IGIHE

Atome yagizwe Ambasaderi wa Rwanda Film Festival igiye kuba ku nshuro ya 15

0 18-10-2019 - saa 12:54, Uwiduhaye Theos

Ntarindwa Diogène wamamaye nka Atome mu gusetsa, yagizwe Ambasaseri wa Rwanda Film Festival igiye kuba ku nshuro ya 15.

Iri serukiramuco riteganyijwe kuba guhera ku wa 19 kugeza ku wa 26 Ukwakira 2019.

Hazerakanwamo filime zitandukanye 60 z’abakora sinema bo mu bihugu bitandukanye ku Isi. Filime zizajya zerekanirwa muri Kigali Century Cinema, Kigali Cultural Village no mu Isomero rusange rya Kigali.

Intego nyamukuru y’iri serukiramuco ni uguteza imbere, guha agaciro no kumva neza ubuhanzi bwa filime mu Rwanda.Hazerekanwa izindi filime zitandukanye zaturutse mu bindi bihugu ku Isi yose.

Muri filime zizerekanwa harimo ingufi, indende, filime mbarankuru, filime z’uruhererekane n’izindi.

Rwanda Film Festival izatangizwa herekanwa filime yitwa “Rattlesnakes” yakorewe muri Amerika [Hollywood] ikayoborwa n’inzobere muri filime Julius Amadume wo mu Bwongereza. Hazerekanwa kandi filime ngufi yitwa “Zombies” yakozwe na Baloji wo muri Repubulika iharanira Demukarasi ya Congo[RDC].

Ku cyumweru azaba ari umunsi wahariwe sinema nyarwanda herekanwe agace ka filime y’uruhererekane ya “Rwasa” mu rwego rwo guha icyubahiro Nsanzamaharo Dennis wari umukinnyi w’imena muri iyi filime uherutse kwitaba Imana.

Hazerekanwa kandi filime ngufi yitwa “I Got My Things And Left” ya Philbert Mbabazi, “Luna” ya Bora Shingiro, “Kazungu” ya Yuhi Amuli, “Sukut” ya Ganza Moise na Mercy Of The Jungle ya Joel Karekezi umaze gutwara ibihembo byinshi mpuzamahanga.

Hazerekanwa filime yitwa “Karani Ngufu” yatangiye ari uruhererekane ariko igahindurwamo filime y’iminota 90, iyi ikazazengurutswa mu bice bitandukanye by’u Rwanda.

Eric Kabera mu kiganiro yagiranye n’itangazamakuru kuri uyu wa Kane, tariki 17 Ukwakira, yavuze ko impamvu bahisemo gukorana na Atome uyu mwaka nka Ambasaderi w’iri serukiramuco ari uko ari umwe mu bazi byinshi ku ruganda rwa sinema kandi ubimazemo igihe.

Ati “Impamvu twakoranye na Atome, ni umwe mu bamaze igihe kinini mu ruganda. Twaramwegereye aratwumva, twumva dukoranye na we byaba ari byiza.”

Yanavuze ko ari uguha umwanya n’abandi , ku buryo abantu batazakomeza kumva ko ari ‘rya serukiramuco rya Eric Kabera’.

Rwanda Film Festival ni rimwe mu maserukiramico amaze gushinga imizi mu Rwanda, uyu mwaka rizaba riri kwizihiza imyaka 15 rimaze ritangijwe.

Eric Kabera watangije Rwanda Film Festival (ibumuso) na Atom wagizwe Ambasaderi w'iri serukiramuco uyu mwaka
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Nta gitekerezo kirajyaho. Ba uwa mbere!  

Kwamamaza