Yohani Pawulo II i Mbare muri Diyosezi ya Kabgayi, igihe yari mu rugendo rwa Gishumba mu Rwanda.

Agihabwa ubusaserdoti, Musenyeri Kambanda yatangiriye ubutumwa bwe nk’umwarimu akaba n’ushinzwe amasomo mu iseminari Nto ya Ndera i Kigali.

Kuva mu 1993 kugeza mu 1999 yagiye gukomereza amasomo muri Kaminuza i Roma, ahakura impamyabushobozi ihanitse muri Tewolojiya. Kuva mu 1999 kugera mu 2005 yabaye umuyobozi wa CARITAS ya Arkidiyosezi ya Kigali, aba n’umuyobozi wa Komisiyo y’Ubutabera n’amahoro muri Arkidiyosezi ya Kigali.

Yabifatanyaga no kwigisha mu iseminari Nkuru ya Nyakibanda, akaba n’umuyobozi wa Roho mu iseminari Nkuru ya Rutongo. Kuva 2005 kugeza 2006 yabaye umuyobozi wa seminari Nkuru ya Kabgayi, mu 2006 kugera 2013 yagizwe umuyobozi wa Seminari Nkuru ya Nyakibanda.

Ku itariki ya 3 Gicurasi 2013 nibwo Nyirubutungane Papa Fransisko yamutoreye kuba umushumba wa Diyosezi ya Kibungo, tariki 20 Nyakanga 2013 nibwo yahawe inkoni ya Gishumba. Intego ye ni “Ut vitam habeant” bivuze ngo ‘Bagire ubuzima’.

Mgr Ntihinyurwa w’imyaka 76, ku itariki 9 Werurwe 1996 niho yagizwe Arikiyepisikopi wa Kigali akaba ubu ahamaze imyaka 21. Yayoboye Kigali avuye muri Diyosezi ya Cyangugu yari amaze imyaka 16 abereye umushumba.

Muri Werurwe umwaka ushize nibwo byavuzwe ko yandikiye Papa Francis asaba guhagarika imirimo ye yo kuyobora Diyosezi akajya mu kiruhuko cy’izabukuru.

Ubundi umusenyeri, kubera impamvu z’uburwayi cyangwa iyo ageze ku myaka 75 asaba ikiruhuko cy’izabukuru. Musenyeri Ntihinyurwa yujuje imyaka 75 mu 2017. Papa ni we wemeza ko musenyeri runaka agiye mu kiruhuko cy’izabukuru akanagena n’umusimbura ku buyobozi bwa diyosezi.

Umusenyeri ugiye mu kiruhuko cy’izabukuru aba afite uburenganzira bwo gukora indi mirimo yihitiyemo nko kuba yajya muri paruwasi agafasha abapadiri cyangwa se kuba yajya nko mu ishuri runaka akigisha.
Mu bandi basenyeri Gatolika bo mu Rwanda, undi wujuje imyaka 75 ni Nzakamwita Servilien wa Byumba, Mbonyintege Smaragde wa Kabgayi afite imyaka 71.

Harorimana Vincent wa Ruhengeri afite 55, Hakizimana Célestin wa Gikongoro afite54, Anaclet Mwumvaneza wa Nyundo afite 61 naho Rukamba Philippe wa Butare afite 69.

Musenyeri Kambanda yagizwe Arkiyepiskopi wa Kigali
Musenyeri Ntihinyurwa wari umaze imyaka 22 ayobora Arkidiyosezi ya Kigali
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
Imurinde 2019-01-17 07:28:43

Ati "Ni inshingano ziremereye ariko byose tubifashwamo n’Imana.Nibyo koko IMANA izagufashe.

2
Petrus 2019-01-13 06:09:38

Ninde se wakubwiye ko kiriziya ibanye nabi na leta
Ibyo uzanye nta wabigushigikiramo
Ikindi
Bishop ni uwa abanyagaturika ba Kigali nkuko buri ntara igira umushumba wayo
ariko si umutwe wa kiriziya nkuko uri kubizana hano
Umutwe wacu ni intumwa Petero urutare rutajegabanywa ntirujejezwe intumwa ntago ari Antoine bishop
Our bishop Antoine ni umunyamahoro
Utarangwa nibyo mbona uri kumuzanamo hano
Ngo urizerako kiriziya blabla......
Kiriziya Ni imwe itunganye ikomoka ku ntumwa
Ntawe dusabye ko ahindura umutwe wa kiriziya
Ibyo nibyo bizana ibibazo mu madini

3
Nkurikiye-Imana: 2019-01-12 13:53:24

IBICUBA ni IBISABO bisabane hagati ya Archeveque Antoine KAMBANDA wa Archidiocese ya Kigali, akaba ni Umuyobozi mukuru wa kiriziya Gaturika yu Rwanda [HEAD of CATHOLIC CHURC], na Presindent Paul KAGAME. Aba bagabo bombi baraziranye cyane, byongeye kandi baranakuranye, mu nkambi ya NAKIVALA mu BUGANDA. Ubu rero bagiye kongera guturana. Twizere neza ko, Kiriziya Gatorika izabana neza na Leta ya FPR INKOTANYI! Kubera ko, aba Bavandimwe bombi bavuyemo abayobozi bakuru bo, mu rwego rwo hejuru, muri kino gihugu cyacu. Twizere ko, aba bagabo bombi batazadutaba mu nama.

Kwamamaza