IGIHE

Gasigwa yakoze filimi igaragaza ubugome bwakoreshejwe mu kwica abana muri Jenoside

1 19-09-2019 - saa 12:04, IGIHE

Mu 2004 Gasingwa Léopold wari ufite imyaka 24 yagiye ahazwi nk’i Musambira mu Karere ka Komonyi, mu muhango wo kwibuka abazize Jenoside yakorewe Abatutsi 1994.

Yumvise ubuhamya bwari ubwa mbere mu matwi ye, amenya uko mu gihe cya Jenoside muri aka gace habayeho umunsi wo kwica abana gusa, icyo gihe abagera kuri 80 bari bashyinguye mu rwibutso.

Abo bana bajugunywe mu myobo ari bazima barenzwaho itaka, ntibari bazi ubugome bari gukorerwa n’abacinyi, bapfa bavuga bati ‘Urantokoza’.

Iri jambo niryo yahaye umutwe wa filimi mbarankuru ateganya gushyira hanze mu mwaka utaha wa 2020.

Gasigwa avuga ko iyi filimi ishingiye ku iyicwa ry’abana n’iteshagaciro ryakorewe ababyeyi babo mu gihe cya Jenoside yakorewe Abatutsi mu 1994.

Ati “Wasangaga Interahamwe zambuye ababyeyi abana cyangwa se zigategeka ababyeyi b’abo bana kubiyicira. Niba hari igihe umubyeyi yageze akabura ubufasha aha umwana we kandi yari amwizeyeho ubufasha, uburyo umubyeyi yasigaraga yabaga ateshejwe agaciro imbere y’umwana we wishwe cyangwe se wanarokotse ariko akanateshwa agaciro muri we.”

Iyo filimi irimo ubuhamya bw’abari abana mu gihe cya Jenoside yakorewe Abatutsi, ubw’ababyeyi biciwe abana babo, abasirikare b’Inkotanyi bagize uruhare mu guhagarika Jenoside, abakoze Jenoside, n’abandi bayobozi batandukanye.

Gasigwa avuga ko iyi filimi igamije kwerekana umwihariko wa Jenoside yakorewe Abatutsi haba mu mitegurire, mu ishyirwa mu bikorwa byayo n’ibindi.

Ati “ Umwihariko urimo ni ukugaragaza uburemere bwa Jenoside yakorewe Abatutsi haba uko yateguwe no mu ishyirwa mu bikorwa noneho by’umwihariko ku ruhande rwo kwica abato. Kwica abato kwari ugutsemba ubwoko. Iyo wishe abana ukica n’abagore ari bo batanga ubuzima, ukica n’abo babuhaye, intego yo gukora Jenoside uba wayigezeho. ”

Iyi filimi imara iminota 58 amashusho yayo ya mbere yafashwe mu 2012 ariko mu 2015 nibwo umushinga nyir’izina watangiye gushyirwa mu bikorwa neza kuri ubu ikaba igeze ku kigero cya 98% kugira ngo irangire burundu.

Yatwaye ingengo y’imari y’amafaranga miliyoni 32 Frw, izashyirwa hanze mu mpera za Werurwe 2020 hamwe n’igitabo bimeze kimwe.

Reba agace gato k’iyo filimi

Ikiganiro Gasigwa yagiranye na IGIHE asobanura byinshi kuri iyi filimi

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
gahinyuza 2019-09-19 10:36:58

merci!

Kwamamaza